Minkunga 143

Wundiatisa mu zinzila ziaku

Nkunga Davidi.

1A Yave, wa lusambulu luama,

dimba yamikina kuama mu diambu di kiadi

mu kikhuikizi kiaku ayi mu busonga buaku,

yiza wutsadisa.

2Kadi nata kisadi kiaku ku tsambusu ;

bila kadi mutu wumosi widi moyo widi wusonga va ntualꞌaku.

3Bila mbeni wulembo ndandakana,

wulembo ndiatidila va tsi ;

niandi wukuphuandisanga mu bibuangu bidi tombi

banga batu bobo bafua thama.

4Buna pheve ama yeka suka-suka mu khati ama ;

ntimꞌama weka mona tsisi mu khati ama.

5Ndilembo tebukila moyo bilumbu bivioka.

Ndinyindulanga mavanga maku moso

ayi fiongunina mavanga ma mioko miaku.

6Ndinonuna mioko miama kuidi ngeyo.

Muelꞌama widi phuila mu kumona

banga ntoto wu yuma, bu wididi phuila nlangu.

7Wuphani mvutu mu nsualu, a Yave

pheve ama yilembo yami.

Kadi kutsuekila zizi kiaku

bila ndieka dedakana banga bobo bankuendanga ku dibulu.

8Bika nsuka wundatina mambu ma luzolo luaku lu ngolo ;

bila nditula diana diama mu ngeyo.

Wumbonisa nzila yoyi mfueti kuendila

bila kuidi ngeyo ndimvumbula muelꞌama.

9Wukhula mu bambeni ziama, a Yave ;

bila ndikukisuekanga mu ngeyo.

10Wundonga mu vanga luzolo luaku

bila ngeyo Nzambi ama.

Bika pheve aku yimboti yindiatisa mu ntoto wulendumuka.

11Mu diambu di dizina diaku, a Yave, tamina luzingu luama ;

mu busonga buaku, bika wuthotula mu ziphasi.

12Mu luzolo luaku lu ngolo, kanga bambeni ziama ;

bunga babo bobo beti kundenda, bila ndidi kisadi kiaku.