Hinđ-yangh 6

1Tăng wa yaz mangc phătc, Pax Jiz Yuungh Jenz coib wa nhlic nomz yenx nyăngz tah yetx nomz wax zanyf, yaz songđ numđ wa pyâyz tauh săngh nyăngz tax huungđ, naih ah tauh coong wac stingb cayx năngđ bah congz haoh nâyx, coong: “Taih gôh!” 2Yaz songđ mangc phătc, naih ah tauh maf pec! Zâyh maf wax tauh naih ah songz nađ, yâuc tuz sađ ah nomz tany phunz nănh, tăng wa nănh songđ setb ninyh tauv laiv lauf ayx tuz hingh.

3Pax Jiz Yuungh Jenz coib tah nyâyc nomz yenx wax zanyf, yaz numđ tah nyâyc tauh săngh nyăngz tax huungđ coong: “Taih gôh!” 4Songđ naih pitc tauh maf setb taih — stib tâuf. Zâyh maf wax tauh nănh yâuc tuz sađ phunz naih lanyf ayx phunz bamh canz max naih taix peengh, phunz munh lanh tayx lanh, yâuc naih ah zuungz nzuc đao lub tuz sađ phunz nănh.

5Pax Jiz Yuungh Jenz coib tah stamz nomz yenx wax zanyf, yaz numđ tah stamz tauh săngh nyăngz tax huungđ coong: “Taih gôh!” Yaz mangc phătc, naih ah tauh maf jaz, nzof zâyh maf wax tauh munh nănh nyăngz puf nzauf ah tauh nzăngv, 6Nzof yaz numđ yămz wa pyâyz tauh săngh nyăngz tax huungđ mungh tongx naih cayx năngđ naih wac stingb nâyx, coong: “Ah noib congz stinh maif tuz ah măkx blauh witx; ah noib congz stinh maif tuz pôz măkx ba li blauh. Năngx naih yâuh cloon tiu six năngx gâyf tongf.”

7Pax Jiz Yuungh Jenz coib tah stâyx nomz yenx wax zanyf, yaz numđ tah stâyx wax tauh săngh nyăngz tax huungđ coong: “Taih gôh!” 8Yaz mangc songđ phătc naih ah tauh maf meengz buđ. Zâyh maf wax tauh, bux hipđ ayx tayc nyăngz jau, nzof yămz pâu yâuc lêpc nănh đangz taih. Stiz tuz naih lanyf yămz wa nib minc pyâyz phănc nyăngz ah phănc, nongc nzuc đao tayx tayc, nongc nyâuđ sab, nongc wănh staiz gumc cloon yămz wa nib minc wax đomc jămx staov.

9Pax Jiz Yuungh Jenz coib tah ngâuf nomz yenx wax zanyf, yaz phătc wa congx tinc cah đi naih wâyc Zâu Tênb-Huungh nyăngz gâyf yâuc wâyc stiz ayx nyăngz zanyx manyf wac bix zuc tayx tayc wax đomc munh nyăngz mengc hoonh. 10Stiz tinyh songc hamv lub coong: “Đăngb zeengh nyăngz, senz nyăngz wax Tauh, Zâu lex, Mâyh cayx zu tauv laiv zanyf nzăngđ stămđ stoif yâuc wâyc buz nyăngz samđ bix clao yônz ănz săngh yămz wa nib minc wax đomc munh heh?” 11Nzof stiz muif lanh yâuc tuz sađ ah byenđ guyz đao pec phunz, yâuc naih wac bux stiz coong êu stiz oix zuc zu tix cay timb, zu tauv laiv zanyf tuz caux nzuf cloon stiz songc ayx cumh pâuz wax đomc munh, six stiz wax đomc yâuf pez, nzof yâuc cayx zuc tayx tayc cayx năngđ stiz nâyx wax đomc.

12Pax Jiz Yuungh jenz coib tah guc nomz yenx wax zanyf, yaz mangc songđ phătc naih ah tâuc nib tongf neetb nzongf, bah noib songđ jaz ninyh cayx năngđ nongc pyâyz jaz đătx taih nyăngz buyx nâyx, nzof lav yâuc stib cayx năngđ samđ, 13nzof wax đomc stingz tau tăng wa cah zâyc guungh tuih nzac nib taih, cayx năngđ bănx tauh pyâu meengz zuc nzaox lub stâyb blâyc nâyx, 14Guungh zuc stuyđ ninyh cayx năngđ glonc ah zây stâub nâyx, nzof muif nomz zoongz zâyc cloon muif nomz coiđ njeengh yâuc zuc stuyđ gâyh stiz nyăngz tinc. 15Yămz guungh đi wax đomc huungh stix cloon wax đomc quanz lub, wax đomc peengz pyây, wax đomc puv quâyx munh, naih lanyf wax đomc, cloon ayx nâuh tauv laiv wax đomc cloon max ayx nâuh nyăngz munh, tinyh đoih tiuv ninyh meem yămz wax đomc njăuz ngamh, yâuc yămz wa zoongz zâyc wax đomc njăuz pyây congv; 16stiz coong ănz wax đomc zoongz zâyc cloon wax đomc njauz pyây coong: “Lakb taih đăpx buz gôh, pinyx phunz buz max zâuđ pongh stâyv wa huungh tinc wax Tauh nyăngz minb, cloon Pax Jiz Yuungh Jenz siv nhlenx nyăngz jau, 17wâyc Nănh siv nhlenx lub nyăngz noib tauv nzof, naih mănv hayh tanyđ tuz heh?”