1 Jăng 1

1Jơno ờs tom bơh sơm, la jơno ƀòn hî sŏng kơnău, la jơno ƀòn hî sŏng tơmpơl ƀăt sơmăt mơ̆n, la jơno ƀòn hî sŏng ngơ lăng nê̆, î tê ƀòn hî sŏng tơbi gôtrê trôh ma Jơno Jîng. 2Ngăn tîgư̆n, jơno jîng sŏng dî rang sơđah gừn ƀòn hî sŏng lăng tơmpơl, ƀòn hî ndăng lơh cư̆ng î tơs tơnggư̆t ma oh mi rôh lŏ jơno jîng miek miek, la jơno ờs tom bơh anẵu Bàp gư̆m sŏng dî rang sơđah ma ƀòn hî. 3Jơno ƀòn hî sŏng tơmpơl î kơnău, gừn ƀòn hî tơs tơnggư̆t ma oh mi rôh lŏ, lơi oh mi rôh lŏ kŭng dî jơno du nùs băl î ƀòn hî. Ngăn, jơno du nùs băl ƀòn hî la î Bàp gư̆m î Kon Kơnràñ, la Yang Dŏng-Klàs Jesu. 4Ƀòn hî cêh lơ̆gay jơno dô lơi jơno sơhờp ƀòn mơ̆n dê dî wêl-tăl.

5Dô la jơno bơtău mà ƀòn hî sŏng kơnău bơh Kơnràñ gư̆m ndăng tơs tơnggư̆t ma oh mi rôh lŏ, lah: Yang Tơm Trồ la jơno ang î nhòng Kơnràñ ơ̆ tom kơp jơno ñô̆ng kơnăm găy. 6Dilah ƀòn mơ̆n tơs lah ƀòn mơ̆n dî jơno du nùs băl î Kơnràñ, mơya lơbà swà nhòng jơno ñô̆ng kơnăm, gừn ƀòn mơ̆n ndăng tơs blăc gư̆m ơ̆ lơh-jăt jơno tơpăt-ngăn. 7Mơya dilah ƀòn mơ̆n lơbà swà nhòng jơno ang gư̆ptî să tơm Kơnràñ ăm nhòng jơno ang, gừn ƀòn mơ̆n dî jơno du nùs băl î găp, gừn mham Yang Jesu, Kon Kơnràñ, lơh lơhiê lơ̆gay tồi-glài ƀòn mơ̆n. 8Dilah ƀòn mơ̆n tơs lah ƀòn mơ̆n ơ̆ tom glài, gừn ƀòn mơ̆n ndăng tơs pơlum dêh sătan mơ̆n î jơno tơpăt-ngăn ơ̆ ăm nhòng ƀòn mơ̆n. 9Dilah ƀòn mơ̆n tơs tơlôh glài mơ̆n, gừn Kơnràñ la Bơtao lơh-jăt jơno hăư î tơpăt durư̆ng, lơi toh glài ma ƀòn mơ̆n gư̆m lơh lơhiê ƀòn mơ̆n bơh sơ lơ̆gay jơno ơ̆ tơpăt-durư̆ng. 10Dilah ƀòn mơ̆n tơs lah mơ̆n hôm dahrăư tìs-glài, gừn ƀòn mơ̆n kơlôi Kơnràñ la cro tơs blăc, î jơno tơs Kơnràñ ơ̆ ăm nhòng ƀòn mơ̆n.