Hinđ-yangh 5

1Nzof yaz phătc stâyv yămz wa huungh tinc wax Tauh nyăngz byaoh saz puf naih ah glonc stâub yâuc naih ja đăngc ănz cah njaf cloon cungh ngwaic nzuf, yâuc naih tăpb nhlic nomz yenx. 2Yaz lauf phătc ah tauh stinz munh njoongh nzongf hamv stingb lub coong: “Mănv payh tuz coib nâyx glonc stâub yâuc tutb nâyx glonc stâub nyăngz yenx heh?” 3Max cun yămz guungh yămz nib, max six yămz cah đi nib, max naih mănv hayh coib tuz nâyx glonc stâub taih nongc mangc nănh. 4Tăng wa yaz songđ haoh munz stimz nzongf, wâyc max phătc naih mănv payh tuz nongc coib wax glonc stâub max six nongc toc nănh. 5Tăng wa, yămz wax đomc munh côx naih ah lanh coong ănz yaz coong: “Năngx gâyf haoh. Phanv mangc! Yu-đa stingx nyăngz, njanh zongh, Đa-witx nyăngz Sây Stunz, Nănh tuz hingh songđ hayh coib tuz wax glonc stâub cloon tăpb wa nyăngz nhlic nomz yenx.” 6Nzof yămz wa huungh tinc mungh tongx cloon wa pyâyz tauh săngh nyăngz tax huungđ, cloon yămz wax đomc munh côx nyăngz mungh tongx, yaz phătc tauh Pax Jiz Yuungh Jenz stâuđ wa, cayx năngđ zuc tayx quaix nâyx, naih nhlic nomz joongz cloon nhlic nomz mâyc, six Zâu Tênb-Huungh nyăngz nhlic nomz mengc hoonh tuz paiđ ninyh nzêux pong guungh đi. 7Pax Jiz Yuungh Jenz staox taih zoz stâyv yămz wa huungh tinc wax Tauh nyăngz byaoh puf wax glonc stâub, 8Nănh zoz stâub wax zanyf, pyâyz tauh săngh nyăngz tax huungđ cloon wa nhlic săpc stâyx lanh munh côx songđ puc nzac Pax Jiz Yuungh Jenz nyăngz cah đangc ninyh, muif lanh nzauf ah nomz lanyh njămh cloon ah nomz sămz bônh naih huungb pong nzuf, nây six wax đomc đăngb zeengh munh cloo Zâu nyăngz wac.

9Stiz pooux ah tiuh săngb nzungz, coong:

“Mâyh payh tuz zoz nâyx glonc stâub

yâuc coib nâyx glonc stâub nyăngz yenx,

wâyc Mâyh zuc tayx tayc yâuc nongc cănh nyăngz samđ, suc manf stingx munh,

muif huungđ wac, muif huungđ munh cloon muif nomz côkz lauf phunz Zâu Tênb-Huungh.

10Mâyh ayx phunz stiz săngh ah nomz côkz yâuc ayx stayb munh phunz pănh nyăngz Zâu Tênb-Huungh,

nzof stiz six tuz cun yămz wa nib minc.”

11Tăng wa yaz mangc yâuc numđ đuungx tauh stinz munh nyăngz stingb quib nzêux wa huungh tinc cloon wax đomc săngh nyăngz tax huungđ cloon wax đomc munh côx, nzof wax đomc stinz munh six pâyz sax tinb sax panc tauh, 12tinyh songc hamv lub coong:

“Pax Jiz Yuungh Jenz zuc tayx tayc, senz payh tuz stipx tômx lanyf, puv quâyx, tongb manyh, tômx jab, zanyb saix, gwăngz eeng, cloon tanv nyăngz wac.”

13Yaz yâuc numđ zuyx taih nyăngz muif huungđ yămz guungh, yămz nib, yămz cah đi nib, yămz coiđ, cloon yămz wa nyăngz muif huungđ, coong:

“Poou phunz stâyv yămz wa huungh tinc wax Tauh cloon Pax Jiz Yuungh Jenz tuz tanv, tuz zanyb saix, tuz gwăngz eeng, cloon naih tômx jab tauv banc stâyv banc đaic.”

14Wa pyâyz tauh săngh nyăngz tax huungđ songđ coong: “A-meen!” wax đomc munh côx yâuc puc nzac paix.