2 Pier 1

1Simôn Pier, cro dê̆-gơna gư̆m cro gơnoăr bơtău dơng Yang Dŏng-Klàs Jesu, pơyoa tơmpôl cro sŏng dưñ-lăñ băl du jơno don dơng mang gư̆ptî ƀòn hî nơ̆m jơno tơpăt-durư̆ng Yang Tơm Trồ dê î Yang Dŏng-Klàs ƀòn mơ̆n, la Yang Dŏng-Klàs Jesu: 2Dăn jơno sơmah î jơno lơngăp-lơnge sơlơ nge sơlơ bơtăl te ma oh mi rôh lŏ nơ̆m jơno đăl gư̆t Yang Tơm Trồ î Yang Jesu, Yang ƀòn mơ̆n. 3Bơh sŏng dờp ma ƀòn mơ̆n lơ̆gay jơno gôtrê trôh mađah jơno jîng gư̆m jơno kingam jăt jơno gơnăp-gơnoăr Kơnràñ dê, kơnơm bơh jơno đăl gư̆t Bơtao sŏng hôi-săc ƀòn mơ̆n bơh jơno gơklŏ î jơno dơng mang rlo lơ̆ Kơnràñ dê, 4mà kơnơm bơh jơno gơklŏ jơno dơng mang rlo lơ̆ gư̆n, Kơnràñ sŏng dờp ma ƀòn mơ̆n lơ̆gay jơno hăư pơngon mang ngăn gư̆m dơng mang, lơi kơnơm bơh gư̆n oh mi rôh lŏ dî gôjîng tơmpôl cro dî pơnah băl nơ̆m nùs lơbăn-niem Yang Tơm Trồ, klàs bơh jơno ôm-lề nơ̆m dunya bơh nùs ham-kơñ, 5gư̆n-jîng kŭng bơh jơno gư̆n, ma-ngkơi jơ dưñ jơh lơ̆gay jơno jơdeh-jơdai ngăc-ngăr, oh mi rôh lŏ păl bơtăl jơno don mơ̆n lơbăn-niem; bơtăl ma jơno lơbăn-niem jơno jăk-sai; 6bơtăl ma jơno jăk-sai jơno gư̆t kơhea-să; bơtăl ma jơno gư̆t kơhea-să jơno kŏng-ăt; bơtăl ma jơno kŏng-ăt jơno don kingam; 7bơtăl ma jơno don kingam nùs kơñ-kơloh oh mi rôh lŏ; bơtăl ma nùs kơñ-kơloh oh mi rôh lŏ jơno kơñ-kơloh. 8Bơh tơm tô̆ lơ̆gay jơno gư̆n ndăng tom gư̆m dî tơngkah-tơngkăñ nơ̆m oh mi rôh lŏ, gừn bră tom tơlôh ma oh mi rôh lŏ ơ̆-iyŏ la jơno rău-răñ hala ơ̆ tơlôh công nha nơ̆m jơno đăl gư̆t Yang ƀòn mơ̆n la Yang Dŏng-Klàs Jesu. 9Bơh lơ̆gay jơno gư̆n hôm dahrăư tom nơ̆m cro găy, gừn cro rơ̆ kŏng teh măt, ñô̆ng măt, hwơbê̆ jơno rao lơhiê lơ̆gay tồi-glài mơ̆n bơh lai. 10Tîgư̆n, ơ oh mi rôh lŏ, păl ngăc-ngăr rlo te lơi lơh kơđư̆ng-bơkhê jơno hôi-săc gư̆m jơno săc-rwơh mơ̆n dê, bơh tơm tô̆ lơh jăt lơ̆gay jơno gư̆n, oh mi rôh lŏ nên-nôn ngăn rơp ơ̆ dơ̆ găy sơ̆ndăc-duh. 11Kơnơm bơh gư̆n, bră lơbà mơ̆t nơ̆m lơgơ ăm miek miek Yang dê gư̆m Yang Dŏng-Klàs ƀòn mơ̆n, la Yang Dŏng-Klàs Jesu, rơp dî pẵư dubă dơng ơnàng ma oh mi rôh lŏ.

12Gư̆n-jîng, ăñ rơp rcăng nùs tơngkah oh mi rôh lŏ bơh lơ̆gay jơno gư̆n bulah oh mi rôh lŏ gư̆t lờt gư̆m dî lơh kơđư̆ng-bơkhê nơ̆m jơno tơpăt-ngăn ndăng tom nơ̆m anẵu oh mi rôh lŏ. 13Mơya dilah ăñ hôm ăm nơ̆m kơjang bơdơh dô jŏ trôh dư̆ng găy, ăñ kơlôi jơno dî păl ngăn păl lơh la pơjô̆ oh mi rôh lŏ bơh bră tơs tơngkah, 14bơh gư̆t lah bră bŭi kơjang bơdơh ăñ dê la jơno mơñ tom tơlôh, gư̆ptî Yang ƀòn mơ̆n, Yang Dŏng-Klàs Jesu kŭng sŏng rang sơđah ma ăñ. 15Bulah tîgư̆n, ăñ kŭng rơp grat pran nơ̆m lơ̆gay kơp jơno, lơi lơh ma oh mi rôh lŏ kah sơdơ lơ̆gay jơno dô ma-ngkơi jơno sang rai ăñ dê. 16Bơh ƀòn hî ơ̆ rang sơđah ma oh mi rôh lŏ bơh jơno tơngkơt lơh-jăt lơ̆gay bră kơlôi-bip jăt jơno tơs bơceh bơh jơno gơnăp-gơnoăr î jơno sơđah-să Yang ƀòn mơ̆n, la Yang Dŏng-Klàs Jesu, mơya bơh sŏng gôjîng tơmpôl cro ƀăt sơmăt lơh cư̆ng-tang jơno ryŭ-ryơ̆m să tơm Kơnràñ. 17Bơh Kơnràñ sŏng dưñ-lăñ jơno kingam î jơno gơklŏ bơh Yang Tơm Trồ, la Bàp, tơm tô̆ jơno tơs dô sŏng dî tơs tơnggư̆t gôtrê bơh Kơnràñ bơh Bơtao Gơnăp-Gơnoăr Gơklŏ: “Dô la Kon Ăñ, Kon kơñ-kơloh Ăñ jê, Ăñ niem-nùs ngăn bơh Kon gư̆n.” 18Să tơm ƀòn hî kŭng kơnău jơno tơs gư̆n dî tơs tơnggư̆t bơh trồ, tơm jơ ndăng ăm î Kơnràñ nơ̆m yồ sang-goh. 19Gư̆n-jîng, ƀòn hî dî jơno tơs hwơr nên-nôn ngăn, la jơno mà oh mi rôh lŏ ndăng lơh iyŏ ngăn tơm tô̆ kơlôi trôh, gư̆ptî lăng oềs đeng bơang nơ̆m anẵu kơnăm-kơnom, trôh dî jơ brê-ang ndrư̆m tơlôh gừn sơmăñ ang tơlôh nơ̆m nùs oh mi rôh lŏ, 20bơh gư̆t jơno dô lai ngăn, lah lơ̆gay jơno tơs hwơr nơ̆m Sră-Goh ơ̆-iyŏ trôh bơh jơno tơs tơlôh dêh du hôi cro găy. 21Bơh ơ̆ dơ̆ găy tom jơno tơs hwơr găy dî tơs tơlôh bơh nùs-kơñ kon-mơnùs, mơya tơm tô̆ dî tề-lăm bơh Yang Hwîng Goh, cro sŏng tơs tơlôh bơh Yang Tơm Trồ.