1 Timôthe 5

1Bư̆ng kơjơ̆ dẵư î tơmpôl ông dơng năm, mơya păl ƀăn tơngkah ƀòn gô gư̆ptî bàp, cro pơnu gừn gư̆ptî oh mi, 2tơmpôl mò dơng năm gừn gư̆ptî mơi, lơ̆gay cro-ua drôh gừn gư̆ptî rôh lŏ, nơ̆m jơno sang-goh wêl-tăl.

3Kingam cĕ lơ̆gay cro mơ̆ndro — lơ̆gay cro mơ̆ndro ngăn. 4Mơya dilah cro-ua mơ̆ndro găy dî kon hala so, gừn lai ngăn kon so ƀòn gô păl bơtê lơi kingam cro hîh nhă mơ̆n dê, î e nùs tăm wăl ma cro lơh mơi lơh bàp gư̆n, bơh dô la jơno iyŏ ngăn sơđàp măt Yang Tơm Trồ. 5Mơya, cro-ua mơ̆ndro ngăn gừn nư̆ng du hôi mơ̆n, gừn ăm cang-kơnơm anẵu Yang Tơm Trồ, î jơh nùs nơ̆m jơno răc-dăn î hôi-dăn tơnge-tơmăng. 6Hôm cro jôi jăt jơno sơhờp-sờhơn gừn sŏng sơ̆t, bulah la hôm jîng. 7Kŭng tơs wăl cĕ lơ̆gay gơnoăr pơđơ dô, lơi ƀòn gô digơlăn ơ̆ tom anẵu găy ƀoah-đas dî. 8Mơya dilah cro găy gư̆n ơ̆ rcăng ma cro găp să gô, mà lai ngăn la cro hîh nhă gô, gừn cro rơ̆ sŏng khan lơi căư jơno don î la cro bờk rlo ma cro ơ̆ don.

9Du hôi cro-ua mơ̆ndro păl dî cêh sơnăn gừn ơ̆ êt rlo pro-jư̆t năm, la bo-ua nư̆ng du hôi bo-klo, 10dî swì lăng bơh lơ̆gay bră niem; mò tom rong-siem kon so ya, mò tom wă-rẵu năc ya, mò tom rao jư̆ng lơ̆gay cro sang-goh ya, mò tom tơmdŏng cro gleh-glăr ya, mò tom jơh nùs î lơ̆gay bră niem ya.

11Mơya khan cĕ lơ̆gay cro-ua mơ̆ndro hôm kơmom, bơh tơm tô̆ lơ̆gay jơno ham-kơñ kơp kơñ ñă tơmdră î Yang Dŏng-Klàs, gừn ƀòn gô rơp kơñ tơmhòp wăl, 12dưñ-lăñ jơno cahrña bơh ƀòn gô sŏng lơi căư jơno tơm hăư-băl bơh sơm mơ̆n dê. 13Mơya, ƀòn gô kŭng rơp dơm nơ̆m jơno alah-atà, kư̆ swà lơ̆ hîh dô hîh dă, mà ơ̆ nư̆ng jơno dơm alah-atà, mơya hôm tơs tơmhồc î kơñ sơlah nơ̆m bră cro nde, tơs lơ̆gay jơno ơ̆ păl tơs. 14Gư̆n-jîng, ăñ kơñ lơ̆gay cro-ua mơ̆ndro hôm kơmom jôi bo cĕ, bơda kon, rong-siem hîh nhă mơ̆n, lơi ơ̆ lơh tô̆ lơwah ma cro lơh bờk tơngyŏ-tơnghiel. 15Bơh du pơnah cro sŏng tơmcơlah swà jăt Satan lờt.

16Dilah cro-ua don jăt Yang găy dî cro-ua mơ̆ndro nhòng hîh, gừn tơmdŏng cĕ ƀòn gô, î bư̆ng lơi Hîh Jư̆m Goh kŏng jơno kơjơ̆, lơi ma Hîh Jư̆m Goh digơlăn tơmdŏng lơ̆gay cro-ua mơ̆ndro ngăn.

17Lơ̆gay cro kwăng kra găy jăk ăt-bồ dî lăng la păl kingam lơ̆gay jơno, lai ngăn la tơmpôl cro kŏng sơòs-sơngeh nhòng Jơno Yang î jơno ƀăn mơntău. 18Bơh Sră-Goh bơtău: “Mê bư̆ng kơtrơ̆p kơ̆mbung lamău tơm tô̆ gô ndăng jă kôi,” gừn “Cro lơh bră dî păl î jên tơnge mơ̆n dê.” 19Bư̆ng dưñ-lăñ jơno yă yom tơmdră wăl du hôi cro kwăng kra, dilah ơ̆ tom bea hala păy hê cro lơh cư̆ng. 20Ƀoah-đas cĕ cro tìs-glài sơđàp măt lơ̆gay cro lơi tơmpôl cro hôm wăl digơlăn kŭng gư̆t kơ̆mbrit. 21Ăñ jơh nùs ƀăn tơngkah kon sơđàp măt Yang Tơm Trồ î Yang Dŏng-Klàs Jesu, băl î lơ̆gay cro gơndrơh dî săc-rwơh, lah kon păl prăp jư lơ̆gay gơnoăr pơđơ dô mà ơ̆ ping ngglăm tơngoh î kŭng ơ̆ lơh jơno găy bơh jơno tơmpẵu.

22Bư̆ng kađa ăn tê cŭngsî cro găy, kŭng bư̆ng dubă băl nơ̆m tồi-glài cro nde. Jư cĕ sătan mơ̆n sang lơhiê.

23Kon bư̆ng ñô sî dà gời, mà ñô cĕ dư̆ng-iè alăk tài bơh klô̆ng kon î lơ̆gay jơno kòp jê kư̆ tơmtom.

24Tồi-glài du pơnah cro gừn nê̆-năn, iyà trôh anẵu jơno kŏng cahrña, mơya kŭng tom lơ̆gay glài dî tơs tơlôh makin ma-ngkơi jơ kŏng cahrña. 25Jăt gư̆p tîgư̆n, kŭng tom lơ̆gay bră niem gừn lơh nê̆-năn, hôm lơ̆gay bră ơ̆ tơs tơlôh gừn ơ̆ dî kư̆ ămpôn ndăp.