Hinđ-yangh 8

1Tauv Pax Jix Yuungh Jenz coib tah jetb nomz yenx wax zanyf, yămz wa guungh songđ stinyb njâuh cox ah phanx săngx huđ nâyx. 2Yaz songđ phătc nhlic tauh stinz munh, stiz stâuđ yămz Zâu Tênb-Huungh nyăngz cah đangc, stiz yâuc tuz jaoz phunz nhlic nomz blungh blex.

3Zef naih ah tauh stinz munh taih, nzauf nomz sămz huungb bônh stâuđ yămz wa congx tinc, nănh yâuc tuz sađ phunz huungb đuungx nongc stungx wax đomc huungb cloon wax đomc đăngb zeengh munh cloo Zâu nyăngz wac, ănz wa sămz nyăngz congx tinc yămz wa huungh tinc nyăngz cah đangc. 4Huungb siv cloon wax đomc đăngb zeengh munh cloo Zâu nyăngz wac, songđ tăng wax tauh stinz munh nyăngz puf đunc đunc têx staox Zâu Tênb-Huungh nyăngz cah đangc ninyh. 5Wax tauh stinz munh zoz huungb bônh taih, zoz wa congx tinc nyăngz tâuf ănz tuz pong, yâuc quanyf nzac nib ninyh, songđ naih bah congz haoh, clinyb clinyb têx, naih bungh bitc tâuf, cloon nib tongf.

6Nzof wa nhlic tauh stinz munh nzauf nhlic nomz blungh blex songđ bênc săngh nongc pyom.

7Zetx tauh stinz munh pyom blungh blex, songđ naih pyoc cloon tâuf zanb cloon samđ quanyf nzac nib ninyh, tăng wa pôz phănc nyăngz ah phănc nib songđ zuc pu sac nzuf, pôz phănc nyăngz ah phănc njăngx yâuc zuc pu sac nzuf, nzof muif huungđ mađ meengz yâuc zuc pu sac nzuf.

8Tah nyâyc tauh stinz munh pyom blungh blex, songđ naih ah cuyb cayx năngđ zoongz zâyc lub nâyx naih tâuf sac, quanyf nzac coiđ ninyh, tăng wa pôz phănc nyăngz ah phănc coiđ songđ pênx samđ, 9pôz phănc nyăngz ah phănc naih mengc săngh yămz wa coiđ nyăngz tax huungđ songđ tayc nzuf, nzof pôz phănc nyăngz ah phănc đangđ yâuc zuc mêtc.

10Tah stamz tauh stinz munh pyom blungh blex, songđ naih ah nomz stingz tau lub sac cayx năngđ tâuf pa nâyx tăng guungh tuih nzac taih, nănh tuih nzac pôz phănc nyăngz ah phănc wăngx lub cloon nzac wăngx jenz nyăngz womz ninyh. 11Wax nomz stingz tau nyăngz bux six hipđ ayx ngaiz ciux. Pôz phănc nyăngz ah phănc womz songđ pênx ngaiz ciux, yâuc naih munh đuungx tayc wâyc wax cuyb womz imz.

12Tah stâyx tauh stinz munh pyom blungh blex, pôz phănc nyăngz ah phănc bah noib songđ zuc hoiđ, cloon pôz phănc nyăngz ah phănc lav cloon pôz phănc nyăngz ah phănc stingz tau zuc hoiđ, phunz stiz pôz phănc nyăngz ah phănc zuc nzămc ninyh, wâyc nây bah noib zax pôz phănc nyăngz ah phănc songđ max naih gwăngz, nzof bah nzămc lauf ha.

13Tăng wa yaz mangc, yâuc numđ naih ah saz clang lub jinh đangh đayv yămz wa đamx yâuh hamv stingb lub coong: “Zuc zâuđ gôh, zuc zâuđ gôh, zuc zâuđ phunz săngh yămz wa nib minc nyăngz munh gôh, wâyc năngx naih wa pôz tauh stinz munh cayx pyom nyăngz blungh blex stingb timb.”