1 Cô-lin-tô 2

1Yâuf pez lex, cah đangc yaz ninyh nyâuh wa, yaz max zâyf ninyh nongc wax đomc lemđ nyăngz wac max six tongb manyh nyăngz wac coong, yămz yaz lănv phunz nyâuh tauv Zâu Tênb-Huungh pinyx vâyv wax đomc jau. 2Wâyc yămz nyâuh cah njaf, yaz tingc săngh bâyf max coong tauv luungđ tinyh, blătc nzuf Zâu Yê-su Jix-Tuz, cloon Nănh zuc tingz jămz yămz wa săpc đăngc zax. 3Yaz yămz nyâuh cah njaf lôx numđ đoonh, numđ cumh nzav yâuc stinb sinx nzuf. 4Yaz coong nyăngz wac cloon yaz nzaox nyăngz jau, six max nongc wax đomc lemđ gao cloon tongb manyh coong ayx tuz cuyb mungv, six nongc yămz Singx-Lingh hinđ manyf nyăngz jau cloon tômx jab, 5phunz nyâuh nyăngz zen stimz six max zâyf păngc yămz bamh munh nyăngz tongb manyh, six păngc yămz Zâu Tênb-Huungh nyăngz jab.

6Six yămz wax đomc clăkx clunh nyăngz munh, buz six nzaox tongb manyh nyăngz jau, yâuc max zâyf nây stâyv sangc nyăngz tongb manyh, lauf max zâyf cun nây stâyv sangc wax đomc munh nyăngz tongb manyh, senz zuc mêtc wax đomc munh. 7Plănc taih, buz six nzaox Zâu Tênb-Huungh nyăngz tongb manyh yămz pinyx vâyv nyăngz jau, senz tăng lôx noib pinyx vâyv quaix taih stâyv stipx stâyv wax đomc, yâuc tuz Zâu Tênb-Huungh tingc săngh njâuh phunz pănh nyăngz gwăngz eeng, 8nâyx đomc, six max naih laiv tauh cun nây bamh canz nyăngz munh hayh pâyz tuz, wâyc stiz năngđ coong pâyz, stiz yâuc max zoz gwăngz eeng nyăngz Zâu tingz ănz săpc đăngc zax. 9Six, năngđ naih wac ja coong:

“Mâyc max zeengx phătc nyăngz,

bah noomh yâuc max zeengx tuz numđ,

nzof munh nyâuđ yâuc max zeengx nyâyh tauv wax đomc,

Zâu Tênb-Huungh yâuc bênc săngh nongc phunz stăngz Nănh wax đomc munh.”

10Wâyc Zâu Tênb-Huungh nongc Zâu Singx-Lingh hinđ manyf phunz buz, wâyc Singx-Lingh zah tuz muif huungđ, njinh cloon Zâu Tênb-Huungh đôz nzongf nyăngz zux ix. 11Wâyc naih mănv hayh pâyz tuz ah lanh munh nyăngz nyâuđ heh năngđ coong max zâyf Singx-Lingh yămz pănh cah njaf? Lauf tinyh năngđ, max naih mănv hayh pâyz tuz Zâu Tênb-Huungh nyăngz jau, blătc nzuf Zâu Tênb-Huungh nyăngz Singx-Lingh. 12Pănh six max stipx nây bamh canz nyăngz manđ, pănh six stipx tăng Zâu Tênb-Huungh taih nyăngz Singx-Lingh, phunz pănh hayh pâyz tuz tăng Zâu Tênb-Huungh cungb stungx phunz pănh nyăngz pôz, 13buz nzaox nâyx đomc jau, six max zâyf âyz bamh munh nyăngz tongb manyh nzaox, six âyz Singx-Lingh bux nyăngz wac nzaox, yâuc âyz Singx-Lingh pob manyf Singx-Lingh nyăngz jau. 14Munh âyz nây stinb a nyăngz stimz nyâuđ, six max hayh stipx tuz tăng Zâu Tênb-Huungh nyăngz Singx-Lingh taih wax đomc jau, wâyc yămz wax đomc munh six numđ wax đomc jau max setb laiv luungđ, nzof stiz yâuc max numđ hayh saz tuz, wâyc nâyx đomc jau six zuc âyz Singx-Lingh nzăngđ hayh zah tuz. 15Naih Singx-Lingh nyăngz munh six stămđ tuz setb muif huungđ, nzof nănh yâuc cănh max zuc mănv stămđ.

16“Wâyc naih mănv pâyz tuz Zâu nyăngz stimz nyâuđ — naih mănv cayx bux Nănh heh?”

Six pănh yâuc naih Zâu Jix-Tuz nyăngz stimz nyâuđ.