1 Tesalônika 1

1Pol, gư̆m Silwan, băl î Timôthe pơyoa ma Hîh Jư̆m Goh Tesalônika nơ̆m Yang Tơm Trồ, la Bàp gư̆m Yang, la Yang Dŏng-Klàs Jesu. Dăn jơno sơmah-sơmai î jơno lơngăp-lơnge ăm nơ̆m cŭngsî oh mi rôh lŏ.

2Ƀòn hî ưnngai miek Yang Tơm Trồ bơh jơh lơ̆gay oh mi rôh lŏ, tơm tô̆ ơ̆ bơdê tơngkah trôh oh mi rôh lŏ nơ̆m lơ̆gay jơno hôi-dăn mơ̆n dê, 3bơh sơdơ trôh gơnoăr bră bơh jơno don, î jơno sơòs-sơngeh bơh jơno kơñ-kơloh, băl î jơno ăt-ăl bơh jơno cang-kơnơm oh mi rôh lŏ dê nơ̆m Yang ƀòn mơ̆n, la Yang Dŏng-Klàs Jesu, sơđàp măt Yang Tơm Trồ, Bàp ƀòn mơ̆n; 4bơh gư̆t oh mi rôh lŏ, lơ̆gay cro dî Yang Tơm Trồ kơñ-kơloh, oh mi rôh lŏ dî Yang Tơm Trồ săc-rwơh, 5tài bơh Jơno Niem ƀòn hî dê sŏng dî bơtău ma oh mi rôh lŏ ơ̆ nư̆ng bơh î jơno tơs, mà kŭng bơh î gơnăp-gơnoăr Yang Hwîng Goh, băl î jơno don kơđư̆ng-bơkhê — gư̆ptî oh mi rôh lŏ gư̆t ƀòn hî sŏng jîng gư̆p tîgay nhòng tĕdơ oh mi rôh lŏ bơh dî kwơ ma oh mi rôh lŏ dê. 6Oh mi rôh lŏ kŭng sŏng sơlôh jîng lơ̆gay cro jăt krơh ƀòn hî dê gư̆m Yang dê, tơm tô̆ don dưñ jơno Yang nhòng khăi sơòs-sơngeh băl î jơno sơhờp-sờhơn Yang Hwîng Goh dê. 7Trôh dî, oh mi rôh lŏ sŏng sơlôh jîng krơh niem ma jơh lơ̆gay tơmpôl cro tom jơno don nơ̆m anẵu Maseđoan gư̆m nơ̆m anẵu Acai. 8Bơh nơ̆m oh mi rôh lŏ, jơno Yang sŏng dî gô pơndrơ, ơ̆ nư̆ng nơ̆m lơgơ Maseđoan î nơ̆m lơgơ Acai, mơya jơno don oh mi rôh lŏ dê nơ̆m anẵu Yang Tơm Trồ sŏng tơs tơnggư̆t lam trôh lơ̆gay anẵu. Bơh tîgư̆n, ƀòn hî ơ̆ tơmpơl kă păl tơs jơno găy te. 9Bơh tơm tô̆ tơngkah bơh ƀòn hî, să ƀòn gô thăư tơs wăl jơno wă-rẵu mà ƀòn hî sŏng tom anẵu oh mi rôh lŏ la amơh, gư̆m lơh mơmơh oh mi rôh lŏ sŏng rơmbư̆ng lơi rồp-ràk, blac trê ma Yang Tơm Trồ lơi duh bră Yang Tơm Trồ jîng miek î tơpăt-ngăn, 10gư̆m ăm cang Kon Kơnràñ bơh trồ, Bơtao mà Kơnràñ sŏng lơh jîng wăl sŏng bơh anẵu sơ̆t — rơ̆ la Yang Jesu, Bơtao dŏng-tă ƀòn mơ̆n klàs bơh jơno tơcao dơng ndăng trôh.