Skip to content
BibleKenya

Dao Ao Dai Literal Text

Lô-ma 6

Năngđ nây, pănh six cayx coong laix? Pănh hoopđ zuc njinh luh ayx stoif nongc phunz pôz tuz pâu đuungx staox max? Max zâyf ayx năngđ nâyx. Pănh six cloon stoif tayc nzof, ayx laix pănh zef năngx ninyh săngh nongc ayx stoif heh? Ha nyâuh max pâyz tuz coong tinyh phanv laiv lanh ayx quaix-gâyf yămz Zâu Yê-su Jix-Tuz, six tuz quaix-gâyf cloon Nănh songc tayc haz? Wâyc nây, pănh ayx quaix-gâyf six cloon Nănh songc tayc songc plopx, lauf cayx năngđ Zâu Jix-Tuz păngc Tênb-toongh Pha nyăngz gwăngz eeng, bix tuz ayx phunz tăng tayc săngh taih năngđ laix, pănh six lauf hayh tuz naih săngb mengc năngđ wa nâyx. Wâyc zuc năngđ coong pănh tuz cloon Nănh songc ah stinz jau tayc năngđ laix, pănh six lauf tuz cloon Nănh songc săngh taih năngđ wa nâyx; wâyc pâyz tuz nâyx huungđ coong, pănh nyăngz lôx munh six cloon Nănh zuc tingz jămz yămz săpc đăngc zax nzof, phunz stoif nyăngz stinb a zuc mêtc, pănh yâuc max zâuđ năngx zuc ayx stoif nyăngz nâuh nzof. Wâyc zuc laiv lanh tayc ninyh six tuz pungx goib max zuc stoif stayb. Six năngđ coong pănh cloon Zâu Jix-Tuz tayc, pănh six zen coong pănh lauf tuz cloon Nănh săngh, wâyc pâyz tuz coong, Zâu Jix-Tuz tăng tayc săngh taih blătc, six max hayh tayc nzof; tayc nyăngz jab yâuc max hayh cun tuz nănh. Wâyc Nănh zuc tayc, nây six Nănh tayc wâyc tayv stoif ah hâyđ caux nzuf. Nzof Nănh săngh, six săngh phunz Zâu Tênb-Huungh. Lauf tinyh năngđ, nyâuh six lauf oix zuc stunx coong nyâuh cloon stoif tayc nâyx, yâuc yămz Zâu Yê-su Jix-Tuz cah njaf săngh phunz Zâu Tênb-Huungh.

Wâyc nây, năngx gâyf phunz stoif cun nyâuh hayh tayc nyăngz stinb, bix zef năngx ninyh ayx âyz nănh oix nyăngz jau. Yâuc năngx gâyf jaoz pănh nyăngz stinb a ninyh phunz stoif, cayx năngđ ayx huđ nyăngz tungh zăngc nâyx. Six oix zuc stungx cănh nyăngz stinb phunz Zâu Tênb-Huungh, cayx năngđ tăng tayc săngh taih nâyx, nzof nyâuh nyăngz stinb yâuc cayx năngđ cay peengh stimz nyăngz tungh zăngc phunz Zâu Tênb-Huungh. Wâyc Stoif six max hayh cun tuz nyâuh, wâyc nyâuh six max yămz gâyf njanh cah đi, six yămz Zâu nyăngz pôz cah đi.

Năngđ nây six ayx laix? Wâyc pănh max yămz gâyf njanh cah đi, six yămz Zâu nyăngz pôz cah đi, pănh bix tuz pamf stoif mah? Max zâyf năngđ nâyx. Nyâuh max pâyz tuz coong nyâuh jaoz nyâuh nyăngz stinb ninyh ayx nâuh buc phunz laiv huungđ, nyâuh six săngh nyâuh buc wax huungđ nyăngz nâuh haz — cayx nođ ayx stoif nyăngz nâuh bix zuc tayc, max six nođ buc ayx peengh stimz nyăngz jau heh? Six sâuf hâuđ Zâu Tênb-Huungh wâyc nyâuh six lauf tăng ayx stoif nyăngz nâuh, bix nyâuh yâuc nongc nzuf stimz nyâuđ buc tuz nzaox phunz nyâuh nâyx huungđ senz nyăngz gâyf. Nzof wâyc tuz pungx goib gâyh đutb stoif, nyâuh nzăngđ tuz ayx peengh stimz nyăngz nâuh. Yaz âyz bamh munh nyăngz zux ix coong, wâyc nyâuh six năngx jinh đoonh yămz stinb a nyăngz jau. Nyâuh jaoz nyâuh nyăngz stinb a ninyh ayx nâuh phunz naih wâyx nyăngz jau, cloon max săngh nyăngz jau, cloon ayx stoif nyăngz jau năngđ laix, six nâyx zanyf, lauf oix zuc stungx nyâuh nyăngz stinb a nongc ayx peengh stimz nyăngz nâuh phunz hayh tuz đăngb zeengh taih năngđ wa nâyx. Wâyc nyâuh năngx jinh ayx stoif nyăngz nâuh wax zanyf, nyâuh bix tuz pungx goib yămz nây peengh stimz nyăngz jau. Năngđ nâyx, cah đangc nyâuh bix ayx tuz laiv huungđ săngh nongc nzof heh, senz nâyx zanyf nyâuh mangc bix năngx cănh numđ nyayz wax đomc jau? Wâyc wax đomc jau six cungb ayx phunz munh zuc tayc. Six nâyx zanyf, wâyc tuz pungx goib gâyh đutb stoif nzof, yâuc tuz ayx nâuh phunz Zâu Tênb-Huungh, nyâuh six hayh ayx tuz săngh nyâuh đăngb zeengh nyăngz jau, bix tauv cah đangz yâuc tuz stâyv quâyx nyăngz mengc. Wâyc stoif nyăngz congz stinh six zuc tayc, nzof Zâu Tênb-Huungh sađ phunz nyăngz pôz six stâyv quâyx nyăngz mengc, yămz pănh nyăngz Zâu, six Zâu Yê-su Jix-Tuz.

Dao Ao Dai Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.