Lô-ma 16

1Yaz paiđ ô Phê-bi ninyh pongh nyâuh, nănh six buz nyăngz ô stayx, six lauf ayx cumh pâuz munh yămz wa Cên-cê-lê Jiux Pangx, 2nyâuh oix zuc stipx nănh năngx gongx yămz Zâu cah njaf, cayx năngđ stipx wax đomc đăngb zeengh munh nâyx, nzof nănh naih laiv huungđ sămv zuc nyâuh stăngc nyâuh oix zuc stăngc nănh. Wâyc nănh lauf stăngc phunz đuungx lanh munh, yâuc stăngc cloon yaz.

3Joođ đeh tauv Bitc-sin-la cloon A-qui-la, cloon yaz songc ayx Zâu Yê-su Jix-Tuz nyăngz cumh pâuz nyăngz munh, 4stiz iz lanh six max zâuh stiz nyăngz mengc bix ninyh njâuv yaz nyăngz mengc, max zâyf cungb yaz ah lanh hâuđ stiz cuungv, yâuc năngx cloon wax đomc pitc stingx munh nyăngz muif nomz jiux pangx timb, 5yâuc đeh căpx dlonf yămz stiz wa pyau nyăngz jiux pangx. Joođ đeh tauv Ê-bê-nê-tat yaz stăngz nyăngz yâuf pez, nănh six zen Zâu Jix-Tuz năngx đangc quaix yămz Ê-si stâyz phangz. 6Joođ đeh tauv, senz wâyc nyâuh bix ayx cumh pâuz zâuđ wax tauh Ma-li-ya. 7Joođ đeh tauv An-đô-ni-cat cloon Yu-ni-atc, yaz nyăngz jenb yâuc cloon yaz songc yămz nzauh nyăngz lah pyeoz toic, yămz wax đomc cumh pâuz munh tauv laiv stiz iz lanh six naih manyh tauh lub nzongf, nzof stiz yâuc zen Zâu Jix-Tuz đangc yaz. 8Joođ đeh tauv Am-pa-li-a-tat senz yaz stăngz yămz Zâu nyăngz Munh. 9Joođ đeh tauv U-ba-nat, cloon buz songc ayx cumh pâuz yămz Zâu Jix-Tuz nyăngz munh, yâuc đeh tauv Sa-ta-cit, senz yaz stăngz nyăngz munh. 10Joođ đeh tauv A-bên-lêt, tuz stipx yămz Zâu Jix-Tuz nyăngz munh. Joođ đeh tauv yămz A-lit-tô-bu-lat nyăngz pyau wax đomc munh. 11Joođ đeh tauv Hê-lô-đi-ôn, six yaz nyăngz jenb. Joođ đeh tauv yămz Na-sit-satc nyăngz pyau wax đomc munh, six yămz Zâu cah njaf nyăngz munh. 12Joođ đeh tauv Ti-phê-na cloon Ti-phô-sa, stiz iz lanh ô stayx six ayx cumh pâuz zâuđ wâyc Zâu. Joođ đeh tauv yaz stăngz nyăngz munh Bê-sitc, ayx Zâu nyăngz cumh pâuz zâuđ nzongf wax tauh ô. 13Joođ đeh tauv Lu-phat, tuz Zâu sên taih nyăngz munh, cloon nănh nyăngz nzif yâuc săngh yaz nyăngz nzif. 14Joođ đeh tauv A-sin-ci-tat, Pha-lê-gôn, Hê-mêt, Batc-lô-batc, Hê-mat, cloon căn stiz yămz nyăngz yâuf pez. 15Joođ đeh tauv Phi-lô-lô-gatc cloon Yu-li, Nê-lê-atc cloon nănh nyăngz ô, cloon Ô-lim-batc cloon căn stiz tinyh đoih yămz wax đomc đăngb zeengh munh. 16Oix zuc nongc đăngb zeengh nyăngz nyâuđ lanh stipx lanh lanh tomz lanh. Zâu Jix-Tuz nyăngz yetx stong jiux pangx săngx tauv nyâuh.

17Six, yâuf pez lex, yaz joođ quinb nyâuh oix zuc năngx cayb bôngh ayx bây munh phunz goib yâuc ayx phunz munh ninyh longđ wax đomc munh, nzeengz cloon nyâuh tuz hođ taih nyăngz gâyf, yâuc oix zuc pyenv gâyh stiz năngx côz. 18Wâyc nâyx huungđ munh six max bokc dlic pănh nyăngz Zâu, six Zâu Jix-Tuz, yâuc cungb bokc dlic stiz nyăngz nyâuđ cuungv, stiz yâuc nongc wac camz, ayx nzetx blangc jaf nyâuđ đah mâyc nyăngz munh. 19Munh tinyh đoih lauf pâyz coong nyâuh six mungv âyz cuđ jenx ayx. Wâyc nây, yaz lauf numđ nyađ nyâuh nzongf, yaz yâuc oix nongc nyâuh tuz tongb manyh yămz ayx gongx nyăngz jau, nzof huđ nyăngz jau yâuc năngx gâyf phunz caox tauv nyâuh. 20Peengh oonz nyăngz Zâu Tênb-Huungh six căn căn sămc Sax-tanx ănz nyâuh nyăngz staux đi.

Joođ pănh nyăngz Zâu, six Zâu Yê-su Jix-Tuz nyăngz pôz cloon nyâuh yămz.

21Cloon yaz songc ayx cumh pâuz, wax tauh Ti-mô-tai, cloon Lu-si-atc, Ya-sônx, cloon Sô-si-ba-tê, cloon jenb yaz wax đomc munh, lauf săngx tauv nyâuh. 22Yaz six Tê-ti-atc, stăngc Phao-lô ja nâyx zây jenx nyăngz munh, pungx wac đeh tauv zen Zâu nyăngz yâuf pez. 23Gai-atc, six stipx yaz nyăngz munh yâuc stipx cloon jiux pangx, pungx wac đeh tauv nyâuh. Cloon nzauf dlanyh nyăngz nyanh wax tauh Ê-lat-tat, căn pănh nyăngz yâuf pez Can-tat, lauf pungx wac đeh tauv nyâuh. 24[Joođ pănh nyăngz Zâu, six Zâu Yê-su Jix-Tuz nyăngz pôz cloon nyâuh tinyh đoih yămz. A-meen.]

25Cloo ayx phunz nyâuh tuz stâuđ tăngđ wax Tauh tuz gwăngz eeng, âyz yaz nyăngz Cuđ Jenx cloon Zâu Yê-su Jix-Tuz nzaox nyăngz wac, yâuc âyz tăng lôx noib tuz pinyx vâyv quaix taih stâyv stipx stâyv wax đomc, bix tuz hinđ setb taih nyăngz jau, 26nâyx zanyf tuz hinđ setb taih, six âyz stâyv quâyx săngh nyăngz Zâu Tênb-Huungh nyăngz lanyf, yâuc tuz tăng tâuc wac munh nyăngz stâub coong phunz manf stingx munh, phunz stiz hayh tuz zen yâuc mungv Nănh nyăngz wac, 27Păngc yămz Zâu Yê-su Jix-Tuz, cloo naih tongb manyh nyăngz ah Tauh Zâu Tênb-Huungh, tuz gwăngz eeng tauv banc stâyv banc đaic. A-meen.