Hinđ-yangh 10

1Tăng wa yaz zef phătc pitc tauh stinz munh naih jab nzongf tăng guungh nzac taih, naih ah tungđ vănx sêmz nănh, nănh nyăngz pyây naih côngz cangx, nănh nyăngz minb six cayx năngđ bah noib, nănh nyăngz staux six cayx năngđ ah đauc tâuf, 2nănh nyăngz puf jinh đangh nzauf ah glonc stâub jenz coib goib. Wax tauh stinz nongc nănh byaoh saz staux zaiđ wa coiđ minc, nzof staix saz staux zaiđ wa nib minc, 3nănh songđ hamv ah stingb lub cayx năngđ njanh zongh ngum nâyx. Wax tauh stinz munh ah hamv stingb lub wax zanyf, songđ naih nhlic stingb bah congz haoh nhlangđ staox cloon stiz coong wax đomc wac. 4Wa nhlic stingb bah congz haoh wax zanyf, yaz cayx đa ja, six yaz numđ naih wac stingb tăng wa guungh coong: “Oix zuc tăpx yenx omz wax đomc nhlic stingb bah congz haoh coong nyăngz wac, yâuc năngx gâyf ja stiz.” 5Nzof yaz phătc stâuđ wa coiđ minc cloon wa nib minc wax tauh stinz munh, stuungb nănh byaoh saz puf staox guungh ninyh 6nuz stâyv quâyx săngh tauv banc stâyv banc đaic wax Tauh, senz zuyx guungh cloon yămz guungh nyăngz muif huungđ, zuyx nib cloon yămz nib nyăngz muif huungđ, yâuc zuyx coiđ cloon yămz coiđ nyăngz muif huungđ wax Tauh, coong: “Senz max naih lauh nzof gôh. 7Six tauv tah jetb tauh stinz munh pyom blungh blex wax noib, tauv nănh pyom blungh blex wax zanyf, Zâu Tênb-Huungh plongx yangh nyăngz jau songđ tuz ayx săngh nzuf, âyz năngđ Nănh coong quaix phunz Nănh wax đomc pâuz, six wax đomc tâuc wac munh nâyx.” 8Nzof yaz numđ tăng wa guungh wax cuyb stingb zef coong ănz yaz, coong: “Oix zuc ninyh zoz stâuđ wa coiđ minc cloon wa nib minc wax tauh stinz munh nyăngz puf coib goib wax glonc stâub jenz taih.” 9Tăng wa yaz songđ ninyh pongh wax tauh stinz munh, êu nănh phunz wax glonc sâub jenz yaz. Wax tauh stinz munh songđ coong bux yaz: “Oix zuc stipx bix nhlinc gôh, nănh six imz yămz mâyh nyăngz nyâuđ, six yămz mâyh nyăngz nzetx, nănh six camz cayx năngđ mâyf toongh.” 10Yaz songđ stipx zoz tăng stinz munh nyăngz puf wax glonc stâub taih bix nhlinc, yămz yaz nyăngz nzetx nănh six camz cayx năngđ mâyf toongh, six tauv yaz nhlinc tuz, nănh songđ imz yămz yaz nyăngz nyâuđ. 11Tăng wa songđ naih đuungx zâux wac coong ănz yaz coong: “Mâyh sămv zuc coong tâuc wac timb phunz đuungx stingx munh, đuungx nomz côkz, muif huungđ wac cloon muif tauh huungh stix.”