1 Timôthe 6

1Kơp cro găy ndăng ăm nteàh yô ngăl dê̆-gơna, păl lăng cro pơnhơm mơ̆n la păl jơh nùs kingam, lơi sơnăn Yang Tơm Trồ î jơno ƀăn mơntău ơ̆ kŏng tơngyŏ-tơnghiel. 2Pơnah nde, lơ̆gay cro dê̆-gơna dî tơmpôl cro pơnhơm la cro don Yang, ơ̆ dî tài bơh gô la oh mi mà lăng ơ̆săp-ơ̆său, mơya păl duh bră khăi rlo te, bơh ƀòn gô la cro don Yang î cro dî kơñ-kơloh, cro dưñ-lăñ jơno duh bră. Kon păl ƀăn mơntău î tơngkah lơ̆gay jơno rơ̆.

3Dilah cro găy ƀăn mơntău gung duh-khoai nde gư̆m ơ̆ don jăt lơ̆gay jơno dî kwơ, rơ̆ la jơno tơs Yang ƀòn mơ̆n dê, la Yang Dŏng-Klàs Jesu, băl î jơno bơtău pơđơ gôtrê bơh jơno don-duh, 4gừn cro gư̆n la cro pơnhừ-să, ơ̆ gư̆t wơng jơno găy, mà dî nùs kơp kơñ kòp jê nơ̆m nhòng bră tơmbơkai î tơmlơh bơh jơno pha-lĭn, bơh gư̆n gôjîng tơm jơno tơmngañ, tơmpìt, tơs bờk, kơlôi-sơnư̆ng bờk, 5ơ̆ tơmrơm băl, nhòng tơmpôl cro kŏng ôm-lề nơ̆m tơngoh î kŏng prŏi ha-ău jơno-tơpăt, lăng jơno don-duh la jơno jôi công nha.

6Mơya jơno don-duh băl î jơno niem-nùs la công nha dơng. 7Bơh ƀòn mơ̆n ơ̆ iyà jơno găy mơ̆t nơ̆m dunya, gư̆n-jîng ƀòn mơ̆n kŭng ơ̆ digơlăn iyà dî jơno găy swà dî. 8Pơnah nde, tơm tô̆ dî jơno sa, ôi-ao, gừn ƀòn mơ̆n rơp dî niem-nùs î lơ̆gay jơno rơ̆. 9Hôm tơmpôl cro kơñ sơlôh gôjîng kơnhơ̆p-mơ̆nda gừn tơmơ̆t nơ̆m jơno pơlum î jơno ƀai kơ̆ndăp, î khăi jơno ham-kơñ wì gơla, roh-rùi, rơ̆ la lơ̆gay jơno tơmơ̆t cro nơ̆m jơno roh gời î roh làt. 10Bơh tơm reh wêl-tăl kơp jơno bờk-mơsăk la ham-hà jên-priè, mà du pơnah cro, bơh kơp kơñ dî gô, sŏng kŏng pơlum tơlôh bơh sơ jơno don gừn lơh ma sătan gô khăi jơno sơòs-sơngeh.

11Mơya ơ kon, cro Yang Tơm Trồ dê, pleh wĭc cĕ lơ̆gay jơno gư̆n, mà tơte jăt jơno tơpăt-durư̆ng, jơno don-duh, jơno don, jơno kơñ-kơloh, nùs ăt-ăl, î niem-lơhơn. 12Tơmlơh cĕ nhòng jơno tơmlơh niem-lơhơn jơno don dê, jư bơkhê cĕ jơno jîng miek miek, la jơno mà kon sŏng dî hôi jà trôh gừn sŏng tơs tơlôh jơno tơs niem sơđàp măt khăi cro lơh cư̆ng. 13Ăñ e gơnoăr pơđơ ma kon sơđàp măt Yang Tơm Trồ, Bơtao lơh ma lơ̆gay jơno dî jîng, î sơđàp măt Yang Dŏng-Klàs Jesu, Bơtao tơs tơlôh jơno tơs niem sơđàp măt Ƀônsơ Pilat, 14lah kon păl prăp jư jơno pơđơ bơlăm dô dubă wêl-tăl, ơ̆ tom anẵu găy ƀoah-đas dî, trôh dî nge sơđah tơlôh Yang ƀòn mơ̆n, la Yang Dŏng-Klàs Jesu, 15la Bơtao mà Yang Tơm Trồ Dơng Rlo păl jong-rơ gư̆m nư̆ng dul, la Bơtao lơ̆gay Bơtao î la Yang lơ̆gay Yang, rơp rang sơđah nơ̆m ñăm tô̆ tơnge, 16nư̆ng du hôi Kơnràñ jîng miek ơ̆ sơ̆t, ăm nhòng jơno ang ơ̆ trôh en dî, la Bơtao ơ̆ cro găy lăng tơmpơl, kŭng ơ̆ cro găy digơlăn tơmpơl dî; dăn jơno kingam î jơno gơnăp-gơnoăr miek miek gôtrê ma Kơnràñ. Amen.

17Bơtău tơngkah cĕ cro kơnhơ̆p nơ̆m rai dô bư̆ng pơnhừ-să, kŭng bư̆ng cang-kơnơm anẵu jên-priè ơ̆ nê̆-năn, mà cang-kơnơm cĕ anẵu Yang Tơm Trồ, Bơtao e ma ƀòn mơ̆n lơ̆gay jơno dubă tơngkah-tơngkăñ lơi sơhờp-sờhơn, 18î pơđơ ƀòn gô lơh jơno niem, tơngkah-tơngkăñ nơ̆m bră niem, dî nùs sơmah-sơmai, rcăng tơmpà, 19ăn lơi ma să tơm mơ̆n du mơnang niem-lơhơn ma lơ̆gay jơno mơñ trôh, lơi ƀòn gô digơlăn jư bơkhê jơno jîng ngăn.

20Ơ Timôthe, kon lăng jư cĕ jơno dî jao ma kon, pleh cĕ lơ̆gay jơno lîng-lang sơmơ̆-sơmĭñ jăt dunya, î lơ̆gay jơno tơmbơkai sơnăn dêh gô la jăk-sai, 21mà du pơnah cro, bơh tơs tơnggư̆t tîgư̆n, sŏng swà tơblơ̆ wăl jơno don.

Dăn jơno sơmah ăm băl î lơ̆gay oh mi roh lŏ.