2 Pier 3:9

1Ơ oh mi rôh lŏ kơñ-kơloh, sŏng bơh du jŏ tô̆ tơnge, dô la sră pơyoa dơ̆ bea ăñ cêh ma oh mi rôh lŏ; mà ƀăt bea-lăm sră pơyoa, ăñ lơh rngoh-rngăc nùs-kơlôi tơpăt-ngăn oh mi rôh lŏ bơh î jơno tơs tơngkah, 2lơi sơdơ wăl lơ̆gay jơno sŏng dî tơs bơh lai ƀua bơh lơ̆gay cro gơnoăr-hwơr sang-goh băl î jơno gơnoăr pơđơ Yang dê î Yang Dŏng-Klàs bơh lơ̆gay cro gơnoăr bơtău dơng oh mi rôh lŏ dê, 3bơh gư̆t lai jơno gư̆n, rơ̆ la tơmpôl cro tơngyŏ-tơnghiel rơp trôh nơ̆m tô̆ tơnge lŭi-dơ̆t băl î jơno tơs tơngñŏ, jơno jîng jăt jơno ham-kơñ să tơm mơ̆n dê, 4mà tơs lah: “Jơno hăư pơngon bơh jơno trôh wăl Kơnràñ dê anẵu găy? Bơh tơm jơ lơ̆gay ông-pang bơdê să, lơ̆gay jơno ờs hôm tî yo bơhsơm bơjîng ù-teàh.” 5Bơh tơm tô̆ grat hwơbê̆ tîgư̆n, jơno dô gôjîng roh ha-ău bơh sơđàp măt ƀòn gô, rơ̆ la bơh jơno Yang Tơm Trồ, trồ sŏng tom bơh rai yo, î ù dî bơjîng bơh dà î kơnơm bơh dà, 6kŭng bơh lơ̆gay jơno gư̆n mà dunya bơh rai yo sŏng kŏng tơngroh, bơh kŏng dà tơngroh. 7Mơya jơ dô, băl î jơno gư̆n, trồ î ù dî ăn lơi ma oềs, dî ăn lơi ma nge cahrña î jơno kŏng tơngroh lơ̆gay kon-mơnùs ơ̆ duh kơ̆mbrit.

8Bulah tîgư̆n, ơ oh mi rôh lŏ kơñ-kơloh, bư̆ng lơi du jơno găy gư̆n dô gôjîng roh ha-ău bơh sơđàp măt oh mi rôh lŏ, lah du-nge î Yang gư̆ptî du-rbô năm, gừn du-rbô năm gư̆ptî du-nge. 9Yang ơ̆ băc nge bơh jơno hăư pơngon Kơnràñ dê, gư̆ptî du pơnah cro kơlôi la băc nge; ala bơh gư̆n, Kơnràñ ăt-ăl kŏng-ăt î oh mi rôh lŏ, ơ̆ kơñ cro găy nơ̆m oh mi rôh lŏ kŏng tơngroh, mơya kơñ jơh lơ̆gay dî tô̆ lăm-pah swà trôh nơ̆m jơno mbư̆ng lơi căư glài. 10Mơya, nge Yang rơp trôh gư̆ptî cro kơntô̆ng, mà nơ̆m nge gư̆n, dăp trồ rơp roh ha-ău nơ̆m jơno kơ̆ntàs ndrăm dơng, gư̆m jơh lơ̆gay jơno rơp kŏng tơngroh tơm tô̆ kŏng oềs hit sa, hôm ple-ù î lơ̆gay bră lơh nơ̆m gư̆n rơp kŏng rang tơlôh. 11Bơh jơh lơ̆gay jơno gư̆n rơp kŏng tơngroh gư̆p tîgư̆n, gư̆n-jîng rai-jîng oh mi rôh lŏ păl jîng sang-goh î kingam, 12cơkhă-cang î ngăc-ngăr cang-kơnơm nge sơđah măt Yang Tơm Trồ dê, bơh jơ gư̆n lơ̆gay dăp trồ rơp kŏng tơngroh bơh kŏng oềs su, hôm lơ̆gay jơno rơp làt bơh kŏng hwơ buh bơdo hơt. 13Mơya jăt jơno hăư pơngon Kơnràñ dê, ƀòn mơ̆n ndăng ăm cang trồ mhăy î ù mhăy, mà nơ̆m anẵu gư̆n jơno tơpăt-durư̆ng ăm.

14Gư̆n-jîng, ơ oh mi rôh lŏ kơñ-kơloh, bơh ăm cang lơ̆gay jơno gư̆n, grat pran cĕ lơi dî Kơnràñ lăng tơmpơl la ơ̆ têl sồt gư̆m ơ̆ anẵu găy ƀoah-đas dî, nơ̆m jơno lơngăp-lơnge. 15Gư̆m păl wơng gư̆t nùs kŏng-ăt Yang ƀòn mơ̆n la bơh jơno sơmah dŏng-klàs, kŭng gư̆ptî Pol, cro oh mi kơñ-kơloh ƀòn mơ̆n dê, sŏng cêh ma oh mi rôh lŏ, jăt jơno jăk-sai sŏng dî dờp ma mơ̆n, 16gư̆m gư̆ptî nơ̆m lơ̆gay sră pơyoa, tơm tô̆ tơs nơ̆m sră pơyoa bơh lơ̆gay bră dô, nơ̆m anẵu gư̆n tom du khà jơno ơ̆ wơng mà tơmpôl cro ơ̆ wơng gư̆t î ơ̆ bơkhê nùs tơs tìs jơno gơtha, kŭng gư̆ptî î lơ̆gay Sră-Goh nde, blăc gôtrê trôh ma jơno tơngroh ma să tơm mơ̆n. 17Gư̆n-jîng, ơ oh mi rôh lŏ kơñ-kơloh, bơh gư̆t lai lơ̆gay bră gư̆n, oh mi rôh lŏ jư cĕ să tơm mơ̆n lơi oh mi rôh lŏ ơ̆ tơngroh jơno kơđư̆ng nùs mơ̆n dê mà kŏng bơlăm swà tìs kơ̆mprah bơh jơno blăc-pơlum tơmpôl cro ơ̆ tơpăt-durư̆ng. 18Mơya păl teh dơng cĕ nơ̆m jơno sơmah î jơno gư̆t wơng gư̆t Yang î Yang Dŏng-Klàs ƀòn mơ̆n, la Yang Dŏng-Klàs Jesu. Dăn jơno gơklŏ gôtrê ma Kơnràñ gư̆m nơ̆m rai dô gư̆m trôh dî miek miek. Amen!