2 Tesalônika 1

1Pol, gư̆m Silwan, băl î Timôthe, pơyoa ma hîh jư̆m goh Tesalônika nơ̆m Yang Tơm Trồ, la Bàp î Yang ƀòn mơ̆n, la Yang Dŏng-Klàs Jesu. 2Dăn jơno sơmah-sơmai î jơno lơngăp-lơnge bơh anẵu Yang Tơm Trồ, la Bàp, gư̆m Yang, la Yang Dŏng-Klàs Jesu, ăm nơ̆m oh mi rôh lŏ.

3Ơ oh mi rôh lŏ, ƀòn hî păl ưnngai Yang Tơm Trồ miek bơh oh mi rôh lŏ, gư̆ptî gư̆n la jơno iyŏ ngăn, bơh jơno don oh mi rôh lŏ sơlơ nge sơlơ pran-kơdăng, î jơno kơñ-kơloh kơp du hê cro dê nơ̆m jơh lơ̆gay oh mi rôh lŏ gôtrê î găp kư̆ khăi rlo te; 4trôh dî ƀòn hî yeh să anẵu oh mi rôh lŏ nơ̆m nhòng tĕdơ lơ̆gay hîh jư̆m goh Yang Tơm Trồ dê bơh jơno ăt-ăl oh mi rôh lŏ dê gư̆m jơno don nhòng kơp jơno kơ̆p-cơkhă oh mi rôh lŏ dê, băl î lơ̆gay jơno sơòs-sơngeh mà oh mi rôh lŏ ndăng păl kŏng, 5Gư̆n la cư̆ng-tang bơh jơno cahrña tơpăt-durư̆ng Yang Tơm Trồ dê e ma oh mi rôh lŏ lơi dî sơnăn la dî păl mơ̆t nơ̆m Lơgơ Yang Tơm Trồ dê, bơh lơgơ gư̆n mà oh mi rôh lŏ kŭng ndăng kŏng sơòs-sơngeh; 6bơh ngăn la tơpăt-durư̆ng tơm tô̆ Yang Tơm Trồ kla wăl jơno sơòs-sơngeh cŭngsî tơmpôl cro lơh sơòs-sơngeh ma oh mi rôh lŏ, 7gư̆m e ma oh mi rôh lŏ, la tơmpôl cro kŏng sơòs-sơngeh, jơno bơdê băl î ƀòn hî tơm tô̆ jơno sơđah măt Yang Jesu dê rang sơđah tơlôh bơh trồ băl î lơ̆gay cro gơndrơh pran-kơdăng Kơnràñ dê, 8nơ̆m lơm-piet oềs hit, iyà jơno lơh-glài ma tơmpôl cro ơ̆ đăl gư̆t Yang Tơm Trồ î ma tơmpôl cro ơ̆ don dưñ Jơno Niem Yang ƀòn mơ̆n, la Yang Jesu, 9gư̆n la tơmpôl cro rơp kŏng lơh-glài — la jơno tơngroh miek miek, wĭc bơh măt Yang î wĭc bơh gơklŏ gơnăp-gơnoăr Kơnràñ dê, 10tơm tô̆ Kơnràñ trôh lơi dî jong-rơ bơh lơ̆gay cro sang-goh Kơnràñ dê î dî lơ̆gay nhòng kơp cro sŏng ăn nùs don lăng phadêh, bơh jơno lơh cư̆ng ƀòn hî dê trôh î oh mi rôh lŏ nơ̆m nge gư̆n sŏng dî don dưñ. 11Tài bơh jơno gư̆n, ƀòn hî kŭng hôi-dăn miek ma oh mi rôh lŏ lơi Yang Tơm Trồ ƀòn mơ̆n sơnăn oh mi rôh lŏ la dî păl î jơno hôi-săc, î lơi Kơnràñ lơh-tăl lơ̆gay jơno kơp kơñ bơh jơno niem băl î bră lơh jơno don bơh gơnăp-gơnoăr, 12lơi ma sơnăn Yang ƀòn mơ̆n, la Yang Jesu, dî jong-rơ bơh anẵu oh mi rôh lŏ gư̆m oh mi rôh lŏ dî gơklŏ bơh anẵu Kơnràñ, jăt jơno sơmah Yang Tơm Trồ î Yang ƀòn mơ̆n, la Yang Dŏng-Klàs Jesu.