Kôlôse 4

1Ơ cro la cro pơnhơm, iyà trôh cĕ ma lơ̆gay cro dê̆-gơna mơ̆n dê jơno tơpăt niem gư̆m durư̆ng băl, bơh gư̆t lah mơ̆n kŭng tom dî du hôi Cro pơnhơm cŭngsî trồ.

2Kơđư̆ng nùs cĕ nơ̆m jơno hôi-dăn, tơm tô̆ kah sơdơ nơ̆m bră lơh dô băl î jơno ưnngai, 3kŭng gư̆ptî dubă băl hôi-dăn ma ƀòn hî, lơi Yang Tơm Trồ pẵư ma ƀòn hî mpông bơtău jơno Yang dê, lơi tơs tơlôh jơno ndăp-ndơ bơh Yang Dŏng-Klàs, kŭng bơh jơno ndăp-ndơ gư̆n mà ăñ kŏng săy-srê̆, 4amơh lơi ăñ digơlăn rang sơlôh jơno ndăp-ndơ gư̆n dubă loh-lang, gư̆ptî ăñ păl tơs. 5Ngui sa cĕ nơ̆m jơno jăk-sai gôtrê î cro bơdih, tơm tô̆ gư̆t ngui tô̆ jơ. 6Jơno tơs oh mi rôh lŏ păl tom miek jơno sơmah brah brài, tơm tô̆ cĕ bơtăl boh, lơi gư̆t jơno gư̆n păl cang ma oh mi rôh lŏ lơh mơmơh lơi tơmhăư wăl î kơp să cro.

7Kơp bră gôtrê trôh ma ăñ, gừn du hôi cro oh mi kơloh ngăn, du hôi cro dê̆-gơna don-tơpăt, gư̆m du hôi cro lơh bră băl nhòng Yang la Ticikơ rơp sơđah ma oh mi rôh lŏ gư̆t, 8amî gư̆n la cro mà ăñ pơđơ trôh tơmtom oh mi rôh lŏ tài bơh jơno dô, gư̆n la lơi oh mi rôh lŏ gư̆t rai-jîng bơh ƀòn hî, gư̆n lơi amî rơ̆ digơlăn mơ̆ndơm-mơ̆nieng nùs oh mi rôh lŏ, 9swà băl la Ônesim, cro oh mi don-tơpăt gư̆m kơloh ngăn, amî gư̆n tom nŏk-noi băl bơh oh mi rôh lŏ, ƀòn gô rơp e ma oh mi rôh lŏ gư̆t kơp bră nơ̆m dô.

10Aritak, bơyô jam băl ăñ jê, còp-să oh mi rôh lŏ, băl î Mak, oh nŏk-noi Ƀanaƀa dê (oh mi rôh lŏ sŏng dưñ dî jơno pơđơ bơh amî gư̆n; dilah amî gư̆n trôh î oh mi rôh lŏ, gừn wă rău cĕ amî gư̆n), 11kŭng gư̆ptî Jesu, cro dî sơnăn la Justus te. Nhòng tơmpôl cro tom nŏk-noi băl la cro sŏng koh kato, tom nư̆ng ƀòn gô la cro bơyô lơh bră băl î ăñ bơh lơgơ Yang Tơm Trồ dê, ƀòn gô la jơno mơ̆ndơm-mơ̆nieng ma ăñ. 12Epapras còp-să oh mi rôh lŏ, amî gư̆n sơlôh bơh oh mi rôh lŏ, la du hôi dê̆-gơna Yang Dŏng-Klàs Jesu dê, tơm tô̆ ờs tơmlơh miek bơh oh mi rôh lŏ nơ̆m jơno hôi-dăn, lơi oh mi rôh lŏ dî lơh kơđư̆ng-bơkhê têh dơng gư̆m don nên nơ̆m kơp nùs-kơñ Yang Tơm Trồ dê. 13Bơh ăñ lơh cư̆ng bơh amî gư̆n, lah amî gư̆n sŏng kŏng jơno sơòs-sơngeh khăi ngăn bơh oh mi rôh lŏ, kŭng gư̆ptî bơh lơ̆gay cro don nơ̆m anẵu Laodise gư̆m nơ̆m anẵu Hierapôlis ya. 14Luka, cro gơnoăr sơnăm kơloh ngăn, băl î Demas, còp-să oh mi rôh lŏ. 15Dăn còp-să lơ̆gay oh mi rôh lŏ nơ̆m anẵu Laodise, gư̆m nơ̆m Nimpas, băl Hîh Jư̆m Goh bơjư̆m anẵu hîh rôh gư̆n dê. 16Dơ̆ sră pơyoa dô sŏng dî đŏk nhòng tĕdơ oh mi rôh lŏ lờt, păl gư̆t nê̆ lah gô kŭng dî đŏk nơ̆m anẵu Hîh Jư̆m Goh Laodise, gư̆m ngăn lah oh mi rôh lŏ kŭng păl đŏk sră bơh Laodise te. 17Dăn tơs î Acip, lah: “Kơhea cĕ nơ̆m gơnoăr bră mà amî sŏng dưñ bơh nơ̆m Yang, lơi amî digơlăn lơh wêl-tăl gơnoăr bră gư̆n.”

18Jơno còp-să dô bơh tê tơm ăñ, Pol. Kah sơdơ cĕ trôh lơ̆gay săy-srê̆ ăñ jê. Dăn jơno sơmah-sơmai ăm băl î oh mi rôh lŏ.