Bră 21

1Jơ gư̆n, bră tom tơlôh dơ̆ ƀòn hî sŏng dî lơboh trôh ma dàlîng, rơ̆ la ma-ngkơi jơ tơngăc bơh nơ̆m ƀòn gô, gừn ƀòn hî swà tơpăt ngăn, swà trôh nơ̆m kôs, sŏng gư̆n trôh nge ma-ngkơi trôh nơ̆m Rôdơ, gừn bơh anẵu rơ̆ trôh nơ̆m Ƀatara 2Dơ̆ sŏng jôi tom du-lăm ahẵu swà găn trôh nơ̆m lơgơ Phenesi, gừn mơ̆t nơ̆m ahẵu gư̆n, ƀòn hî dî lơboh tơlôh swà. 3Dơ̆ gư̆n, ma-ngkơi jơ lăng tơmpơl bôt bơlao Ciprơ, gừn pleh găn lêh mađah eo bôt bơlao ƀòn hî hao nơ̆m ahẵu trôh nơ̆m lơgơ Siri, gừn swà jư trôh anẵu Tirơ, bơh ahẵu păl ya jini-jơno nơ̆m gư̆n. 4Dơ̆ gư̆n, ma-ngkơi jơ jôi dî lơ̆gay cro bơtê, ƀòn hî ăm wăl nơ̆m anẵu gư̆n poh nge, mà ƀòn gô, Kơnơm bơh Yang Hwîng Goh dờp gư̆t, kư̆ tơs lah Pol bư̆ng lơbà jư̆ng trôh nơ̆m Jerusalem. 5Jơ gư̆n, bră tom tơlôh tơm jơ lŭi-dơ̆t lơ̆gay nhẵư nge dô, rơ̆ la ma-ngkơi tơm jơ swà gung, ƀòn hî kư̆ pơnjăt nơ̆m gung swà, tơm tô̆ lơ̆gay ƀòn gô du nùs băl swà tơngăc ƀòn hî băl î bo-ua gư̆m lơ̆gay kon, trôh dî bơlao makin ƀòn dơng, Gừn ma-ngkơi jơ cơdơn krô̆ng nteàh mamằ dàlîng hôi-dăn, 6gừn ƀòn hî tơngăc găp gừn lơbà hao mơ̆t nơ̆m ahẵu, hôm lơ̆gay ƀòn gư̆n gừn blăc trê wăl anẵu mơ̆n.

7Mơya ƀòn hî, tơm tô̆ sŏng swà gung bơh Tirơ lờt, gừn swà jư trôh nơ̆m Pơtôlemai, gừn ma-ngkơi jơ sŏng còp-să lơ̆gay oh mi, ƀòn hî ăm wăl î ƀòn gô du-nge. 8Sŏng gư̆n nge ma-ngkơi, ma-ngkơi jơ swà gung, ƀòn hî swà trôh nơ̆m Sesare, gừn tơm tô̆ sŏng swà mơ̆t nơ̆m hîh Philip dê, hîh cro bơtău Jơno Niem, la du hôi nơ̆m poh hê cro dŏng gar, ƀòn hî ăm wăl î ông. 9Jơ gư̆n, ông dî puôn hê kon ua-drôh rlung tơs hwơr. 10Sŏng gư̆n nơ̆m khăi nge dơ̆ ƀòn hî ăm wăl nơ̆m gư̆n, du hôi cro gơnoăr-hwơr năy, sơnăn Agaƀus, sŏng swà jư bơh Juđe. 11Ma-ngkơi jơ trôh tơmtom ƀòn hî î dưñ săy kăt bơ̆t Pol dê, sŏng gư̆n căp jư̆ng tê mơ̆n wăl, ông tơs lah: “Yang Hwîng Goh tơs lơ̆gay jơno tîdô lah; ‘Jăt gư̆p tîdô, cro Juđa nơ̆m anẵu Jerusalem rơp căp cro-klo, mà cro rơ̆ la cro tơm săy bơ̆t dô, gừn ƀòn gô rơp jao cro rơ̆ nơ̆m tê lang bol bơdih.’” 12Tîrơ̆ la, tơm tô̆ ƀòn hî kơnău nhẵư jơno rơ̆, gư̆m ƀòn hî băl î lơ̆gay cro ăm nơ̆m ƀòn tơm lơ̆gay răc-dăn Pol bư̆ng swà trôh nơ̆m Jerusalem. 13Pơnjăt ma rơ̆, Pol kla wăl dẵư lah: “No-jơno oh mi ndăng lơh gư̆n, ñim-rèa gừn lơh ăñ jê-kơkua nùs tua ngăn ờ ơ? Tài bơh ăñ tom jơno rcăng lơs, ơ̆-iyŏ nư̆ng lơi kŏng căp, mà hôm kŏng sơ̆t bơh sơnăn Yang Jesu nơ̆m Jerusalem te.” 14Dơ̆ gư̆n, ông ơ̆ tom kơñ iet, gư̆n-jîng ƀòn hî ơ̆ mơ̆ndơm-mơ̆nieng te, kla wăl dẵư lah: “Dăn nùs-kơñ Yang dî gôjîng iyŏ ngăn.”

15Jơ gư̆n, ma-ngkơi lơ̆gay nge gư̆n, tơm tô̆ sŏng săc tơgom wăl lơ̆gay jini-jơno, ƀòn hî swà hao trôh nơ̆m Jerusalem. 16Sŏng gư̆n du pơnah cro bơtê bơh Sesare kŭng swà băl î ƀòn hî, bơlăm ƀòn hî trôh nơ̆m anẵu Manasôn, du hôi cro ƀòn tơm nơ̆m Ciprơ, la cro bơtê bơhsơm, mà ƀòn hî dî wă-rẵu bơh cro dô.

17Jơ gư̆n, tơm tô̆ ƀòn hî trôh lờt nơ̆m Jerusalem, lơ̆gay oh mi rôh lŏ sơhờp-sờhơn wă-rẵu ƀòn hî. 18Sŏng gư̆n nge ma-ngkơi, Pol swà băl î ƀòn hî trôh tơmtom Jakơ, ơ̆ dî nư̆ng tîgư̆n lơ̆gay kơp cro kwăng kra kŭng tom măt. 19Còp-să ƀòn gô sŏng, ông tơs wăl kơp du-lăm bră lơ̆gay jơno mà Yang Tơm Trồ sŏng lơh nhòng lơ̆gay lang bol bơdih bơh gơnoăr bră mơ̆n dê. 20Jơ gư̆n, ma-ngkơi jơ kơnău tîrơ̆, ƀòn gô jong-rơ Yang Tơm Trồ, ơ̆ dî nư̆ng tîgư̆n ƀòn gô tơs î ông lah: “Ơ oh mi, amî tơmpơl gư̆n, tom hang rbô hê cro sŏng don nhòng tơmpôl lang bol Juđa, gừn ƀòn gô dî nùs ngăc-ngăr gôtrê bơh jơno-bơlăm. 21Mơya, ƀòn gô sŏng dî kơnău tơs bơh mê, lah mê ƀăn mơntău gôtrê bơh bră lơi căư bơh jơno-bơlăm Môise ma lơ̆gay cro Juđa nhòng tơmpôl lang bol bơdih, tơm tô̆ pơđơ lơ̆gay tơmpôl gư̆n bư̆ng koh kato ma kon so mơ̆n, kŭng bư̆ng jîng jăt lơ̆gay jơno ờs dơm. 22Tîrơ̆ gừn, mơmơh păl lơh teh? Nên-nôn ngăn ƀòn gô rơp kơnău gư̆t lah mê trôh sŏng. 23Gừn păl lơh cĕ tîdô, la jơno mà ƀòn hî tơs î mê, Puôn hê jai dô ăm băl î ƀòn hî, ndăng tom anẵu ƀòn gô du jơno sràt-să. 24Ma-ngkơi jơ iyà lơ̆gay tơmpôl dô jăt băl gừn păl kŏng rao lơhiê băl î ƀòn gô, î păl kla jên-priè ma ƀòn gô, lơi ƀòn gô rơp kàc găl ƀòn gô. Sŏng gư̆n lơ̆gay cro rơp gư̆t lah lơ̆gay jơno ƀòn gô sŏng dî kơnău tơs bơh mê la ơ̆ tô̆ găy tom, tơblơ̆ wăl sătan mê kŭng ngui sa niem-lơhơn tơm jơ prăp jư jơno-bơlăm. 25Hôm gôtrê bơh lơ̆gay tơmpôl lang bol bơdih sŏng don, ƀòn hî sŏng pơyoa sră, lơh nên păl prăp jư să mơ̆n klàs bơh nơ̆m jơno duh-khoai rồp-ràk, mham, jơno sơ̆t lơhăp, gư̆m jơno rês-àr bơnan.” 26Bơh gư̆n, nge ma-ngkơi, ma-ngkơi jơ bơlăm nhẵư hê ƀòn gư̆n swà băl; dơ̆ sŏng dî rao lơhiê băl î ƀòn gô, gừn Pol swà mơ̆t nơ̆m hîh duh-khoai, tơs tơnggư̆t jơno lơh nên lờt bơh khà nge rao lơhiê, katîng trôh dî tơm tô̆ ăn jơno duh-khoai ma kơp du hôi cro nơ̆m khà ƀòn gô.

27Mơya tơm tô̆ poh nge mơñ dî wêl-tăl, nhẵư hê cro Juđa trôh bơh Asi, ma-ngkơi jơ tơmpơl Pol nơ̆m hîh duh-khoai, sŏng bơtrôt nùs du tơmpôl khăi gừn e tê sơbê̆ kơ̆p ông, 28dreo dơng lah: “Ơ lơ̆gay kơp cro, ơ lang bol Israel, dăn tơmdŏng ƀà ƀòn hî. Dô la cro mơntău lơ̆gay kơp cro nơ̆m lơ̆gay anẵu tơmdră wăl lang bol, jơno-bơlăm î nơ̆m anẵu dô. Ơ̆ dî nư̆ng tîgư̆n, tien gơs gô kŭng iyà cro Grek mơ̆t nơ̆m hîh duh-khoai gừn lơh sơmơ̆-sơmĭñ anẵu sang-goh dô.” 29Bơh lai mađàp ƀua, ƀòn gô sŏng tơmpơl Trôphim, cro Ephesô, băl î ông nơ̆m ƀòn dơng, mà ƀòn gô tôn-lah Pol iyà amî gư̆n mơ̆t nơ̆m hîh duh-khoai. 30Du ƀòn dơng gư̆m kŏng nggua-nggàc, gư̆m tom du tơmpôl lang bol rơndôh trôh gừn ma-ngkơi jơ cơƀah kơ̆p Pol. Ƀòn gô hwa ông tơlôh makin hîh duh-khoai, gừn sơbăc-sơbăng kăl wăl mpông. 31Kŭng nơ̆m jơ grat tơngsơ̆t ông, gừn jơno tơm tơs lam kơnău trôh cro kwăng ăt-bồ tơmpôl lĭñ lah du ƀòn dơng Jerusalem ndăng kŏng sơlô̆ng-sơlăng. 32Gừn ƀăt jai gư̆n, ma-ngkơi jơ bơlăm băl tơmpôl lĭñ î lơ̆gay cro kwăng ăt-bồ du-rhieng lĭñ, ông cơplŏk jư trôh nơ̆m anẵu tơmpôl jơnư̆m khăi. Sŏng gư̆n dơ̆ lang bol lăng tơmpơl cro kwăng ăt-bồ băl î tơmpôl lĭñ, ƀòn gô bơdê pơng lơh Pol. 33Nơ̆m dơ̆ dô, tơm tô̆ sŏng swà trôh en, cro kwăng ăt-bồ pơđơ kơ̆p jư ông, e gơnoăr lơi ông kŏng căp bơh î bea dăng săy-srê̆, sŏng gư̆n lùp nê̆ ông la măt cro gư̆m ông sŏng lơh jơno găy. 34Mơya, cro dô cro năy nơ̆m tơmpôl jơnư̆m khăi ndăng dreo kơkrẵy du bră pha phadêh, hôm cro kwăng ăt-bồ, tơm tô̆ ơ̆ jôi swì dî jơno găy nê̆-năn bơh jơno ngê tua ndrăm-ndròm, gừn sŏng e gơnoăr pơđơ lơi ông dî iyà trê nơ̆m đôn-lĭñ. 35Mơya dơ̆ ông swà trôh nơ̆m kơnă dơ̆ păy, gừn bră tom tơlôh ma ông la păl dî tơmpôl lĭñ tung swà, tài bơh jơno rhŭng-rhăng lang bol dê. 36Bơh du tơmpôl cro khăi ngăn kư̆ swà jăt, dreo kơkrẵy lah: “Tơngsơ̆t gô cĕ!”

37Ơ̆ dî nư̆ng tîgư̆n, tơm tô̆ mơñ kŏng lơboh mơ̆t nơ̆m đôn-lĭñ, Pol tơs î cro kwăng ăt-bồ lah: “E gơnoăr ma ăñ tơs nhẵư jơno î mê ya.” Sŏng gư̆n cro kwăng ăt-bồ tơs lah: “Mê gư̆t dẵư cro Grek ya? 38Tîrơ̆ gừn ông ơ̆-iyŏ la cro Ejiptơ, cro mà lai mađàp lơ̆gay nge dô sŏng lơh sơlô̆ng-sơlăng gư̆m tề lăm puôn-rbô hê tê cro tơngsơ̆t cro nơ̆m ƀlang-càs ơ̆h?” 39Sŏng gư̆n Pol kla wăl dẵư lah: “Ăñ la cro Juđa, ƀòntơm ƀòn dơng Tarsơ, lơgơ Silisi, du hôi cro ƀòntơm ƀòn dơng dê ơ̆-iyŏ la ờs kơsòt ờ. Gư̆n-jîng ăñ dăn ông e gơnoăr ăñ răk-sa î lang bol.” 40Bơh gư̆n ma-ngkơi jơ cro kwăng ăt-bồ e gơnoăr, dơ̆ ñă nơ̆m kơnă dơ̆ păy, Pol lơh têl bơh î tê ma lang bol. Jơ gư̆n, tơm tô̆ sŏng ăm-ƀơt ƀà ƀà lờt, ông tơs bơh î jơno tơs Heƀrơ, lah: