Bră 20

1Jơ gư̆n, tơm jơ bră nggua-nggàc lơ̆ lờt, Pol hôi jà lơ̆gay cro bơtê trôh; gừn ma-ngkơi jơ mơ̆ndơm-mơ̆nieng ƀòn gô, tơs jơno tơngăc găp, gừn ông tơlôh swà gung trôh nơ̆m lơgơ Maseđoan. 2Bơh gư̆n, tơm tô̆ sŏng swà găn lơ̆gay bơlao gư̆n î mơ̆ndơm-mơ̆nieng ƀòn gô bơh î du jơno bơtău lơmŏng, gừn ông swà trôh nơ̆m lơgơ Grek. 3Ơ̆ dî nư̆ng tîgư̆n, dơ̆ ăm nơ̆m gư̆n păy kơnnhe lờt, bơh tom du jơno kai kơnĕ lơh rôn-bơklơ̆n ông bơh cro Juđa tơm tô̆ sơmơn swà hao nơ̆m ahẵu trôh nơ̆m Siri, gư̆n-jîng ông sŏng lơh nên blăc trê wăl jăt đah lơgơ Maseđoan. 4Dơ̆ gư̆n, cro swà băl î ông la Sôpate, kon Pirus, cro Ƀere; gư̆m tom băl Aritak; î Sekundus, cro Tesalônika; Gaius, cro Derbơ; Timôthe; băl î Ticikơ; gư̆m Trôphim cro Asi. 5Mơya bơh sŏng swà lai mađàp, ƀòn gô ndăng ăm cang ƀòn hî nơ̆m anẵu Trôas. 6Hôm ƀòn hî, ma-ngkơi lơ̆gay nge Bơjư̆m-Sa Ƀăñ Ơ̆ Tom Dong, sŏng hao nơ̆m ahẵu bơh ƀòn dơng Philip, gừn nơ̆m prăm nge ma-ngkơi, gư̆n ƀòn hî trôh băl ma ƀòn gô nơ̆m anẵu Trôas, la anẵu mà ƀòn hî ăm wăl nơ̆m gư̆n poh nge.

7Jơ gư̆n, mơ̆t nơ̆m nge dơ̆ sơm nhòng poh, tơm tô̆ ƀòn hî bơjư̆m wăl î găp lơi pêh ƀăñ, Pol răk-sa î lơ̆gay cro don jăt Yang. Bơh kơñ lơh nên swà gung nge ma-ngkơi, gư̆n-jîng ông kư̆ tơs bơtău trôh dî nggùl năng. 8Dơ̆ gư̆n, tom khăi oềs kơlŏ nơ̆m ơdô̆ tăp cŭngsî, anẵu mà ƀòn hî ndăng dî bơjư̆m wăl. 9Mơya, du hôi cro pơnu năy, sơnăn Ơtikus, dơ̆ nggui anẵu mpông pơ̆t. Bơh bĭc lơhà ngăn, tơm jơ Pol tơs bơtău jŏ rlo te, bơh kŏng lơnge lơngẵu nơ̆m lơhà bĭc, gô duh bơh hîh dăp dơ̆ păy lêh nteàh gừn sơ̆t tơm tô̆ dî pồ yŏk lôh. 10Mơya, tơm tô̆ sŏng swà jư nteàh, Pol cun să bơlao cro pơnu, sŏng gư̆n ùc dưñ cro pơnu, ông tơs lah: “Bư̆ng mơrêh-mơrăñ, bơh jơno jîng mê dê ờs ăm nơ̆m mê.” 11Ma-ngkơi gư̆n, swà hao wăl, pêh ƀăñ gừn sa, mơya răk-sa nơ̆m du pah tô̆ tơnge trôh dî brê-ang, sŏng gư̆n kư̆ tîgư̆n, ông swà gung. 12Hôm cro nde iyà cro pơnu hôm jîng trê gư̆m dî mơ̆ndơm-mơ̆nieng khăi ngăn.

13Pơnjăt ma rơ̆, tơm tô̆ sŏng swà lai trôh nơ̆m anẵu ahẵu, ƀòn hî dî lơboh trôh nơ̆m Asôs, la anẵu kơñ lơh nên rơp wă-rẵu Pol hao nơ̆m ahẵu. Bơh ông sŏng rơndăp tăp sên tîgư̆n, tơm tô̆ sătan ông dê lơh jăt jơno lơh nên jơno rơndăp tăp sên swà jư̆ng. 14Gừn tơm tô̆ ông sŏng tơmtom ƀòn hî nơ̆m anẵu Asôs, gừn ma-ngkơi jơ wă-rẵu ông hao nơ̆m ahẵu, ƀòn hî swà trôh nơ̆m Mitilen. 15Gừn tơm tô̆ tơlôh swà bơh anẵu gư̆n, nge ma-ngkơi ƀòn hî swà jư găn rơndăng bôt bơlao Ciôs, hôm nge ma-ngkơi gư̆n te, ƀòn hî trôh nơ̆m anẵu Samôs, sŏng gư̆n nge pơnjăt te, ƀòn hî sŏng swà trôh nơ̆m Miletus. 16Bơh Pol sŏng lơh nên hao nơ̆m ahẵu swà găn lêh nơ̆m Ephesô, lơi ông ơ̆ păl roh tô̆ jơ nơ̆m lơgơ Asi; bơh ông ndăng sơbăc-sơbăng lơi tom măt nơ̆m Jerusalem nơ̆m nge Bơjư̆m-Sa Nge Prăm-Jư̆t, dilah digơlăn bră gư̆n la gôtrê ma ông.

17Bơh rơ̆ la, bơh nơ̆m Miletus, ma-ngkơi jơ pơđơ cro trôh nơ̆m Ephesô, ông hôi jà lơ̆gay cro kwăng kra Hîh Jư̆m Goh trôh. 18Sŏng gư̆n, tơm tô̆ ƀòn gô sŏng trôh băl ma ông, gừn ông tơs î ƀòn gô lah:

“Sătan oh mi gư̆t nê̆, bơh nge dơ̆ sơm, la dơ̆ ăñ lơbà swà trôh nơ̆m lơgơ Asi, ăñ sŏng ăm băl î oh mi amơh tîgay miek nơ̆m tô̆ tơnge gư̆n. 19Tơm tô̆ duh bră Yang bơh î lơ̆gay nùs tơng-êt să gư̆m dà măt, băl î lơ̆gay jơno gleh-glăr tom tơlôh ma ăñ tài bơh lơ̆gay jơno jôi kai-kơnĕ cro Juđa dê. 20Tîgay ăñ sŏng ơ̆ prăp ăn lơi wăl jơno găy, rơ̆ la lơ̆gay jơno kwơ mang, mà ơ̆ tơs bơtău ma oh mi, ăñ kŭng sŏng ƀăn mơntău oh mi nơ̆m bơlao khăi cro, gư̆m nơ̆m kơp hîh nhă, 21tơm tô̆ lơh cư̆ng băl ma cro Juđa gư̆m ma cro Grek gôtrê bơh jơno tơcao mbư̆ng glài kah trôh Yang Tơm Trồ gư̆m gôtrê bơh jơno don anẵu Yang ƀòn mơ̆n, la Yang Jesu. 22Jơ dô, dăn lăng dô, ăñ ndăng nơ̆m gung swà trôh nơ̆m Jerusalem, bơh kŏng Yang Hwîng Goh pơtĕo, ờs ơ̆ gư̆t lơ̆gay jơno găy rơp tom tơlôh ma ăñ nơ̆m anẵu gư̆n, 23nư̆ng sî bră Yang Hwîng Goh lơh cư̆ng-tang î ăñ nơ̆m kơp ƀòn dơng, tơs lah săy-srê̆ î jơno gleh-glăr ndăng ăm cang ăñ. 24Mơya, ăñ ơ̆ tơs jơno găy ma rai-jîng ăñ la dơng mang gôtrê î ăñ, nư̆ng amơh lơh tơngsŏng bră toat cơplŏk ăñ dê î gơnoăr bră mà ăñ sŏng dưñ-lăñ bơh Yang Jesu, lơi lơh cư̆ng ma Jơno Niem bơh jơno sơmah Yang Tơm Trồ dê. 25Jơ dô, dăn lăng dô, ăñ gư̆t lah lơ̆gay oh mi, la nhòng tơmpôl cro mà ăñ sŏng dah mơ̆t tơm jơ tơs bơtău bơh Lơgơ Yang Tơm Trồ, rơp ơ̆ tơmpơl măt ăñ te. 26Gư̆n-jîng, nơ̆m nge dô, ăñ lơh cư̆ng sơđàp oh mi lah ăñ ơ̆ tom glài gôtrê bơh mham lơ̆gay oh mi dê. 27Bơh ăñ ơ̆ prăp ăn lơi wăl du jơno găy lơh ma lơ̆gay nùs-kơñ Yang Tơm Trồ dê mà ơ̆ dî tơs tơnggư̆t dî anẵu oh mi. 28Lăng jư cĕ sătan mơ̆n gư̆m băl î mpôl êt mà Yang Hwîng Goh sŏng ăn oh mi lơh cro rong siem lơi jư tề lăm Hîh Jư̆m Goh Yang Tơm Trồ dê, la hîh mà Kơnràñ sŏng tăc bơh î mham sătan mơ̆n dê. 29Ăñ gư̆t lah ma-ngkơi jơno tơlôh swà ăñ jê, mpôl său-cơho rhŭng-rhăng rơp tơcô̆ mơ̆t nhòng tơmpôl oh mi, ơ̆ tom kơloh mpôl ahên. 30Tien gơs bơh nhòng tơmpôl sătan oh mi rơp rơndôh tơlôh du pơnah cro tơs tơlôh lơ̆gay jơno tìs-kơ̆mprah lơi mơ̆ndơm khăi cro bơtê jăt ƀòn gô. 31Gư̆n-jîng, păl gư̆t kơhea, sơdơ lah tơnge-tơmăng, miek nơ̆m păy năm, ăñ ơ̆ bơdê ƀăn tơngkah kơp du hôi cro băl î dà măt. 32Jơ dô, ăn phi jao oh mi rôh lŏ ma Yang Tơm Trồ î ma jơno sơmah Kơnràñ dê, la jơno dî gơnăp-gơnoăr lơi băt tơngñă oh mi î dờp e ma oh mi srăy-brê nhòng lơ̆gay tơmpôl cro găy ndăng dî sang lơhiê. 33Ăñ ơ̆ ham-hà priè hala màh hala ôi-ao cro găy. 34Sătan oh mi gư̆t lah du yô kơ̆mpang tê dô sŏng duh bră ma jơno kơñ ngui ăñ jê î tơmpôl cro ăm băl î ăñ. 35Ăñ sŏng sơđah ma oh mi nơ̆m lơ̆gay kơp bră lah păl kŏng gleh-glăr lơh bră gư̆p tîgư̆n lơi tơmdŏng lơ̆gay cro găy ơ̆ tăl pran, mơya lơi cêh sơdơ lơ̆gay jơno Yang Jesu dê, bơh sătan Kơnràñ sŏng tơs wăl lah: ‘Ngăn dî lơnge tơm tô̆ dờp e rlo la tơm tô̆ dưñ-lăñ.’”

36Ma-ngkơi jơ tơs lơ̆gay jơno gư̆n, gừn dơ̆ sŏng cơdơn krô̆ng nteàh, ông hôi-dăn băl î lơ̆gay ƀòn gô. 37Jơ gư̆n, jơno ñim-rèa dơng ngăn tom tơlôh nhòng tơmpôl ƀòn gô, gừn tơm tô̆ ùc ngkău Pol lờt gừn ƀòn gô cư̆m ông, 38bơh jơno moat-jrum ngăn la jơno ông sŏng tơs, lah ƀòn gô sơmơn ơ̆ tơmtom măt ông te. Ma-ngkơi gư̆n, ƀòn gô tơngăc ông hao nơ̆m ahẵu.