2 Kôrintô 12:9

1Rơ̆ la păl tơngyeh să mơ̆n, bulah ơ̆ iyà dî jơno kwơ găy, mơya ăñ rơp tơs te bơh lơ̆gay jơno e tơmpơl lai gư̆m lơ̆gay jơno tơs e tơnggư̆t Yang dê. 2Ăñ gư̆t du hôi cro nơ̆m Yang Dŏng-Klàs, jư̆t-puôn năm lai — tom nơ̆m să-jăn hala ơ̆h, ăñ ơ̆ gư̆t, hala makin să-jăn, ăñ ơ̆ gư̆t, Yang Tơm Trồ gư̆t — du hôi cro tîgư̆n sŏng dî iyà lêh cŭngsî dăp trồ dơ̆ păy. 3Ăñ sŏng gư̆t du hôi cro tîgư̆n — bulah nơ̆m să-jăn hala makin să-jăn, ăñ ơ̆ gư̆t, mơya Yang Tơm Trồ gư̆t — 4lah cro gư̆n sŏng dî iyà trôh nơ̆m Paradi gừn sŏng kơnău lơ̆gay jơno ơ̆ rgê tơs mà kŭng ơ̆ e gơnoăr du hôi cro găy tơs. 5Gôtrê bơh du hôi cro tîgư̆n, ăñ rơp tơngyeh. Mơya gôtrê bơh să tơm ăñ, ăñ rơp ơ̆ tơngyeh jơno găy, rlo lơ̆gay jơno lơbăn-lơñô ăñ dê. 6Bơh dilah ăñ kơp kơñ tơngyeh, gừn ăñ rơp ơ̆-iyŏ la wì-lơngôh, bơh ăñ rơp tơs jơno ngăn, mơya ăñ ăt-ăl wăl, lơi ơ̆ cro găy kơlôi bơh ăñ yơng rlo jơno cro rơ̆ tơmpơl dî anẵu ăñ hala kơnău bơh ăñ. 7Gư̆n-jîng, lơi ăñ ơ̆ pơnhừ-să bơh jơno dơng mang phadêh lơ̆gay jơno tơs e tơnggư̆t, ăñ sŏng dưñ du-lăm lẵu wơ̆t nơ̆m rlău ăñ — du hôi cro kŏng pơđơ cà Satan dê — lơi gô digơlăn lơh bờk ăñ, lơi e ăñ ơ̆ pơnhừ-să. 8Bơh bră dô, ăñ sŏng răc-dăn Yang păy dơ̆ lơi Kơnràñ lơh jơno gư̆n tơlôh bơh ăñ. 9Tîgư̆n mà Kơnràñ sŏng kla wăl dẵư î ăñ: “Jơno sơmah Ăñ dê la tăl ma kon lờt, bơh gơnăp-gơnoăr Ăñ dê dî lơh wêl-tăl nơ̆m jơno lơbăn-lơñô.” Gư̆n-jîng, ăñ rơp sơhờp ngăn tơngyeh rlo te nơ̆m jơno lơbăn-lơñô mơ̆n dê, lơi ma jơno gơnăp-gơnoăr Yang Dŏng-Klàs kư̆ ăm cŭngsî ăñ. 10Gư̆n-jîng, tài bơh Yang Dŏng-Klàs, ăñ niem nùs nơ̆m lơ̆gay jơno lơbăn-lơñô, tơngyŏ-tơnghiel, jơno rŭng-rai, lơh bờk-mơsăk, sơ̆t-roh, bơh jơ găy ăn lơbăn-lơñô, gừn jơ rơ̆ ăñ pran-kơdăng.

11Ăñ sŏng gôjîng wì-lơngôh; să tơm oh mi rôh lŏ sŏng rôn-bơklơ̆n ăñ tîgư̆n, Bơh ăñ ờs dî oh mi rôh lŏ mơnê, bơh ăñ ơ̆ prŏi du jơno găy bơh lơ̆gay “cro gơnoăr bơtău dơng” năy, bulah ăñ tien gơs la ơ̆ nino găy ờ. 12Lơ̆gay jơno têl du hôi cro gơnoăr bơtău dơng sŏng dî e tơmpơl nhòng oh mi rôh lŏ î lơ̆gay jơno kŏng-ăt — băl î jơno têl phadêh-phadai gư̆m gơnoăr phadêh, băl î lơ̆gay bră gơnăp-gơnoăr. 13Bơh jơno găy la jơno mà oh mi sŏng kŏng lơh ơ̆ niem rlo lơ̆gay Hîh Jư̆m Goh nde, nư̆ng sî jơno să tơm ăñ ơ̆ lơh tơng-añ kơjơ̆ ma oh mi rôh lŏ? Lơi cĕ bră lơh tìs dô ăñ dê!

14Lăng cĕ dô, ăñ ndăng rcăng swà trôh ma oh mi rôh lŏ dơ̆ păy dô, gừn ăñ rơp ơ̆ lơh jơno tơng-añ kơjơ̆ ma oh mi rôh lŏ. Bơh ăñ ơ̆ jôi jơno găy bơh oh mi rôh lŏ ờ, mơya la jôi nư̆ng să tơm oh mi rôh lŏ. Bơh ơ̆-iyŏ kon so ăn prăp lơi ma mơi bàp, mà mơi bàp ăn prăp lơi ma kon so. 15Hôm ăñ rơp sơhờp-sờhơn ngăn kŏng roh pran, tien gơs roh lơ̆gay tài bơh hwîng-soan oh mi rôh lŏ. Tom iyŏ tơm tô̆ ăñ kơñ-kơloh oh mi rôh lŏ khăi rlo te, gừn jơno oh mi rôh lŏ kơñ-kơloh jîng êt lŭi? 16Mơya kư̆ lơi tîgư̆n, să tơm ăñ ơ̆ lơh tơng-añ kơjơ̆ ma oh mi rôh lŏ, mơya, bơh la cro jăk lăc-leo, gư̆n-jîng ăñ sŏng tơmtom măt oh mi rôh lŏ î jơno blăc pơlum. 17Rơ̆ du hôi cro gư̆n, la cro ăñ pơđơ trôh î oh mi rôh lŏ, ăñ sŏng pơđơ bơh cro rơ̆ pơlum oh mi rôh lŏ? 18Ăñ sŏng tơngkah Tit î pơđơ du hôi oh mi nde swà băl î gô. Gừn tom iyŏ Tit sŏng pơlum oh mi rôh lŏ ya? Ƀòn hî lơbà swà ơ̆ du nùs băl ơ̆h? Ơ̆ swà jăt băl lơ̆gay têl jư̆ng ơ̆h?

19Bơh lai trôh dô, tơm iyŏ oh mi rôh lŏ kơlôi lah ƀòn hî ndăng tơmpẵu dêh sătan î oh mi rôh lŏ? Ƀòn hî la ndăng tơs sơđàp măt Yang Tơm Trồ nơ̆m Yang Dŏng-Klàs. Mơya, ơ oh mi kơñ-kơloh, jơh lơ̆gay jơno dô la bơh jơno kwơ ma bră băt bơtao oh mi rôh lŏ. 20Bơh ăñ kơ̆mbrit lah ma-ngkơi jơ ăñ trôh, ăñ ơ̆ tơmpơl oh mi rôh lŏ dî gư̆ptî ăñ kơp kơñ, ăñ kŭng ơ̆ dî oh mi rôh lŏ tơmpơl ăñ gư̆ptî oh mi rôh lŏ kơp kơñ; digơlăn ngăn rơp tom jơno tơmbơkai, tơmngañ, dôh nùs, jơno tơmlơh-tơmpìt, tơs bờk, tơmbơcĕ, pơnhừ-să, î jơno sơlô̆ng-sơlăng. 21Ăñ kơ̆mbrit lah ma-ngkơi jơ ăñ trôh du dơ̆ te, Yang Tơm Trồ ăñ jê digơlăn lơh ăñ ƀasmăt sơđàp oh mi rôh lŏ, î ăñ digơlăn rơp moat-jrum ma khăi cro nơ̆m lơ̆gay cro tìs-glài sŏng ơ̆ tơcao mbư̆ng glài bơh jơno sơmơ̆-sơmĭñ, rês-àr bơnan î lơh ală-alai mà ƀòn gô sŏng lơh tìs.