Lô-ma 14

1Oix zuc stipx zen max njoongh nyăngz munh, năngx gâyf nzeengz cloon plungh plănb nyăngz jau. 2Manyf naih tix lanh munh naih nyâuđ zen coong nănh nhlinc tuz muif huungđ, six zen max njoongh nyăngz munh cungb nhlinc njayz meengz cuungv. 3Nhlinc wax tauh năngx gâyf mangc stam max nhlinc wax tauh, nzof max nhlinc wax tauh năngx gâyf tingc nhlinc wax tauh. Wâyc Zâu Tênb-Huungh stipx nănh nzof. 4Mâyh six mănv, bix năngx tingc pitc lanh munh nyăngz pâuz? Nănh stâuđ max six glinyf, six nănh nyăngz zâu nyăngz cumh pâuz. Nănh six tuz ayx phunz stâuđ tăngđ, wâyc Zâu naih tômx jab ayx phunz nănh stâuđ tăngđ. 5Manyf nâyx lanh munh stunx nâyx noib năngx gongx têx wax noib, nzof wax lanh yâuc stunx muif noib six tinyh năngđ. Muif lanh munh oix zuc zen tingc yămz nănh nyăngz stimz nyâuđ. 6Stunx noib nyăngz munh six stunx wâyc Zâu, nhlinc nyăngz munh lauf nhlinc wâyc Zâu, wâyc nănh sâuf hâuđ Zâu Tênb-Huungh, max nhlinc nyăngz munh lauf max nhlinc wâyc Zâu, nănh lauf sâuf hâuđ Zâu Tênb-Huungh. 7Wâyc pănh max naih mănv cănh wâyc pănh săngh, yâuc max naih mănv cănh wâyc pănh tayc. 8Wâyc zuc pănh săngh, six săngh wâyc Zâu, nzof pănh tayc, lauf tayc wâyc Zâu. Năngđ nây, max cun pănh tayc max six săngh, pănh six lauf săngh Zâu nyăngz nzuf. 9Wâyc nây, Zâu Jix-Tuz tayc ninyh zef năngx săngh taih, nongc ayx munh tayc cloon munh săngh nyăngz Zâu. 10Six mâyh, săngh laix bix ninyh tingc mâyh nyăngz yâuf pez? Nzof năngx naih mâyh, săngh laix bix mangc stam mâyh nyăngz yâuf pez? Wâyc pănh muif lanh six zuc yămz Zâu Tênb-Huungh nyăngz stămđ stoif tinc cah đangc. 11Wâyc naih wac ja coong:

“Zâu coong: ‘Senz năngđ Yaz stâyv quâyx săngh nâyx, muif nomz staux nyâyf zoongz six quâyc yămz Yaz nyăngz cah đangh,

nzof muif stinz byetc six nhlimc Zâu Tênb-Huungh.’”

12Wâyc nây, pănh muif lanh munh six zuc coong nzuf pănh ayx nyăngz cumh pâuz phunz Zâu Tênb-Huungh.

13Năngđ nây, pănh năngx gâyf lanh tingc lanh gôh, six, oix zuc ayx năngđ nâyx six năngx gongx têx: nođ max zoz njăuz pyây njanh jau ayx phunz pănh nyăngz yâuf pez zuc tib zoomf. 14Yaz pâyz yâuc senz zen coong, yămz Zâu Yê-su cah njaf, max naih laiv huungđ six cănh naih wâyx, cungb naih munh nyâyh laiv huungđ six naih wâyx, wax huungđ nzăngđ naih wâyx phunz wax tauh munh cuungv. 15Năngđ coong wâyc nhlinc hopb bix ayx phunz mâyh nyăngz yâuf pez munz nyâuđ têx, mâyh six max ayx âyz stăngz nyăngz jau nzof. Năngx gâyf wâyc cănh nyăngz nhlinc hopb bix ayx hoiđ pănh nyăngz yâuf pez, senz Zâu Jix-Tuz tayc tayv nyăngz munh. 16Wâyc nây, năngx gâyf phunz nyâuh gongx nyăngz jau zuc hib. 17Wâyc Zâu Tênb-Huungh nyăngz côkz six max zâyf yămz nhlinc, hopb, six yămz peengh stimz cloon peengh oonz cloon numđ nyađ yămz Zâu Singx-Lingh cah njaf. 18Wâyc laiv lanh bokc dlic Zâu Jix-Tuz ayx năngđ nâyx six hoopđ Zâu Tênb-Huungh nyăngz nyâuđ, yâuc tuz bamh munh tanv. 19Năngđ nây, pănh oix zuc lov hoopđ stimz toongh âyx nyăngz jau cloon lanh zâyv lanh nyăngz jau. 20Năngx gâyf wâyc nhlinc hopb nyăngz jau bix ayx phunz Zâu Tênb-Huungh nyăngz cumh pâuz quaiz. Manyf muif huungđ six đăngb zeengh, six năngđ coong nhlinc bix ayx phunz munh zuc longđ, six săngh stoif. 21Wax huungđ gongx six năngx gâyf nhlinc a, yâuc năngx gâyf hopb tiu, yâuc năngx gâyf phunz tăng laiv huungđ nhlinc hopb bix ayx phunz mâyh nyăngz yâuf pez zuc tib zoomf, max six zuc longđ stoif, max six đoonh nzac. 22Mâyh naih zen stimz beengc laiv, six oix zuc cănh wâyc mâyh bix năngx cayb leđ yămz Zâu Tênb-Huungh nyăngz cah đangc. Năngđ coong laiv lanh max cănh numđ zuc cooux yămz nănh numđ săngh nyăngz jau, senz naih oonz looc gôh. 23Six năngđ coong laiv lanh nhlinc bix năngx numđ wangb wax tauh six zuc tingc stoif nzof gôh, wâyc max zâyf tăng zen stimz. Wâyc zuc, laiv huungđ max zâyf tăng zen stimz six săngh stoif nzuf.