Hinđ-yangh 3:20

1Oix zuc ja phunz yămz wa Sa-đitc jiux pangx nyăngz stinz munh coong:

‘Naih Zâu Tênb-Huungh nyăngz nhlic nomz mengc hoonh cloon nhlic nomz stingz tau wax Tauh coong năngđ nâyx: “Yaz pâyz tuz mâyh ayx nyăngz cumh pâuz. Mâyh naih manyh coong six săngh, six mâyh tayc. 2Oix zuc sting điub taih yâuc ayx phunz njoongh staox năngx yăngc nzac wax đomc, six cayx caiđ stutc wax đomc, wâyc Yaz phătc mâyh nyăngz cumh pâuz six max zeengx tuz clăkx clunh yămz Yaz Zâu Tênb-Huungh nyăngz cah đangc. 3Wâyc nây, oix zuc nyâyh mungv jađ mâyh tuz stipx yâuc tuz numđ gâyf ayx laix. Oix zuc ayx âyz bix nhlimc stoif. Năngđ coong mâyh max sting điub têx, Yaz six taih cayx năngđ stac munh nâyx, nzof mâyh six max pâyz tuz Yaz laiv nomz săngx huđ taih nzeengz cloon mâyh. 4Six, mâyh naih tix lanh munh yămz wa Sa-đitc, stiz six wax đomc munh max ayx phunz stiz nyăngz guyz quav cah lôh, stiz six tuz zuz guyz quav pec cloon Yaz ninyh, wâyc stiz payh tuz năngđ nâyx. 5Laiv lanh tuz hingh six tuz zuz guyz đao pec năngđ nâyx, Yaz six max stotb nănh nyăngz bux gâyh Săngh Mengc Tanz, nzof Yaz yâuc nhlimc wax tauh nyăngz bux yămz Yaz nyăngz Pha cah đangc yâuc yămz Nănh wax đomc stinz munh nyăngz cah đangc. 6Laiv lanh naih bah noomh, oix zuc mungv Singx-Lingh coong ănz wax đomc jiux pangx nyăngz wac.”’

7Oix zuc ja phunz yămz wa Phi-la-đen-phi-a jiux pangx nyăngz stinz munh coong:

‘Đăngb Zeengh Wax Tauh, Senz Nyăngz Wax Tauh,

nzauf Đa-witx nyăngz ja zâyh Wax Tauh,

coib six max naih mănv hayh omz,

nzof omz six max naih mănv hayh coib Wax Tauh,

coong năngđ nâyx:

8“Yaz pâyz tuz mâyh nyăngz cumh pâuz (Phanv mangc, Yaz coib ah tungđ jeengh lub ănz mâyh nyăngz cah đangc max naih mănv hayh omz tuz nănh), wâyc mâyh naih jab stoc six mâyh âyz Yaz nyăngz wac ayx, yâuc max pyenv Yaz nyăngz manyh. 9Phanv mangc, Yaz six ayx phunz Sax-tanx wax peob munh, senz cănh nhlimc stiz ayx Yu-tai munh six max zâyf, stiz six cungb puv maoh cuungv — Phanv mangc bex, Yaz six ayx tuz phunz stiz taih quâyc nzac mâyh nyăngz staux cah đangc ninyh, nzof stiz six pâyz tuz coong Yaz stăngz mâyh. 10Wâyc mâyh âyz Yaz tanyđ zâuđ nyăngz wac ayx, wâyc nây Yaz six lauf leđ mâyh tuz pyăux đutb nây bamh canz cayx zuc pongh stâyv nyâuđ nyăngz săngx huđ, nongc stâyv jinh đangh săngh yămz nây nib minc nyăngz munh tauv laiv. 11Ya six taih căn. Oix zuc nzauf mâyh naih nyăngz năngx tăngđ, phunz max naih mănv hayh zoz mâyh nyăngz tany ninyh. 12Laiv lanh tuz hingh, Yaz six ayx phunz nănh săngh nomz pyau njâuh yămz Yaz Zâu Tênb-Huungh nyăngz pyau. Nănh songđ max naih zanyf zuc setb gâyh wa gôh, nzof Yaz six ja Yaz Zâu Tênb-Huungh nyăngz manyh ănz nănh, six Yaz Zâu Tênb-Huungh nyăngz dlanyh bux (six săngb Yê-lu-sa-lem tăng wa guungh, tăng Yaz Zâu Tênb-Huungh nyăngz tinc nzac taih), cloon Yaz nyăngz săngb manyh. 13Laiv lanh naih bah noomh, oix zuc mungv Singx-Lingh coong ănz waz đomc jiux pangx nyăngz wac.”’

14Oix zuc ja phunz yămz wa Lau-đi-sê jiux pangx nyăngz stinz munh, coong:

‘A-meen wax Tauh, neetb stimz nyăngz zanyx manyf munh, yâuc senz nyăngz, ayx coonz yămz Zâu Tênb-Huungh zuyx taih nyăngz muif huungđ wax Tauh coong năngđ nâyx: 15“Yaz pâyz tuz mâyh nyăngz cumh pâuz, mâyh max nămx yâuc max joomz. Tuz mungc mâyh wănh nămx max six joomz! 16Six wâyc mâyh cungb utb utx, max joomz yâuc max nămx, Yaz songđ cayx nja mâyh setb Yaz nyăngz nzetx taih. 17Wâyc mâyh coong: "Yaz puv quâyx, Yaz naih muif huungđ dloih, yaz max sămv luungđ tiny," six mâyh yâuc max pâyz tuz coong, mâyh dlauc wâyb nzongf, hâuđ lênh nzongf, zâuđ max naih luungđ, mâyc buđ yâuc căng căng. 18Yaz quinb mâyh maif tăng Yaz nyăngz sămz tuz sinx quaix tâuf nongc phunz mâyh tuz puv quâyx, maif guyz đao pec zuz phunz mâyh max zuc nyayz wâyc mâyh nyăngz stinb căng căng, yâuc maif mâyc munz mađ nongc hâuh ănz mâyh nyăngz mâyc phunz mâyh hayh mangc tuz phătc. 19Tinyh phanv Yaz stăngz laiv lanh Yaz six coong mađ yâuc phađ nzaox. Wâyc nây, oix zuc joomz nyâuđ bix nhlimc stoif. 20Phanv mangc, Yaz stâuđ yămz wa cungh ngwaic nzoz jeengh. Năngđ coong laiv lanh numđ Yaz nyăngz stingb bix coib jeengh, Yaz six ninyh cloon nănh, cloon nănh nhlinc năngv, nzof nănh yâuc cloon Yaz. 21Laiv lanh tuz hingh, Yaz six phunz nănh cloon Yaz stâyv yămz Yaz nyăngz tinc, cayx năngđ Yaz tuz hingh bix tuz cloon Yaz nyăngz Pha stâyv yămz Nănh nyăngz tinc nâyx. 22Laiv lanh naih bah noomh oix zuc mungv Singx-Lingh coong ănz wax đomc jiux pangx nyăngz wac.”’”