1 Cô-lin-tô 1

1Yaz, Phao-lô, âyz Zâu Tênb-Huungh nyăngz zux ix, tuz sên taih ayx Zâu Yê-su Jix-Tuz nyăngz cumh pâuz munh, cloon pănh nyăngz yâuf pez Sô-sa-tê-nêt, 2pungx phunz Zâu Tênb-Huungh nyăngz jiux pangx yămz wa Cô-lin-tô dlanyh, six tuz stav đăngb yămz Zâu Yê-su Jix-Tuz nyăngz munh, yâuc tuz sên taih ayx đăngb zeengh munh wax đomc, yâuc phunz cloon yămz muif nomz tinc êu pănh nyăngz Zâu nyăngz manyh wax đomc munh, six Zâu Yê-su Jix-Tuz, săngh stiz nyăngz Zâu yâuc săngh pănh nyăngz Zâu. 3Cloo pănh nyăngz Pha, six Zâu Tênb-Huungh, cloon Zâu Yê-su Jix-Tuz, sađ pôz cloon peengh oonz phunz nyâuh.

4Yaz wâyc nyâuh sâuf hâuđ yaz nyăngz Zâu Tênb-Huungh max setc tiny, wâyc Nănh sađ pôz phunz nyâuh yămz Zâu Yê-su Jix-Tuz. 5Wâyc yămz manf dlayc nyâuh tuz ayx phunz puv quâyx yămz Nănh, yămz coong nyăngz wac cloon pâyz nyăngz jau, 6âyz năngđ coong tauv Zâu Jix-Tuz wax đomc zanyx manyf wac, yâuc tuz hinđ manyf six senz nyăngz yămz nyâuh cah njaf nâyx, 7ayx tuz nyâuh max sămv laiv huungđ Singx-Lingh nyăngz sâuđ nyâyc tinyh, yâuc joomz nyâuđ zu pănh nyăngz Zâu, six Zâu Yê-su Jix-Tuz hinđ setb taih, 8Nănh six ayx phunz nyâuh tuz stâuđ tăngđ tauv tauh, yâuc ayx phunz max naih tinc nzêmh tauv pănh nyăngz Zâu Yê-su Jix-Tuz taih wax noib. 9Zâu Tênb-Huungh six neetb stimz nyăngz, yâuc păngc Nănh nyâuh bix tuz sên taih cloon Nănh nyăngz toonz tuz tinyh tongb, six pănh nyăngz Zâu Yê-su Jix-Tuz.

10Six Yâuf pez lex, yaz tim pănh nyăngz Zâu, six Zâu Yê-su Jix-Tuz nyăngz manyh quinb nyâuh, nyâuh muif lanh six oix zuc songc ah zâux wac coong, yămz nyâuh yâuc năngx gâyf naih phunz goib ayx sax peob, nyâuh six oix zuc hoopđ stimz tongh âyx yâuc songc ah stinz jau nyâyh. 11Wâyc, yaz nyăngz yâuf pez lex, păngc Ca-lô-ê nyăngz pyau munh, nyâuh nyăngz dlayc bix tuz lănv phunz yaz, coong yămz nyâuh naih phunz goib ayx sax peob. 12Yaz oix coong, yămz nyâuh muif lanh yâuc naih coong ayx nâyx, coong: “Yaz six săngh Phao-lô nyăngz,” max six coong “Yaz six săngh A-bô-lô nyăngz,” max yâuc coong “Yaz six săngh Sê-pha nyăngz,” nzof zef coong “Yaz six săngh Zâu Jix-Tuz nyăngz.” 13Zâu Jix-Tuz bix zuc phunz goib mah? Ha Phao-lô zuc tingz jămz yămz săpc đăngc zax tayv phunz nyâuh mah? Max six nyâuh tim Phao-lô nyăngz bux ayx quaix-gâyf heh? 14Yaz sâuf hâuđ Zâu Tênb-Huungh wâyc yaz max ayx quaix-gâyf phunz nyâuh laiv lanh, blătc nzuf Ca-lit-batc cloon Gai-atc, 15phunz nyâuh max naih laiv lanh hayh coong nyâuh tim yaz nyăngz bux ayx quaix-gâyf. 16(Yaz lauf tuz ayx quaix-gâyf phunz Sa-tê-pha-nat nyăngz pyau munh. Blătc wa, yaz max săngx tuz yaz năngx naih ayx quaix-gâyf phunz tix lanh max naih.) 17Wâyc Zâu Jix-Tuz max paiđ yaz ninyh ayx quaix-gâyf, six paiđ yaz ninyh nzônh Cuđ Jenx — max zâyf păngc tongb manyh nyăngz wac, wâyc phunz Zâu Jix-Tuz nyăngz săpc đăngc zax max zuc mangc stam.

18Wâyc săpc đăngc zax gâyf gâyf yămz wax đomc zuc mêtc nyăngz munh, six numđ oongx nzongf, six yămz pănh tuz njâuv nyăngz munh, six săngh Zâu Tênb-Huungh nyăngz tômx jab. 19Wâyc naih wac ja coong:

“Yaz six mêtc nzuf wax đomc tongb manyh munh nyăngz tongb manyh;

nzof Yaz yâuc ayx paic nzuf wax đomc munh lemđ munh nyăngz zux ix.”

20Tongb manyh munh yămz laiv heh? Hođ đăngc nyăngz munh yămz laiv heh? Nâyx stâyv pob gâyf nyăngz munh yămz laiv heh? Max zây Zâu Tênb-Huungh ayx phunz nây bamh canz nyăngz tongb manyh pênx oongx ninyh nzof haz? 21Wâyc zuc, bamh canz max stipx Zâu Tênb-Huungh nyăngz tongb manyh, songđ max pâyz tuz Zâu Tênb-Huungh yămz nâyx huungđ tongb manyh, Zâu Tênb-Huungh songđ numđ nyađ nongc pănh nzaox nâyx đomc oongx nyăngz jau, nongc njâuv wax đomc zen nyăngz munh. 22Wâyc zuc, Yu-tai munh six naic wax đomc Jix caox njingc, nzof Hi-lapc munh six lov tongb manyh nyăngz jau. 23Buz six nzônh Zâu Jix-Tuz zuc tingz jămz yămz wa săpc đăngc zax, manyf six săngh ah nomz njăuz phunz Yu-tai munh zuc tib, nzof yămz wax đomc pitc stingx munh six săngh oongx nyăngz jau. 24Six, yămz tuz sên taih nyăngz munh, njinh Yu-tai munh cloon Hi-lapc munh, Zâu Jix-Tuz six săngh Zâu Tênb-Huungh nyăngz jab, cloon Zâu Tênb-Huungh nyăngz tongb manyh. 25Wâyc Zâu Tênb-Huungh oongx nyăngz jau six năngx leemđ têx bamh munh, nzof Zâu Tênb-Huungh đoonh nyăngz jau yâuc năngx njoongh têx bamh munh.

26Yâuf pez lex, nyâyh mangc jađ yămz pănh tuz sên taih tauv laiv, six max naih đuungx lanh tongb manyh munh âyz nây stâyv sangc, yâuc max naih đuungx lanh naih lokc jangx nyăngz munh, lauf max naih đuungx lanh minb mâyc njăngb nyăngz munh. 27Six, Zâu Tênb-Huungh sên yămz nây stâyv sangc oongx wax đomc taih, nongc ayx phunz wax đomc tongb manyh nyăngz munh numđ nyayz, nzof Zâu Tênb-Huungh yâuc sên yămz nây stâyv sangc đoonh wax đomc taih, nongc ayx phunz wax đomc munh njoongh numđ nyayz, 28Zâu Tênb-Huungh yâuc sên yămz nây bamh canz minb mâyc hav wax đomc, cloon zuc mangc stam wax đomc, cloon max naih wax đomc, phunz Nănh hayh ayx wax đomc naih pênx max naih, 29ayx phunz muif lanh munh max hayh ayx nzetx lub yămz Zâu Tênb-Huungh nyăngz cah đangc. 30Six, wâyc păngc Nănh nyâuh bix tuz yămz Zâu Yê-su Jix-Tuz nyăngz cah njaf, senz tăng Zâu Tênb-Huungh taih nyăngz tongb manyh, yâuc săngh peengh stimz nyăngz jau cloon đăngb zeengh nyăngz jau, cloon njâuv pôz nyăngz jau phunz pănh wax Tauh, 31cayx năngđ, naih wac ja coong: “Laiv lanh ayx nzetx lub, six oix zuc ayx nzetx lub yămz Zâu.”