Hinđ-yangh 9

1Tah ngâuf tauh stinz munh pyom blungh blex, yaz songđ phătc ah nomz stingz tau tăng guungh tuih nzac nib taih, nzof nănh yâuc tuz sađ tuungh tămx cotb đôz max naih cah tôz nyăngz ja zâyh phunz. 2Nănh coib tuungh tămx cotb đôz max naih cah tôz setb taih, songđ naih tâuf sâuv tăng wax nomz cotb đôz setb taih cayx năngđ tâuf lâuh lub nyăngz tâuf sâuv nâyx, nzof bah noib cloon đamx yâuh songđ nzămc nzuf wâyc tăng wax nomz cotb nyăngz tâuf sâuv. 3Nzof tăng wax đomc tâuf sâuv yâuc naih wax đomc jeengz đekx đayv ninyh yămz pong nib minc, stiz yâuc tuz stipx jab cayx năngđ wa nib minc wax đomc stopb congz nyăngz jab nâyx. 4Yâuc naih wac zăpx phunz stiz êu stiz năngx gâyf hoiđ nib minc nyăngz mađ max six laiv huungđ mađ meengz cloon njăngx lauđ, cungb tuz ayx hoiđ bamh munh cuungv, six max naih Zâu Tênb-Huungh nyăngz yenx ănz wa pyây ploongh wax đomc munh. 5Stiz yâuc tuz zăpx phunz êu stiz max tuz ayx wax đomc munh tayc, six yâuc wâyb nănh stiz pyaz lav cah njaf, nzof stiz zuc wâyb wax đomc six cayx năngđ munh zuc stopb congz tăpc nâyx. 6Yămz wax đomc noib munh six lov jau tayc, six stiz max hayh lov tuz jau tayc, nzof stiz six numđ oix tuz tayc nzongf, six tayc nyăngz jau yâuc gâyh goib nănh stiz. 7Wax đomc jeengz đekx nyăngz hanyh jangx six cayx năngđ maf bênc săngh nongc ninyh bopc zax nâyx. Stiz nyăngz pyây yâuc naih ah huungđ cayx năngđ cay sămz tany, nzof stiz nyăngz minb yâuc cayx năngđ munh nyăngz minb. 8Stiz naih pyây đongz cayx năngđ munh nzif nyăngz pyây đongz, nzof stiz nyăngz nyah six cayx năngđ njanh zongh nyăngz nyah. 9Stiz naih panyđ pongz cah lapc cayx năngđ njab panyđ nâyx, nzof stiz nyăngz đatz stingb six cayx năngđ wax đomc panx peengz nyăngz maf sex bix naih đuungx tauh maf đănx tiuv ninyh bopc zax nyăngz stingb nâyx. 10Stiz nyăngz tây yâuc naih njaiz tănx cayx năngđ stopb congz, nzof stiz nyăngz jab six yămz wax đomc tây nongc hoiđ munh pyaz lav cah njaf. 11Stiz naih huungh cun stiz six yămz wa tuungh tămx cotb max naih cah tôz wax tauh manđ. Nănh nyăngz bux Hipđ-lu wac six coong A-batc-đôn, nzof Hi-lapc wac six coong A-bô-li-ôn.

12Tah yetx hâyđ zâuđ nanc quaix nzof. Six phanv mangc, năngx naih iz hâyđ zâuđ nanc timb jinh đangh lêpc nănh đangz taih.

13Tah guc tauh stinz munh pyom blungh blex, yaz songđ numđ yămz Zâu Tênb-Huungh wa cah đangc wax nomz sămz nyăngz congx tinc wax đomc joongz naih stingb coong wac, 14bux tah guc tauh stinz munh, six jinh đangh nzauf blungh blex wax tauh coong: “Oix zuc pungx wa pyâyz tauh stinz munh, six zuc stayb yămz wa Yu-phê-titc wăngx lub wax đomc.” 15Nzof wa pyâyz tauh stinz munh, stiz six tuz bênc săngh nongc phunz toix wax nomz săngx huđ, cloon noib, lav, nyăngv, bix tuz pungx setb taih, nongc phunz stiz ayx hoiđ bamh munh pôz phănc nyăngz ah phănc. 16Yaz numđ coong; wax đomc peengz six naih iz pez jeof. 17Nzof yămz hinđ yangh nyăngz jau, yaz phătc wax đomc maf cloon zâyh wa maf wax đomc munh six năngđ nâyx — naih panyđ pongz cah lapc nzaox stib, meengz stib, cloon wăngh gunx. Wax đomc maf nyăngz pyây six cayx năngđ njanh zongh nyăngz pyây, tăng stiz nyăngz nzetx naih puutb tâuf, cloon tâuf sâuv cloon wôngh. 18Bamh munh pôz phănc nyăngz ah phănc zuc tayx tayc tăng wa pôz huungđ staiz nanc, six tâuf, cloon tâuf sâuv, cloon wôngh tăng wax đomc maf nyăngz nzetx puutb setb taih. 19Nzof wax đomc maf nyăngz jab six yămz wa nzetx cloon stiz wa tây, stiz nyăngz tây six cayx năngđ cay nangz naih pyây nâyx, yâuc păngc wa stiz bix ayx hoiđ munh. 20Năngx yăngc nzac wax đomc bamh munh six max zeengx zuc nâyx đomc staiz nanc tayx tayc wax đomc, yâuc max nhlimc stiz nyăngz puf ayx taih wax đomc cumh pâuz, njinh luh ninyh paix manđ, cloon nongc sămz, nongc nyanh pec, nongc tongh, nongc njăuz, nongc njăngx ayx taih nyăngz miuc hanyh, six max hayh mangc tuz phătc, max hayh mungv tuz numđ, yâuc max hayh yăngh ninyh wax đomc miuc hanyh. 21Stiz yâuc max nhlimc tauv stiz wax đomc stoif, tayx munh, ayx papz, ayx pongz lauh max zen, max six ayx stac wax đomc.