1 Tesalônika 2

1Ơ oh mi rôh lŏ, sătan oh mi rôh lŏ gư̆t lah bră ƀòn hî trôh ma anẵu oh mi rôh lŏ sŏng ơ̆ sơlôh dî la ơ̆ kwơ. 2Mơya ma-ngkơi jơ kŏng sơòs-sơngeh î kŏng tơngyŏ-tơnghiel nơ̆m ƀòn dơng Philip jăt gư̆ptî oh mi rôh lŏ gư̆t lờt, ƀòn hî dî jơno khơ̆n-sa nơ̆m Yang Tơm Trồ ƀòn hî dê lơi tơs bơtău ma oh mi rôh lŏ Jơno Niem Yang Tơm Trồ nhòng khăi jơno tơmlơh. 3Bơh bră ƀòn hî mơ̆ndơm-mơ̆nieng ơ̆-iyŏ bơh jơno tìs kơ̆mprah, kŭng ơ̆-iyŏ bơh jơno sơmơ̆-sơmĭñ, hala bơh î jơno blăc-pơlum, 4mơya ƀòn hî sŏng dî Yang Tơm Trồ lòng bơtê lơi dî jao dờp Jơno Niem mơmơh tîgay, gừn ƀòn hî kŭng tơs tơlôh gư̆p tîgư̆n, ơ̆-iyŏ lơi lơh niem-nùs cro, mà lơi lơh niem-nùs Yang Tơm Trồ, la Bơtao swì lăng nùs ƀòn hî. 5Gư̆ptî oh mi rôh lŏ sŏng gư̆t lờt, jơ gư̆n ƀòn hî ơ̆ trôh bơh î lơ̆gay jơno tơmhồc, hala bơh jơno tơmbàk nùs ham-hà — Yang Tơm Trồ lơh cư̆ng — 6kŭng ơ̆ jôi lăng jơno gơklŏ bơh kon-mơnùs, kŭng ơ̆-iyŏ bơh oh mi rôh lŏ hala bơh cro nde, 7bulah digơlăn dî lăng dơng mang tài bơh la cro gơnoăr bơtău dơng Yang Dŏng-Klàs dê, mơya ăm nhòng oh mi rôh lŏ, ƀòn hî gôlơh gư̆ptî cro bơda lơ̆gay kon êt, kŭng gư̆ptî cro mơi păl rong-siem kon mơ̆n. 8Bơh kơñ-kơloh oh mi rôh lŏ tîgư̆n, gư̆n-jîng ƀòn hî sơhờp nùs tơmpà î oh mi rôh lŏ ơ̆ sî nư̆ng Jơno Niem Yang Tơm Trồ, mà gư̆m băl jơno jîng sătan ƀòn hî dê. Rơ̆ la bơh oh mi rôh lŏ sŏng gôjîng tơmpôl cro kơñ-kơloh ngăn gôtrê î ƀòn hî. 9Ơ oh mi rôh lŏ, ngăn la oh mi rôh lŏ hôm sơdơ jơno gleh-glăr î sơòs-sơngeh ƀòn hî dê, ƀòn hî sŏng bơtău Jơno Niem Yang Tơm Trồ ma oh mi rôh lŏ tơm tô̆ kŭng lơh bră tơnge-tơmăng lơi ơ̆ lơh tơng añ kơjơ̆ ma kơp cro găy nơ̆m oh mi rôh lŏ. 10Oh mi rôh lŏ la cro lơh cư̆ng, gư̆m băl î Yang Tơm Trồ te, lah gôtrê î oh mi rôh lŏ, la tơmpôl cro dî nùs don, ƀòn hî sŏng jîng ăm sang-goh, tơpăt-durư̆ng, î ơ̆ anẵu găy ƀoah dî mơmơh tîgay, 11kŭng gư̆ptî oh mi rôh lŏ gư̆t lờt, mơmơh tîgay ƀòn hî lơh î kơp du hôi cro nơ̆m oh mi rôh lŏ, gư̆ptî cro bàp lơh î kon so mơ̆n, 12Tơngkah-mơ̆ndơm oh mi rôh lŏ, mơ̆ndơm-mơ̆nieng î pơjô̆ bơtrôt oh mi rôh lŏ lơi jîng ăm dubă dî păl î Yang Tơm Trồ, Bơtao hôi-săc oh mi rôh lŏ mơ̆t nơ̆m dà lơgơ î jơno gơklŏ Kơnràñ dê.

13Tài bơh jơno gư̆n, ƀòn hî kŭng ơ̆ bơdê jơno ưnngai Yang Tơm Trồ, bơh tơm tô̆ don dưñ jơno Yang Tơm Trồ kơnơm bơh bră iet kơnău bơh anẵu ƀòn hî, oh mi rôh lŏ sŏng dưñ-lăñ ơ̆-iyŏ gư̆ptî jơno kon-mơnùs, mà jăt jơno ngăn rơ̆ la jơno Yang Tơm Trồ, kŭng la jơno ndăng lơh bră nơ̆m oh mi rôh lŏ, rơ̆ la nơ̆m tơmpôl cro dî nùs don. 14Ơ oh mi rôh lŏ, oh mi rôh lŏ sŏng gôjîng tơmpôl cro kơt jăt lơ̆gay Hîh Jư̆m Goh Yang Tơm Trồ dê, la lơ̆gay hîh jư̆m goh nơ̆m Yang Dŏng-Klàs Jesu nơ̆m anẵu lơgơ Juđe, bơh oh mi rôh lŏ sŏng kŏng băl lơ̆gay jơno sơòs-sơngeh bơh lang bol mơ̆n, jăt gư̆ptî lơ̆gay hîh jư̆m goh gư̆n kŭng sŏng kŏng sơòs-sơngeh bơh cro Juđa, 15la lơ̆gay cro sŏng tơngsơ̆t Yang, la Yang Jesu, băl î lơ̆gay cro gơnoăr hwơr, gư̆m kơ̆p rôn-bơklơ̆n ƀòn hî, gừn kŭng la tơmpôl cro ơ̆ tom lơh niem-nùs Yang Tơm Trồ, hôm tơmdră wăl î lơ̆gay cro, 16tơm tô̆ tơm cơkhă ƀòn hî tơs bơtău ma lang bol bơdih lơi khăi cro digơlăn dî dŏng-klàs, lơh tồi-glài ƀòn gô dê kư̆ bîng-jut bơtăl te miek. Mơya trôh dơ̆t-lŭi, jơno tơcao dơng rơp tôh cŭngsî ƀòn gô.

17Ơ oh mi rôh lŏ, bulah kŏng tơmcơlah wĭc bơh oh mi rôh lŏ nơ̆m du êt jŏ tô̆ tơnge, bulah wĭc să mơya ơ̆ tom wĭc nùs, ƀòn hî jơh nùs kơp kơñ khơñ khơñ lơi tơmtom măt oh mi rôh lŏ. 18Gư̆n-jîng, ƀòn hî kơñ swà trôh ma oh mi rôh lŏ — lai ngăn la ăñ, Pol, khăi dơ̆ sơmơn swà — mơya Satan cơkhă ƀòn hî. 19Bơh jơno cang-kơnơm, hala jơno sơhờp-sờhơn, hala sơgơn-bơtao lơh ƀòn hî yeh să la jơno găy? Ơ̆-iyŏ gư̆n la oh mi rôh lŏ ăm sơđàp măt Yang ƀòn mơ̆n, la Yang Jesu, nơ̆m jơno trôh wăl Kơnràñ ya? 20Ngăn, oh mi rôh lŏ la jơno gơklŏ î jơno sơhờp-sờhơn ƀòn hî dê.