Skip to content
BibleKenya

Dao Ao Dai Literal Text

Lô-ma 5

Wâyc nây, pănh tuz stunx ayx peengh stimz six wâyc zen stimz, pănh hayh tuz cloon Zâu Tênb-Huungh hoopđ nyâuđ six păngc pănh nyăngz Zâu, six Zâu Yê-su Jix-Tuz, yâuc wâyc păngc Nănh, pănh nzăngđ tuz păngc zen stimz bix naih nâyx huungđ pôz, senz pănh nâyx zanyf stâuđ tăngđ yămz nyăngz pôz, pănh yâuc numđ nyađ tuz naih njih mungc, yămz Zâu Tênb-Huungh nyăngz gwăngz eeng. Yâuc max zâyf cungb nâyx cuungv, pănh lauf numđ nyađ yămz pănh pongh đuungx huungđ zâuđ nanc nyăngz jau, wâyc pâyz tuz coong zâuđ nanc, six ayx phunz pănh hayh naih nyâuđ tanyđ tuz; nzof naih nyâuđ tanyđ, six ayx phunz hayh tanyđ tuz hingh, nzof hayh tanyđ tuz hingh, six ayx phunz naih njih mungc. Nzof wax huungđ njih mungc yâuc max ayx phunz pănh zuc tuih nyâuđ, wâyc păngc Zâu Singx-Lingh, pănh yâuc tuz naih Zâu Tênb-Huungh nyăngz stăngz pong nzuf pănh nyăngz nyâuđ, senz tuz sađ phunz pănh wax Tauh. Lauf max zeengx nzuf, yămz pănh năngx jinh đoonh wax zanyf, yâuc tuz beengc săngx huđ, Zâu Jix-Tuz tayc tayv phunz stoif nyăngz munh. Senz max đai naih munh nyunc tayc tayv phunz peengh stimz nyăngz munh. Manyf lauf hayh naih munh nzađ tayc tayv phunz munh gongx munh. Six Zâu Tênb-Huungh hinđ manyh Nănh nyăngz stăngz phunz pănh, nây six tăng pănh năngx jinh săngh tauh stoif munh, Zâu Jix-Tuz bix tayc tayv phunz pănh. Năngđ nây, nâyx zanyf, yâuc păngc Nănh nyăngz samđ bix tuz stunx ayx peengh stimz, nzof yâuc păngc Nănh pănh bix tuz njâuv gâyh đutb zuc tingc stoif nyăngz jau, đuungx năngđ laix. Wâyc năngđ coong pănh, hănđ six săngh Zâu Tênb-Huungh nyăngz yônz zaz, yâuc păngc Nănh nyăngz Toonz zuc tayc nyăngz jau, bix tuz cloon Zâu Tênb-Huungh hoopđ nyâuđ, nâyx zanyf tuz hoopđ nyâuđ taih nzof, pănh six zef tuz njâuv năngx đuungx têx timb păngc Nănh nyăngz săngh mengc. Six max zâyf cungb nâyx cuungv, pănh yâuc năngx tanv pănh yămz Zâu Tênb-Huungh, păngc pănh nyăngz Zâu six Zâu Yê-su Jix-Tuz, yâuc păngc Nănh, nâyx zanyf pănh bix tuz hoopđ nyâuđ taih.

Năngđ nây, cungb wâyc tăng ah lanh munh bix stoif nzac bamh canz taih, yâuc tăng stoif bix naih tayc nyăngz jau, wâyc nây tayc nyăngz jau yâuc taih phunz tauv muif lanh munh, wâyc năngđ nây muif lanh munh six longđ stoif nzuf. Wâyc tăng max zeengx naih gâyf njanh, bix naih stoif yămz nây bamh canz nzof, six max zeengx naih gâyf njanh wax zanyf stoif yâuc max zeengx tuz stunx hipđ ayx stoif. Six, tăng A-đam ninyh tauv Mô-sê wax nzêuh, tayc nyăngz jab songđ cun nzuf njinh wax đomc munh max pamf stoif năngđ A-đam pamf nâyx wax đomc, nzof A-đam six oix zuc taih wax Tauh nyăngz bah cloiz.

Six, stoif max năngđ sađ phunz nyăngz pôz. Năngđ coong wâyc ah lanh munh nyăngz stoif bix munh đuungx zuc tayc, six Zâu Tênb-Huungh nyăngz pôz, yâuc sađ pôz phunz tăng ah lanh munh, six Zâu Yê-su Jix-Tuz, yâuc phunz tuz đuungx lanh munh năngx nzongf têx timb! Wax huungđ pôz six max zâyf cayx năngđ ah lanh munh pamf nyăngz stoif. Max cun zuc tingc stoif nyăngz jau six tăng ah lanh munh setb taih, bix zuc tingc stoif, six sađ pôz nyăngz jau yâuc tăng năngx jinh ayx stoif đuungx, bix tuz stunx ayx peengh stimz. Wâyc, năngđ coong tăng ah lanh munh pamf stoif, bix tayc nyăngz jab taih cun wâyc tăng wax lanh munh, nzof wax đomc munh stipx sađ phunz lub nzongf nyăngz pôz, cloon peengh stimz nyăngz sâuđ nyâyc wax đomc, six păngc Zâu Yê-su Jix-Tuz ah Tauh, bix cun yămz săngh mengc năngx nzongf têx timb. Năngđ nây, wâyc ah cuyb stoif bix ayx phunz muif lanh munh zuc tingc stoif ayx năngđ laix, six lauf cungb wâyc ah cuyb cumh pâuz gongx, bix ayx phunz muif lanh munh tuz stunx ayx peengh stimz yâuc tuz naih săngh mengc năngđ wa nâyx. Wâyc tăng ah lanh munh max mungv wac, đuungx lanh munh bix săngh stoif munh ayx năngđ laix, six lauf tuz tăng ah lanh munh mungv wac, đuungx lanh munh bix tuz stunx ayx peengh stimz năngđ wa nâyx. Nzof, gâyf njanh nzac taih ayx phunz stoif nyăngz jau phutx hongđ staox. Six laiv tix naih stoif phutx hongđ staox, yâuc naih pôz năngx đuungx têx, năngđ nây, stoif taih cun ayx phunz naih zuc tayc nyăngz jau năngđ laix, six pôz lauf nongc peengh stimz nyăngz jau cun ayx phunz naih stâyv quâyx nyăngz mengc năngđ wa nâyx, păngc pănh nyăngz Zâu, six Zâu Yê-su Jix-Tuz.

Dao Ao Dai Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.