2 Pier 2

1Bulah tîgư̆n, gư̆ptî cro gơnoăr-hwơr mablăc sŏng ăm nhòng lang bol, gừn lơ̆gay cro bơtău mablăc kŭng rơp ăm nhòng oh mi rôh lŏ, rơ̆ la tơmpôl cro rơp mòc sơlèt iyà jơno duh-khoai tìs tơngroh gư̆m bơh khan lơi Cro Pơnhơm sŏng tăc tơwai mơ̆n, gư̆n tơwai dưñ dêh jơno tơngroh khơñ ngăn. 2Khăi cro rơp lơh-jăt lơ̆gay jơno ham-kơñ lîng-lang ƀòn gô dê, mà bơh tơmpôl cro gư̆n mà jơno niem jơno tơpăt ngăn dê rơp kŏng tơngyŏ-tơnghiel. 3Bơh nùs ham-kơñ, bơh ngui jơno mablăc, ƀòn gô rơp pơlum lơi sa kalăp oh mi rôh lŏ, mà jơno lơh-glài ăn lơi ma ƀòn gô bơh lai ƀua hôm dahrăư ha-ău gơnoăr, gư̆m jơno tơngroh ƀòn gô dê ơ̆ tom bĭc. 4Bơh dilah Yang Tơm Trồ sŏng ơ̆ hồ glài lơ̆gay cro gơndrơh tìs-glài, mơya mbư̆ng nơ̆m trôm jrô kŏng săy-srê̆ anẵu kơnăm ñô̆ng dê, Kơnràñ jao phi lơ̆gay cro kŏng cơkhă jư gư̆n ma jơno cahrña; 5Kơnràñ sŏng kŭng ơ̆ hồ glài dunya bơh rai yo ƀua, mơya lăng jư pham hê cro, tom Nôe, la cro bơtău tơngkah jơno tơpăt-durư̆ng, tơm tô̆ Kơnràñ tơngduh dà mih rlîng jư nơ̆m dunya lơ̆gay cro ơ̆ don dê; 6gừn tơm tô̆ su lơ̆gay ƀòn dơng Sôđôm î Gômôrơ jîng kơ̆mbui buh, Kơnràñ sŏng lơh nên glài jơno kŏng tơngroh, lơh jơno sơntu bơh lơ̆gay jơno găy rơp tơmtom trôh ma lơ̆gay cro ơ̆ don-duh; 7mà Kơnràñ sŏng dŏng-kơl Lot la cro tơpăt-durư̆ng, tơm jơ ndăng kŏng jê-sồt bơh jơno ham-kơñ nơ̆m jơno sơlăp-sơbêl tơmpôl lîng-lang, 8(bơh cro tơpăt-durư̆ng dô tơm tô̆ jîng nge dô găn nge năy nhòng ƀòn gô sŏng kŏng lơh gleh nơ̆m hwîng-soan jơno tơpăt-durư̆ng mơ̆n dê bơh tơmpơl gư̆m kơnău lơ̆gay bră bờk-mơsăk); 9gừn Yang gư̆t lơh mơmơh tîgay dŏng-klàs cro don kơ̆mbrit klàs bơh jơno lòng î kơ̆p jư cro ơ̆ tơpăt-durư̆ng lơi kŏng lơh-glài nơ̆m nge cahrña, 10mà lai ngăn gôtrê ma tơmpôl cro sơh nùs nơ̆m lơ̆gay jơno ham-kơñ sơmơ̆-sơmĭñ jăt să-jăn î lăng ơ̆săp-ơ̆său gơnoăr ăt-bồ. Tơmpôl blăc blơ̆ kơdăng găl măñ ngkău, ƀòn gô ơ̆ ƀasmăt tơm tô̆ tơs tơngyŏ-tơnghiel lơ̆gay bơtao gơklŏ; 11tơm jơ lơ̆gay cro gơndrơh dî gơnoăr-pran gư̆m gơnăp-gơnoăr dơng rlo ơ̆ tom tơs tơlôh jơno cahrña tơngyŏ-tơnghiel, tơmdră wăl lơ̆gay bơtao gư̆n sơđàp măt Yang. 12Hôm ƀòn dô, gư̆ptî lơ̆gay jơno puôn jư̆ng ơ̆ dî tơngoh, ờs dî bơda lơi kŏng kơ̆p î kŏng tơngroh, lơh sơmăm tìs lơ̆gay jơno mà ƀòn gô ơ̆ wơng gư̆t, ƀòn gô kŭng rơp kŏng tơngroh gư̆ptî jơno tơngroh lơ̆gay jơno puôn jư̆ng năy, 13tơm tô̆ kŏng kla jăt jên-priè jơno ơ̆ tơpăt-durư̆ng, bơh lăng jơno sơhờp-sờhơn gư̆ptî bră ñô sa lîng-lang nơ̆m brê tơnge; ƀòn gô la lơ̆gay têl sơmơ̆-sơmĭñ gư̆m ƀasmôh ƀasmăt, hơn-sờ nơ̆m jơno blăc blơ̆ mơ̆n dê tơm tô̆ ngui băl jơno ñô sa î oh mi rôh lŏ; 14tom lơ̆gay gơ-măt bîng jơno rês-àr bơnan gư̆m ơ̆ bơdê ngơ lăng nê̆ nơ̆m jơno tồi-glài, pơlum lơ̆gay hwîng-nùs ơ̆ kơđư̆ng-bơkhê lơh bră tìs, gư̆m tom nùs-nhơ̆m dî bơtê jơno ham-kơñ, la kon so jơno kŏng sràt-rma. 15Bơh lơi căư gung dà tơpăt-durư̆ng, ƀòn gô kŏng kơ̆mprah-kơ̆mprĭng tơm tô̆ swà jăt gung dà Ƀalaam dê, kon klo Beô, cro ham-kơñ jên-priè jơno ơ̆ tơpăt-durư̆ng. 16Mơya gô sŏng kŏng jơno ƀoah-đas bơh tồi-glài mơ̆n dê — du alang kơmblău sŏng cơkhă jơno mòs sơnrăng cro gơnoăr-hwơr dê tơm tô̆ tơs bơh jơno tơs kon-mơnùs. 17Ƀòn dô la sơdieng ơ̆ tom dà gừn la dà tơjôh kŏng cal rbơ̆t pôh swà, la tơmpôl cro mà anẵu ñô̆ng kơnăm-kơnom sŏng dî rcăng lai. 18Bơh, tơm tô̆ tơs lơ̆gay jơno tơngyeh să hwơng gời, bơh jơno ham-kơñ lîng-lang să-jăn, ƀòn gô pơlum tơmpôl cro găy mhăy klàs bơh tơmpôl cro ndăng jîng nơ̆m jơno tìs kơ̆mprah, 19hăư jơno khăt-gơboh ma tơmpôl ƀòn gư̆n, tơm jơ sătan ƀòn gô la cro lơh dê̆ nơ̆m jơno ôm-lề. (Bơh cro găy kŏng jơno găy pha-lĭn rlo, gừn cro rơ̆ kŏng lơh dê̆ ma jơno gư̆n.) 20Bơh dilah sŏng klàs bơh jơno ôm-lề dunya dê kơnơm bơh jơno đăl gư̆t Yang î Yang Dŏng-Klàs ƀòn mơ̆n, la Yang Dŏng-Klàs Jesu, mơya kŏng kađòng wăl nơ̆m gư̆n du dơ̆ te, gừn tơmpôl ƀòn gư̆n sŏng kŏng alah, mà jơno ma-ngkơi dô î ƀòn gôjîng bờk rlo ma bơh sơm. 21Ngăn la jơno niem rlo ma ƀòn gô tơm tô̆ ơ̆ gư̆t gung dà jơno tơpăt-durư̆ng rlo la gư̆t lờt mà tơmblăc să î jơno-bơlăm sang-goh sŏng dî tơs ma mơ̆n. 22Jơno tơpăt-ngăn jơno pơ̆nđĭk dô sŏng tom tơlôh ma ƀòn gô lah: “Său sa wăl jơno ŏ lờt” gừn “sư ơ̆m lơhiê lờt lăm wăl nơ̆m bŏ.”