1 Jăng 3

1Păl lăng Bàp sŏng e jơno kơloh ma ƀòn mơ̆n ơ̆ gư̆t dư̆ng găy, tien gơs ƀòn mơ̆n dî sơnăn la Kon Yang Tơm Trồ, gừn ƀòn mơ̆n ngăn tîgư̆n. Tài bơh jơno dô, dunya ơ̆ gư̆t ƀòn mơ̆n, bơh dunya ơ̆ gư̆t Kơnràñ,. 2Ơ oh mi rôh lŏ kơñ-kơloh ăñ jê, jơ dô ƀòn mơ̆n la kon so Yang Tơm Trồ, hôm ƀòn mơ̆n rơp amơh tîgay gừn hôm dahrăư dî e tơnggư̆t. Ƀòn mơ̆n gư̆t lah tơm tô̆ Kơnràñ tơlôh sơđah, ƀòn mơ̆n rơp gôjîng gư̆ptî Kơnràñ, bơh ƀòn mơ̆n rơp tơmpơl Kơnràñ gư̆ptî Kơnràñ sŏng ờs tom. 3Gừn kơp cro găy dî jơno cang-kơnơm dô anẵu Kơnràñ, gừn lơh dêh să tơm mơ̆n dî sang-goh, gư̆ptî Kơnràñ la sang-goh. 4Kơp cro găy tìs-glài kŭng la lơh jơno tơmdră jơno-bơlăm. Ngăn tîgư̆n, tồi-glài la jơno tơmdră jơno-bơlăm. 5Oh mi rôh lŏ gư̆t lah să tơm Kơnràñ sŏng trôh lơi tơngroh tồi-glài, gừn tồi-glài ơ̆ ăm nơ̆m Kơnràñ. 6Dilah cro găy kư̆ ăm nơ̆m Kơnràñ gừn ơ̆ ăm miek nơ̆m tồi-glài te. Dilah cro găy kư̆ tìs-glài, gừn hôm dahrăư tơmpơl Kơnràñ, kŭng ơ̆ gư̆t Kơnràñ. 7Ơ ƀòn kon, bư̆ng lơi cro găy pơlum ƀòn kon swà tìs gung. Cro găy lơh jơno tơpăt-durư̆ng lah cro tơpăt-durư̆ng, gư̆ptî să tơm Kơnràñ la tơpăt-durư̆ng. 8Cro găy kư̆ tìs-glài la gôtrê ma cà-ràk, bơh cà-ràk sŏng tìs-glài bơh sơm. Tài bơh gư̆n, Kon Yang Tơm Trồ sŏng trôh lơi tơngroh bră cà-ràk dê. 9Dilah cro găy sŏng dî bơda bơh Yang Tơm Trồ gừn kư̆ ơ̆ ăm tìs-glài bơh jơno jîng Kơnràñ dê hôm ăm nhòng cro gư̆n. Î cro gư̆n ơ̆ tom tìs-glài te, tài bơh dî bơda bơh Yang Tơm Trồ. 10Kơnơm jơno dô kon so Yang Tơm Trồ î kon so cà-ràk dî jơno tơmcơlah nê̆-năn: Dilah cro găy ơ̆ lơh jơno tơpăt-durư̆ng la ơ̆ gôtrê ma Yang Tơm Trồ, gư̆m cro ơ̆ kơñ-kơloh oh mi rôh lŏ mơ̆n kŭng tîgư̆n. 11Bơh dô la jơno bơtău mà ƀòn kon sŏng kơnău bơh sơm, rơ̆ la ƀòn mơ̆n păl kơñ-kơloh băl ma găp, 12bư̆ng gư̆ptî Kain, cro gôtrê ma cà-ràk î sŏng tơngsơ̆t oh mơ̆n. Bơh jơno găy mà ông sŏng tơngsơ̆t oh mơ̆n? Rơ̆ la bơh lơ̆gay bră lơh ông dê la bờk-mơsăk, mơya lơ̆gay bră oh ông dê gừn tơpăt-durư̆ng.

13Ơ oh mi rôh lŏ, bư̆ng lơh ndrăt-ndròt dilah dunya tơcao-gơget oh mi rôh lŏ. 14Ƀòn mơ̆n gư̆t lah să tơm mơ̆n sŏng tơlôh bơh jơno sơ̆t lơi mơ̆t nhòng jơno jîng, tài bơh ƀòn mơ̆n kơñ-kơloh oh mi rôh lŏ mơ̆n. Cro găy ơ̆ kơñ-kơloh gừn hôm ăm nhòng jơno sơ̆t. 15Cro găy ngañ oh mi rôh lŏ mơ̆n la cro tơngsơ̆t cro, gừn oh mi rôh lŏ gư̆t lah kơp cro tơngsơ̆t cro ơ̆ dî jơno jîng miek miek ăm nơ̆m să mơ̆n. 16Bơh jơno dô ƀòn mơ̆n gư̆t đăl jơno kơñ-kơloh: rơ̆ la să tơm Kơnràñ sŏng phi jơno jîng Kơnràñ dê bơh ƀòn mơ̆n. Ƀòn mơ̆n kŭng păl phi jơno jîng mơ̆n bơh lơ̆gay oh mi rôh lŏ. 17Mơya cro găy dî jini-jơno nơ̆m dunya î tơmpơl du hôi cro oh mi rôh lŏ mơ̆n kơp kơñ, mà kơl bơkhê nùs mơ̆n î cro oh mi roh lŏ rơ̆, gừn amơh jơno kơñ-kơloh Yang Tơm Trồ dê hôm ăm nơ̆m cro gư̆n dî? 18Ơ ƀòn kon, bư̆ng kơloh bơh î jơno tơs hala băl î anẵu lơm-piet, mơya bơh î jơno lơh gư̆m jơno tơpăt ngăn. 19Kơnơm bơh gư̆n, ƀòn mơ̆n rơp gư̆t lah ƀòn mơ̆n gôtrê ma jơno tơpăt-ngăn gư̆m ƀòn mơ̆n rơp lơh bơkhê nùs mơ̆n sơđàp măt Kơnràñ, 20Bơh dilah nùs ƀòn mơ̆n lơh nên tồi-glài să tơm mơ̆n, gừn Yang Tơm Trồ dơng rlo nùs ƀòn mơ̆n î Kơnràñ gư̆t nê̆-năn lơ̆gay bră gư̆n. 21Ơ oh mi rôh lŏ kơñ-kơloh, dilah nùs ƀòn mơ̆n ơ̆ lơh nên tồi-glài, gừn ƀòn mơ̆n dî jơno khơ̆n-sa trôh î Yang Tơm Trồ. 22Gừn kơp jơno găy ƀòn mơ̆n răc-dăn gừn ƀòn mơ̆n lăñ dî bơh Kơnràñ, bơh ƀòn mơ̆n prăp jư lơ̆gay jơno pơđơ bơlăm Kơnràñ dê gư̆m lơh lơ̆gay jơno niem nùs sơđàp măt Kơnràñ. 23Gừn dô la jơno pơđơ bơlăm Kơnràñ dê, rơ̆ la: ƀòn mơ̆n păl don sơnăn Kon Kơnràñ, la Yang Dŏng-Klàs Jesu; gư̆m kơñ-kơloh găp gư̆ptî Kơnràñ sŏng e jơno pơđơ bơlăm ma ƀòn mơ̆n. 24Cro găy prăp jư lơ̆gay jơno pơđơ bơlăm Kơnràñ dê gừn kư̆ ăm nơ̆m Kơnràñ, gư̆m Kơnràñ ăm nơ̆m cro gư̆n. Gừn kơnơm bơh jơno dô, ƀòn mơ̆n gư̆t lah Kơnràñ hôm ăm nơ̆m ƀòn mơ̆n la bơh Yang Hwîng Goh mà Kơnràñ sŏng e ma ƀòn mơ̆n.