1 Jăng 2

1Ơ lơ̆gay kon ăñ jê, ăñ cêh lơ̆gay jơno dô ma ƀòn kon lơi lơ̆gay ƀòn kon ơ̆ tìs-glài. Gừn dilah tom cro găy tìs-glài, gừn ƀòn mơ̆n tom du hôi cro Bơtao hôi-dăn ala î Bàp la Yang Dŏng-Klàs Jesu, Bơtao tơpăt-durư̆ng. 2Kơnràñ la jơno añ tơwai-glài bơh tồi-glài ƀòn mơ̆n dê, mơya ơ̆ dî nư̆ng glài ƀòn mơ̆n gời, mà băl î glài lơ̆gay dunya te. 3Dilah ƀòn mơ̆n prăp jư lơ̆gay jơno pơđơ bơlăm Kơnràñ dê, gừn kơnơm bơh gư̆n ƀòn mơ̆n gư̆t lah ƀòn mơ̆n sŏng đăl gư̆t Kơnràñ. 4Cro găy tơs lah: “Ăñ gư̆t Kơnràñ” mà ơ̆ prăp jư lơ̆gay jơno pơđơ bơlăm Kơnràñ dê, rơ̆ la cro tơs blăc; gừn jơno tơpăt-ngăn ơ̆ ăm nhòng cro gư̆n. 5Mơya dilah cro găy prăp jư jơno Kơnràñ, gừn jơno kơñ-kơloh Yang Tơm Trồ dê nên-nôn ngăn dî wêl-tăl nơ̆m nhòng cro gư̆n. Ƀòn mơ̆n gư̆t lah mơ̆n ăm nơ̆m nhòng Kơnràñ la bơh jơno dô. 6Cro găy tơs mơ̆n hôm ăm nhòng Kơnràñ, gừn să tơm cro gư̆n kŭng păl jîng gư̆ptî Kơnràñ sŏng jîng.

7Ơ oh mi rôh lŏ kơñ-kơloh, ăñ ơ̆ cêh ma oh mi rôh lŏ du jơno pơđơ bơlăm mhăy, mơya la jơno pơđơ bơlăm yo mà oh mi rôh lŏ sŏng dî bơh sơm. Jơno pơđơ bơlăm yo rơ̆ la jơno mà oh mi rôh lŏ sŏng kơnău. 8Pơnah nde, ăñ cêh ma oh mi rôh lŏ du jơno pơđơ bơlăm mhăy mà jơno pơđơ bơlăm gư̆n la jơno tơpăt-ngăn nhòng Kơnràñ î nhòng oh mi rôh lŏ, bơh jơno ñô̆ng kơnăm dî ha-ău, gừn jơno ang ngăn ndăng bơang sŏng lờt. 9Cro găy tơs mơ̆n ăm nơ̆m jơno ang mà hôm ngañ oh mi rôh lŏ mơ̆n gừn jơ dô kŭng hôm ăm nhòng jơno ñô̆ng kơnăm. 10Cro găy kơñ-kơloh oh mi rôh lŏ mơ̆n gừn kư̆ ăm nhòng jơno ang, gừn bơh jơno lơh sơmăm tìs ơ̆ tom nhòng cro gư̆n. 11Mơya cro găy ngañ oh mi rôh lŏ mơ̆n la ăm nhòng jơno ñô̆ng gư̆m lơbà swà nơ̆m jơno ñô̆ng kơnăm. Cro gư̆n kŭng ơ̆ gư̆t mơ̆n ndăng swà sơgăy, bơh jơno ñô̆ng sŏng lơh ñô̆ng măt cro gư̆n.

12Ơ ƀòn kon, ăñ cêh ma ƀòn kon bơh lơ̆gay tồi-glài ƀòn kon sŏng dî hồ-toh kơnơm bơh sơnăn Kơnràñ. 13Ơ lơ̆gay cro lơh mơi bàp, ăñ cêh ma ƀòn ông bơh ƀòn ông sŏng gư̆t Bơtao tom bơh sơm. Ơ lơ̆gay cro pơnu ua-drôh, ăñ cêh ma ƀòn mê bơh lơ̆gay ƀòn mê sŏng pha-lĭn rlo cro bờk-mơsăk. 14Ơ lơ̆gay khwên-kơmom, ăñ sŏng cêh ma ƀòn kon bơh ƀòn kon sŏng gư̆t Bàp. Ơ lơ̆gay cro lơh bàp, ăñ sŏng cêh ma ƀòn ông, bơh ƀòn ông sŏng gư̆t Bơtao tơm bơh sơm. Ơ lơ̆gay cro pơnu ua-drôh, ăñ sŏng cêh ma ƀòn mê bơh lơ̆gay ƀòn mê pran-kơdăng; jơno Yang Tơm Trồ hôm ăm nơ̆m ƀòn mê, gừn ƀòn mê sŏng pha-lĭn dî cro bờk-mơsăk. 15Bư̆ng kơñ-kơloh dunya kŭng ơ̆ gư̆ptî lơ̆gay jini-jơno nhòng dunya. Dilah cro găy kơñ-kơloh dunya gừn jơno kơñ-kơloh Bàp dê ơ̆ ăm nhòng cro rơ̆. 16Bơh lơ̆gay jini-jơno nhòng dunya — gư̆ptî jơno ham-kơñ să-jăn dê, jơno ham-kơñ măt dê, î jơno pơnhừ-să rai dê — ơ̆-iyŏ trôh bơh Bàp mơya la trôh bơh dunya. 17Gừn dunya kŏng roh ha-ău băl î jơno ham-kơñ gô dê. Mơya cro găy lơh-jăt nùs-kơñ Yang Tơm Trồ gừn kư̆ hôm trôh dî miek miek.

18Ơ lơ̆gay khwên-kơmom, jai dô la jơ dơ̆t-lŭi, gừn gư̆ptî ƀòn kon tom kơnău lah cro tơmdră Yang Dŏng-Klàs ndăng trôh, gừn jơ dô khăi cro tơmdră wăl Yang Dŏng-Klàs sŏng tơlôh, gư̆n-jîng ƀòn mơ̆n gư̆t lah jai dô la jơ dơ̆t-lŭi. 19Ƀòn gô tơlôh bơh nhòng ƀòn mơ̆n, mơya ƀòn gô ơ̆ gôtrê ma ƀòn mơ̆n. Bơh dilah gôtrê ma ƀòn mơ̆n, gừn ƀòn gô nên-nôn ngăn la kư̆ pơnjăt ăm băl î ƀòn mơ̆n. Mơya ơ̆-iyŏ tîgư̆n, lơi ƀòn gô kŏng e tơnggư̆t lah ƀòn gô ơ̆ gôtrê ma ƀòn mơ̆n ờ. 20Hôm ƀòn kon gừn dî jơno bŏng mơñà bơh Bơtao sang-goh, gừn ƀòn kon sŏng gư̆t đăl. 21Ăñ sŏng cêh ma ƀòn kon ơ̆-iyŏ bơh ƀòn kon ơ̆ gư̆t jơno tơpăt-ngăn, mơya bơh ƀòn kon sŏng gư̆t jơno tơpăt-ngăn î bơh ơ̆ tom jơno blăc-pơlum găy la tơlôh bơh jơno tơpăt-ngăn. 22Cro găy la cro tơs blăc dilah ơ̆-iyŏ cro khan lơi căư, tơs lah Yang Jesu ơ̆-iyŏ la Yang Dŏng-Klàs? Să tơm cro gư̆n la cro tơmdră wăl Yang Dŏng-Klàs, rơ̆ la cro khan lơi căư Bàp î Kon. 23Cro găy khan lơi căư Yang Kon gừn ơ̆ tom Yang Bàp. Hôm cro don Yang Kon gừn kŭng tom Yang Bàp te. 24Gôtrê mađah pơnah ƀòn kon, lơi cĕ lơ̆gay jơno ƀòn kon sŏng kơnău bơh sơm pơnjăt te ăm nhòng mơ̆n. Dilah jơno ƀòn kon sŏng kơnău bơh sơm kư̆ ăm nơ̆m ƀòn kon, gừn ƀòn kon kŭng rơp ăm nơ̆m Kon î nơ̆m Bàp. 25Gừn dô la jơno hăư mà Kơnràñ sŏng hăư î ƀòn mơ̆n — rơ̆ la jơno jîng miek miek. 26Ăñ sŏng cêh lơ̆gay jơno dô ma ƀòn kon gôtrê bơh lơ̆gay cro pơlum ƀòn kon swà tìs gung. 27Gôtrê mađah pơnah ƀòn kon, jơno bŏng mơñà mà ƀòn kon sŏng dưñ bơh anẵu Kơnràñ hôm ăm nơ̆m nhòng ƀòn kon, gừn ƀòn kon ơ̆ kă lơi du hôi cro găy gư̆n ƀăn mơntău mơ̆n te. Tơblơ̆ wăl, gư̆ptî jơno bŏng mơñà Kơnràñ dê ndăng ƀăn mơntău ƀòn kon bơh lơ̆gay jơno î jơno bơtău gư̆n la jơno tơpăt-ngăn ơ̆-iyŏ la blăc-pơlum, kŭng gư̆ptî sŏng ƀăn mơntău ƀòn kon păl kư̆ ăm nhòng Kơnràñ.

28Jơ dô, ơ ƀòn kon, kư̆ ăm cĕ nhòng Kơnràñ, lơi tơm tô̆ Kơnràñ sơđah să, ƀòn mơ̆n dî nùs khơ̆n-sa gư̆m ơ̆ ƀasmăt sơđàp măt Kơnràñ trôh jơ Kơnràñ trôh. 29Dilah ƀòn kon gư̆t lah Kơnràñ la tơpăt-durư̆ng, gừn ƀòn kon kŭng gư̆t lah lơ̆gay cro lơh jơno tơpăt-durư̆ng gừn bơh Kơnràñ tơlôh.