1 Timôthe 4

1Yang Hwîng tơs nê̆-năn lah nơ̆m tô̆ tơnge ma-ngkơi dô, khăi cro rơp lơi căư jơno don, kơnău jăt lơ̆gay jơno cà pơlum î gung duh-khoai cà-ràk dê, 2bơh jơno ma blăc tơmpôl blăc blơ̆, nùs-nhơ̆m tơmpôl ƀòn gư̆n kŏng kră kơdăng, 3tơm tô̆ khă bră tơmhòp bo, dăn ăt sa lơ̆gay jơno sa mà Yang Tơm Trồ mon bơjîng lơi dưñ-lăñ î nùs gư̆t ưnngai bơh cro don-kơnơm î wơng gư̆t jơno tơpăt-ngăn. 4Bơh lơ̆gay jơno bơh Yang Tơm Trồ bơjîng la niem lơhơn, gừn ơ̆ tom jơno găy păl mbư̆ng lơi căư tơm tô̆ dî dưñ-lăñ bơh î nùs ưnngai, 5bơh jơno sa dî lơh sang-goh kơnơm bơh jơno tơs Yang Tơm Trồ î jơno hôi-dăn.

6Tơm tô̆ ăn lơ̆gay jơno gư̆n sơđàp măt oh mi rôh lŏ, kon rơp la cro dê̆-gơna lơbăn-niem Yang Dŏng-Klàs Jesu dê, dî rong-siem bơh jơno don î bơh jơno bơtău niem-lơhơn mà kon sŏng don jăt. 7Mơya lơi căư cĕ lơ̆gay bră dơm lơh lîng-lang tơmpôl mò kra dê. Ala sơgư̆n, bơtê cĕ sătan mơ̆n nhòng jơno don-duh, 8bơh “jơno bơtê să-jăn gừn dî kwơ nơ̆m du êt tô̆ tơnge, mơya bơtê nùs don-duh gừn dî kwơ ma lơ̆gay bră, bơh tom jơno hăư ma rai dô î rai ma-ngkơi.” 9Jơno gư̆n la păl don kơnơm nên-nôn ngăn î păl dưñ-lăñ wêl-tăl, 10tài bơh jơno dô mà ƀòn mơ̆n sơòs-sơngeh lơh bră î tơmlơh, bơh ƀòn mơ̆n ăn jơno cang-kơnơm anẵu Yang Tơm Trồ jîng miek, Kơnràñ la Yang Dŏng-Klàs lơ̆gay kơp cro, sơm ngăn la cro don Yang.

11Bơtău tơngkah cĕ î ƀăn mơntău lơ̆gay jơno gư̆n. 12Bư̆ng lơi cro găy lăng ơ̆săp-ơ̆său rai pơnu kon, mà păl lơh krơh ma lơ̆gay cro don Yang, nơ̆m jơno tơs, nơ̆m jơno bră lơh, nơ̆m jơno kơñ-kơloh, nơ̆m jơno don, nơ̆m jơno sang-goh. 13Jơdeh-jơdai cĕ nơ̆m bră đŏk sră, bơtău tơngkah, ƀăn mơntău trôh dî jơ ăñ trôh. 14Bư̆ng hwơbê̆ jơno sơmah ăm nhòng kon, la jơno sơmah sŏng dî e ma kon kơnơm bơh jơno tơs cro gơnoăr-hwơr, băl î jơno ăn tê lơ̆gay cro kwăng kra.

15Bơtê cĕ lơ̆gay jơno gư̆n, lăng nê̆-năn cĕ nơ̆m gô, lơi jơno sî nge sî gư̆t kon gôjîng loh-lang sơđàp măt lơ̆gay cro. 16Kơhea cĕ să tơm kon î bră ƀăn mơntău. Păl kơđư̆ng-bơkhê nơ̆m lơ̆gay bră gư̆n, bơh lơh tîgư̆n rơp dŏng-klàs dî băl î sătan mơ̆n gư̆m tơmpôl cro kơnău kon.