Minkunga 142

Ngeyo kaka suamunu kiama

Nkunga Davidi kayimbidila banga lusambulu mu thangu kaba mu nsuku.

1Ndinyamikina ngolo kuidi Yave

Ndimvumbula mbembo ama kuidi Yave mu diambu di kiadi.

2Ndilembo dukula luniongo luama va ntualꞌandi ;

va ntualꞌandi, ndinyolukila ziphasi ziama.

3Mu thangu phevi ama yilembo suki-suki mu khati ama,

keti ngeyo wuzaba nzilꞌama.

Mu nsolo wowo ndidiatila, muawu batu bathambila ntambu.

4Tala ku lubakala luama ayi tala,

kadi mutu widi mayindu mu minu.

Ndisi kadi suamunu ko

kuisi ko mutu wumbanzila luzingu luama.

5Kuidi ngeyo ndinyamikina, a Yave.

Ndilembo tubi : “ngeyo suamunu kiama ;

Ngeyo kuku kiama va ntoto wu batu badi moyo.”

6Dimba yamikina kuama

bila ndidi nsukami wu ngolo, wukambulu diana ;

wukhula mu bobo balembo ndandakana bila bawu bandutidi ngolo.

7Bika wuthotula nloko ama muingi ndizitisa dizina diaku ;

buna basonga bela kuiza kutakana va ndidi

mu diambu di mamboti maku kuidi minu.