1 Timôthe 3

1Jơno dô la păl don nên-nôn ngăn “Dilah cro găy gư̆n kơñ lơh jîng cro jư mpôl, gừn cro rơ̆ kơp kơñ du bră niem.” 2Gư̆n-jîng, cro jư mpôl păl la cro ơ̆ dî anẵu găy ƀoah dî, bo-klo nư̆ng sî du hôi bo-ua, gư̆t kơhea, gư̆t jư să, rơndăp tăp seng, gư̆t wă-rẵu năc, dî gơnoăr ƀăn mơntău, 3ơ̆ jròk ñô alăk, ơ̆ lơh rhŭng-rhăng, mà păl niem-lơhơn, lơbăn-niem, ơ̆ ham-hà jên-priè, 4ăt-bồ niem hîh nhă mơ̆n, dî kon so don-duh î lơ̆gay nùs kingam 5(bơh dilah du hôi cro ơ̆ gư̆t ăt-bồ hîh nhă mơ̆n, gừn amơh cro rơ̆ rơp rong-siem Hîh Jư̆m Goh Yang Tơm Trồ dê?), 6ơ̆-iyŏ la cro don Yang mhăy, lơi cro rơ̆ ơ̆ pơnhừ-să mà kŏng nơ̆m jơno cahrña gư̆ptî cà-ràk. 7Tơblơ̆ wăl, cro jư mpôl kŭng păl dî jơno lơh cư̆ng niem î cro makin Hîh Jư̆m Goh, lơi cro rơ̆ ơ̆ duh nơ̆m jơno tơngyŏ-tơnghiel î jơno ƀai kơ̆ndăp cà-ràk dê.

8Jăt gư̆p tîgư̆n, lơ̆gay cro dŏng gar hîh jư̆m păl jư jơno tơs, ơ̆ tơs bea dẵư, ơ̆ jròt ñô alăk, ơ̆ ham-hà, 9prăp jư jơno ndăp-ndơ jơno don bơh î nùs-nhơ̆m sang-goh. 10Pơnah nde, ƀòn gô kŭng păl dî lòng lai, sŏng bơh gư̆n lơi ƀòn gô duh bră tơm tô̆ ơ̆ kŏng ƀoah-đas.

11Tơmpôl bo-ua kŭng tîgư̆n, păl jư jơno tơs, ơ̆ tơs bờk, niem-lơhơn, gư̆m don-tơpăt nơ̆m lơ̆gay jơno.

12Lơ̆gay cro dŏng gar hîh jư̆m păl la bo-klo nư̆ng du hôi bo-ua, ăt-bồ niem kon so î lơ̆gay hîh nhă mơ̆n. 13Bơh tơmpôl cro duh bră niem iyà wăl ma sătan mơ̆n tieng pơndrơ niem î nùs don pran-kơdăng nơ̆m jơno don anẵu Yang Dŏng-Klàs Jesu.

14Ăñ cêh nhẵư jơno dô ma kon, kơp kơñ trôh còp kon khơñ ngăn, 15mơya dilah ăñ ƀăt trôh, gừn kon digơlăn păl gư̆t lơh tîgay nơ̆m hîh Yang Tơm Trồ dê, mà rơ̆ la Hîh Jư̆m Goh Yang Tơm Trồ jîng miek, jrŏng î mơnang jơno-tơpăt dê. 16Jơno ndăp-ndơ gôtrê bơh jơno don-duh la dơng mang ngăn ơ̆ tơmbơkai dî, la:

“Bơtao dî sơđah tơlôh nhòng să-jăn,

dî sơnăn tơpăt-durư̆ng nơ̆m Yang hwîng Goh,

dî lăng tơmpơl bơh cro gơndrơh,

dî tơs tơnggư̆t nhòng lơ̆gay lang bol,

dî don kơnơm nơ̆m dunya,

dî iyà swà cŭngsî nhòng jơno gơklŏ.”