2 Tesalônika 2

1Ơ oh mi rôh lŏ, hôm bơh jơno trôh wăl Yang ƀòn mơ̆n, la Yang Dŏng-Klàs Jesu, î jơno jơnư̆m ƀòn mơ̆n î Kơnràñ, ƀòn hî dăn oh mi rôh lŏ 2lah oh mi rôh lŏ bư̆ng kađa wăñ-lơnggơh hala ndrăt-ndròt nơ̆m nùs kơlôi mơ̆n, kŭng bư̆ng bơh du-lăm hwîng, hala bơh du jơno bơtău, hala bơh du sră pơyoa gôlơh gư̆ptî trôh bơh ƀòn hî, tơm tô̆ tơs lah nge Yang trôh lờt. 3Dăn ơ̆ du hôi cro găy jăt kơp du-lăm jơno găy digơlăn pơlum oh mi rôh lŏ, bơh sî nư̆ng jơno tơmdră jơno Yang trôh lai, î kon-mơnùs tồi-glài dî sơđah tơlôh, rơ̆ la kon jơno tơngroh dê, 4la cro tơmdră wăl î pồ tơngñă dêh mơ̆n atẵy tơmdră î lơ̆gay jơno dî sơnăn la yang hala jơno dî duh-khoai, tien gơs sătan gô nggui nơ̆m hîh duh-khoai Yang Tơm Trồ, rang sơđah lah să tơm gô la Yang Tơm Trồ. 5Oh mi rôh lŏ ơ̆ sơdơ lah, tơm tô̆ hôm ăm î oh mi rôh lŏ, ăñ e sŏng ma oh mi rôh lŏ gư̆t bơh lơ̆gay bră dô ơ̆h? 6Gừn jơ dô oh mi rôh lŏ gư̆t sŏng jơno găy ndăng cơkhă, lơi gô nư̆ng dî sơđah tơlôh nơ̆m ñăm tô̆ tơnge gô dê. 7Bơh jơno ndăp-ndơ jơno ơ̆ jăt jơno-bơlăm ndăng lơh bră sŏng, sî nư̆ng du hôi Bơtao ndăng cơkhă gô nge dô kŭng hôm trôh dî jơ Bơtao gư̆n tơlôh bơh jơno cơkhă nhòng, 8Sŏng gư̆n cro ơ̆ jăt jơno bơlăm rơp dî rang sơđah tơlôh, la cro mà Yang Jesu rơp tơngroh bơh î jơno nhim bơh yôi Kơnràñ, î rơp lơh gô gôjîng jơno ơ̆ kwơ bơh jơno gơklŏ jơno tơngtrôh Kơnràñ dê, 9mà jơno tom tơlôh cro ơ̆ jăt jơno-bơlăm năy la kơnơm nơ̆m bră lơh cà Satan bơh î lơ̆gay gơnăp-gơnoăr băl î têl phadêh, kŭng gư̆ptî gơnoăr phadêh mablăc, 10băl î lơ̆gay kơp jơno blăc-pơlum ơ̆ tơpăt-durư̆ng ăn lơi ma tơmpôl cro sơ̆t-roh, mà ƀòn gô sơ̆t-roh la tài bơh ƀòn gô ơ̆ tom dưñ-lăñ jơno kơñ-kơloh tơpăt-ngăn ma mơ̆n lơi dî dŏng-klàs. 11Î tài bơh jơno gư̆n, Yang Tơm Trồ phi jao ƀòn gô mơ̆t nơ̆m jơno tìs kơ̆mprah lơi ƀòn gô don jơno mablăc, 12lơi ma jơh lơ̆gay ƀòn gô rơp kŏng cahrña, rơ̆ la tơmpôl cro ơ̆ don jơno tơpăt-ngăn, mà kơñ sơhờp wăl nơ̆m jơno ơ̆ tơpăt-durư̆ng.

13Mơya, ơ oh mi rôh lŏ, la tơmpôl cro dî Yang kơñ-kơloh, ƀòn hî păl ưnngai Yang Tơm Trồ miek bơh oh mi rôh lŏ. Bơh Yang Tơm Trồ sŏng săc-rwơh oh mi rôh lŏ gư̆ptî lơ̆gay ple sơm năm lơi dưñ-lăñ jơno dŏng-klàs kơnơm bơh jơno sang-goh Yang Hwîng Goh î jơno don anẵu jơno tơpăt-ngăn. 14Bơh lơi lăñ jơno sơmah gư̆n, Kơnràñ sŏng hôi-săc oh mi rôh lŏ kơnơm bơh Jơno Niem ƀòn hî dê, trôh ma jơno dưñ-lăñ jơno gơklŏ Yang ƀòn mơ̆n, la Yang Dŏng-Klàs Jesu. 15Gư̆n-jîng, ơ oh mi rôh lŏ, ñă kơđư̆ng cĕ î prăp jư kơđư̆ng lơ̆gay jơno rai yo mà oh mi rôh lŏ sŏng dî ƀăn mơntău, bulah bơh î jơno tơs hala bơh î sră pơyoa ƀòn hî dê.

16Dăn să tơm Yang ƀòn mơ̆n, la Yang Dŏng-Klàs Jesu, gư̆m Yang Tơm Trồ, Bàp ƀòn mơ̆n, Bơtao kơñ-kơloh ƀòn mơ̆n gừn sŏng e ma ƀòn mơ̆n jơno tơngkah-mơ̆ndơm miek miek băl î jơno cang-kơnơm niem-lơhơn bơh jơno sơmah, 17dăn Kơnràñ mơ̆ndơm-mơ̆nieng gư̆m lơh pran-kơdăng nùs-nhơ̆m oh mi rôh lŏ nơ̆m lơ̆gay bră lơh băl î jơno tơs niem-lơhơn.