Lô-ma 15

1Pănh six, munh njoongh nyăngz munh, oix zuc yenv zen max njoongh nyăngz munh, yâuc năngx gâyf cungb ayx hoođ cănh nyăngz nyâuđ cuungv. 2Pănh muif lanh munh oix zuc ayx hoopđ pănh cah sinh munh nyăngz nyâuđ, wâyc ayx gongx nyăngz jau, oix zuc nyâyh ayx laiv hayh tuz zâyv tuz munh. 3Wâyc zuc Zâu Jix-Tuz lauf max cănh ayx hoođ Nănh nyăngz nyâuđ. Cayx năngđ naih ja coong: “Munh mađ zaux nyăngz wac cloon coong peo Zâu nyăngz wac six plongz ănz yaz.” 4Wâyc tăng lôx noib tuz ja taih nongc nzaox phunz pănh wax đomc jau, yâuc wâyc păngc yămz Canyx Stâub tanyđ zâuđ nyăngz jau, cloon oonz nyâuđ nyăngz jau, pănh songđ tuz naih njih mungc. 5Cloo Zâu Tênb-Huungh nyăngz stimz đao yâuc oonz nyâuđ, sađ phunz nyâuh tuz songc ah nomz stimz nyâuđ lêpc Zâu Yê-su Jix-Tuz, 6phunz nyâuh hayh tuz songc ah nomz stimz nyâuđ, songc ah nomz nzetx tanv Zâu Tênb-Huungh, senz pănh nyăngz Zâu Yê-su Jix-Tuz nyăngz Pha.

7Wâyc nây, oix zuc lanh stipx lanh, cayx năngđ Zâu Jix-Tuz stipx nyâuh nâyx, phunz Zâu Tênb-Huungh tuz gwăngz eeng. 8Nzof yaz joođ coong ayx nâyx, wâyc Zâu Tênb-Huungh nyăngz senz gâyf, Zâu Jix-Tuz săngh ayx quaix catz munh nyăngz pâuz, nongc phunz ayx săngh nyunc cloon claof jex buz wax đomc wac, 9yâuc nongc phunz wax đomc pitc stingx munh tanv Zâu Tênb-Huungh, wâyc Nănh naih nyâuđ hâuđ lênh munh, cayx năngđ naih wac ja coong:

“Wâyc nây, yaz six yămz wax đomc pitc stingx munh nyăngz mungh tongx tanv Mâyh

yâuc ayx nzungz tanv Mâyh nyăngz manyh.”

10Zef naih ja coong:

“Pitc stingx munh lex, oix zuc cloon Zâu nyăngz pec stingx songc nyađ.”

11Zef coong:

“Manf côkz munh lex, oix zuc tanv Zâu;

manf stingx munh lex, oix zuc tanv Nănh.”

12Nzof I-sa-ya lauf coong:

“Tăng Jêtc-si nyăngz đuungh six setb ah stinz tunb taih, Nănh six tuz setb taih nongc cun wax đomc pitc stingx munh;

wax đomc pitc stingx munh six tuz naih njih mungc yămz Nănh.”

13Joođ njih mungc nyăngz Zâu Tênb-Huungh ayx phunz nyâuh naih muif huungđ nyađ nyăngz jau pong nzuf, cloon peengh oonz yămz zen stimz cah njaf, ayx phunz nyâuh naih muif huungđ njih mungc păngc yămz Zâu Singx-Lingh nyăngz jab.

14Yaz nyăngz yâuf pez lex, yaz zen coong nyâuh six lauf cănh tuz naih gongx nyăngz jau pong nzuf, yâuc naih muif huungđ bănh sangz nyăngz jau, yâuc hayh lanh quinb lanh. 15Six yaz yâuc pungx stimz ja đuungx huungđ phunz nyâuh, coong nâyx huungđ coong wax huungđ six nongc bux phunz nyâuh săngx, wâyc tuz tăng Zâu Tênb-Huungh sađ phunz yaz nyăngz pôz, 16yâuc ayx phunz yaz săngh Zâu Yê-su Jix-Tuz nyăngz ah tauh pâuz phunz pitc stingx munh, yâuc ayx stayb munh phunz Zâu Tênb-Huungh nyăngz Cuđ Jenx, nongc phunz pitc stingx nyăngz munh săngh congx nyăngz tax huungđ yâuc tuz Zâu numđ nyađ stipx, wâyc tuz đăngb zeengh tăng Zâu Singx-Lingh. 17Wâyc nây, yămz Zâu Yê-su Jix-Tuz cah njaf, yaz songđ cănh tanv yaz yămz yaz ayx Zâu Tênb-Huungh nyăngz cumh pâuz wax đomc. 18Wâyc yaz max nzađ coong tauv pitc huungđ, blătc nzuf Zâu Jix-Tuz ayx tăng yaz setb taih, nongc phunz pitc stingx munh mungv Nănh wax đomc — nongc wac coong cloon cumh pâuz ayx, 19nongc njih hoouđ cloon jix caox njingc nyăngz jab, yâuc nongc Zâu Tênb-Huungh nyăngz Singx-Lingh jab — ayx phunz yaz nzônh Zâu Jix-Tuz nyăngz Cuđ Jenx nzêux muif đoif nzuf, tăng Yê-lu-sa-lem cloon quib nzêux wax đomc yâuc ninyh tauv In-li-li-cum stâyz phangz; 20lauf tinyh năngđ, yaz nzac jab nzônh Cuđ Jenx yămz Zâu Jix-Tuz max zeengx tuz nzônh tauv wax đomc tinc, phunz yaz nzăngđ max zâyv ănz pitc lanh munh nyăngz coonz tay. 21Cayx năngđ naih ja coong:

“Max zeengx tuz numđ lănv tauv Nănh wax đomc munh six tuz phătc Nănh,

nzof max zeengx tuz numđ quaix wax đomc munh six tuz pâyz.”

22Wâyc nây, naih đuungx hâyđ yaz zuc njanh max hayh ninyh tayđ nyâuh. 23Six nâyx zanyf, yămz nâyx đomc stâyz phangz max naih luungđ nongc stayb yaz nzof, yâuc wâyc đuungx nyăngv nây yaz senz numđ oix tuz ninyh tayđ nyâuh, 24tauv laiv zanyf yaz setb jau ninyh tauv wa Tây-ban-nya, yaz senz nyâyh mungc, tauv pitb wa, bix tuz pongh nyâuh, phunz yaz tuz căn nyâuh yămz ah dlapc caux nzof mănc păngc nyâuh stungx yaz ninyh wa. 25Nzof nâyx zanyf yaz six jinh đangh ninyh wa Yê-lu-sa-lem dlanyh nongc stăngc wax đomc đăngb zeengh munh. 26Wâyc Ma-si-đô-ni munh cloon A-ca-ya munh numđ nyađ setb stimz căpx nyanh nongc stăngc yămz wa Yê-lu-sa-lem dlanyh wax đomc đăngb zeengh munh nyăngz munh zâuđ munh. 27Wâyc stiz six numđ nyađ ayx, nzof stiz yâuc sămv wax đomc munh nyăngz zaix. Wâyc zuc năngđ coong wax đomc pitc stingx munh tuz cloon Yu-tai munh songc Singx-Lingh nyăngz phănc, stiz six lauf hoopđ zuc zoz nây stâyv sangc nyăngz jax toongx stăngc phunz wax đomc munh. 28Wâyc nây, tauv ayx tuz nâyx huungđ cumh pâuz soongb nzuf, yâuc zoz căpx taih nâyx đomc phănc phunz tauv stiz, yaz songđ clăngv quaix nyâuh wa muf ninyh Tây-ban-nya. 29Six yaz pâyz coong tauv yaz ninyh tayđ nyâuh, yaz six nzâyz cloon Zâu Jix-Tuz nyăngz pôz ninyh dloih nzuf.

30Wâyc nây, yâuf pez lex, wâyc pănh nyăngz Zâu, six Zâu Yê-su Jix-Tuz, yâuc wâyc Singx-Lingh nyăngz stăngz, yaz joođ nyâuh cloon yaz jab nzeengz zax, nongc cloo Zâu tayv phunz yaz nyăngz wac huungv staox Zâu Tênb-Huungh ninyh, 31phunz yaz hayh tuz gâyh đutb yămz wa Yu-đê stâyz phangz wax đomc max zen nyăngz munh, yâuc phunz yămz wa Yê-lu-sa-lem dlanyh wax đomc đăngb zeengh munh, hayh tuz numđ nyađ stipx yaz nzâyz ninyh nyăngz phănc; 32năngđ coong âyz Zâu Tênb-Huungh nyăngz zux ix, phunz yaz hayh tuz numđ nyađ ninyh pongh nyâuh, yâuc tuz cloon nyâuh sec hitb conv. 33Joođ peengh oonz nyăngz Zâu Tênb-Huungh cloon nyâuh yâuf pez tinyh đoih yămz. A-meen.