Hinđ-yangh 2

1Oix zuc ja phunz wa Ê-phê-sô jiux pangx nyăngz stinz munh coong:

‘Nzauf nhlic nomz stingz tau yămz Nănh nyăngz byaoh saz puf wax Tauh, six yăngh quaix ninyh quaix lauf yămz nhlic nomz sămz toongz zax mungh tongx wax Tauh, coong năngđ nâyx: 2“Yaz pâyz tuz mâyh ayx nyăngz cumh pâuz, mâyh ayx cumh pâuz zâuđ yâuc tanyđ zâuđ, Yaz lauf pâyz coong mâyh max nyangc tuz wax đomc munh huđ munh, mâyh yâuc stâyv quaix wax đomc cănh nhlimc stiz ayx cumh pâuz munh six nănh stiz max zâyf, nzof mâyh yâuc stâyv tuz setb coong nănh stiz six za nyăngz munh; 3mâyh lauf naih stimz đao, yâuc wâyc Yaz nyăngz manyh tanyđ zâuđ yâuc max ganc tiny. 4Six yaz naih ah huungđ oix coong mâyh, nây six mâyh quanyf mâyh cah đangc nyăngz stăngz. 5Wâyc nây, oix zuc nyâyh mangc jađ tăng laiv tix, mâyh bix nămx nyâuđ, yâuc oix zuc nhlimc stoif bix ayx cayx năngđ ah yađ wa nâyx. Năngđ max têx, Yaz six taih pongh mâyh, nzof Yaz six zoz mâyh nyăngz toongz zax setb gâyh nănh nyăngz tinc — năngđ coong mâyh max coi nyâuđ nhlimc stoif. 6Six mâyh naih nâyx huungđ gongx, nây six mâyh hănđ Ni-cô-lau wax peob munh ayx nyăngz cumh pâuz, lauf cayx năngđ Yaz hănđ nyăngz nâyx. 7Laiv lanh naih bah noomh, oix zuc mungv Singx-Lingh coong ănz wax đomc jiux pangx nyăngz wac. Laiv lanh tuz hingh, Yaz six phunz wax lanh munh nhlinc săngh mengc nyăngz njăngx pyâu, yămz Zâu Tênb-Huungh nyăngz Pa-đa-đi.”’

8Oix zuc ja phunz yămz Sa-mê-na jiux pangx nyăngz stinz munh coong:

‘Ayx coonz yâuc ayx stêtb mâyv wax Tauh, tayc ninyh năngx săngh taih wax Tauh, Nănh coong năngđ nâyx: 9“Yaz pâyz tuz mâyh nyăngz zâuđ nanc cloon mâyh zâuđ nyăngz jau (max cun, mâyh jinh đangh puv quâyx), yâuc zuc tăng cănh nhlimc stiz ayx Yu-tai munh six stiz max zâyf wax đomc munh coong huđ ănz, stiz six săngh Sax-tanx wax peob munh. 10Năngx gâyf cumh nzav Mâyh cayx zuc pongh nyăngz dlayc. Phanv mangc, manđ cayx zoz nyâuh ah phanx ninyh ănz nzauh phunz nyâuh zuc stâyv nyâuđ, nyâuh six zuc tanyđ zâuđ nanc săpc noib cah njaf. Oix zuc neetb stimz zen năngx tauv tayc, nzof yaz six sađ săngh mengc nyăngz tany phunz mâyh. 11Laiv lanh naih bah noomh, oix zuc mungv Singx-Lingh coong ănz wax đomc jiux pangx nyăngz wac. Laiv lanh tuz hingh songđ max zâuđ năngx zuc hoiđ yămz tah nyâyc hâyđ tayc.”’

12Oix zuc ja phunz yămz Bê-ga-mam jiux pangx nyăngz stinz munh coong:

‘Naih iz minb njayc nyăngz nzuc đao wax Tauh coong năngđ nâyx: 13“Yaz pâyz mâyh yămz nyăngz tinc, six Sax-tanx nyăngz tinc, six mâyh yâuc caođ tăngđ yaz nyăngz manyh, yâuc max quanyf Yaz, max cun yămz wax đomc noib An-ti-batc, senz Yaz nyăngz ah lanh neetb stimz nyăngz zanyx manyf munh wax tauh, zuc tayx tayc yămz nyâuh nyăngz cah đangc, six Sax-tanx yămz wax nomz tinc. 14Six, Yaz naih ah huungđ oix coong mâyh, Wâyc yămz wa, mâyh naih ah phanx munh lêpc Ba-la-am nyăngz gâyf, wax tauh munh nzaox Ba-lak tăpx zuc tib nyăngz njăuz ănz I-sa-la-ên munh nyăngz cah đangc, nhlinc congx miuc hanyh nyăngz tax huungđ yâuc ayx pongz lauh nyăngz jau. 15Nzof lauf tinyh năngđ, mâyh yâuc naih ah phanx munh ninyh lêpc Ni-cô-lau wax huungđ munh nyăngz gâyf. 16Wâyc nây, oix zuc nhlimc stoif! Năngđ max têx, Yaz six cănb căn ninyh pongh mâyh, nongc Yaz nyăngz nzetx wax zuungz nzuc đao cloon stiz bopc zax. 17Laiv lanh naih bah noomh, oix zuc mungv Singx-Lingh coong ănz wax đomc jiux pangx nyăngz wac. Laiv lanh tuz hingh, Yaz six sađ pinyx vâyv nyăngz Ma-na phunz nănh, nzof Yaz yâuc sađ ah nomz njăuz pec phunz nănh, yămz wax nomz njăuz six naih ja ah nomz săngb bux, nzof wax nomz bux six max naih mănv pâyz blătc nzuf tuz stipx nyăngz munh.”’

18Oix zuc ja phunz yămz wa Ti-ya-ti-la jiux pangx nyăngz stinz munh coong:

‘Zâu Tênb-Huungh nyăngz Toonz, naih mâyc cayx năngđ tâuf byetc nâyx nzof staux yâuc cayx năngđ tongh eeng yâuh yâuh wax Tauh, coong năngđ nâyx: 19“Yaz pâyz tuz mâyh nyăngz cumh pâuz, mâyh nyăngz stăngz, mâyh nyăngz zen stimz, mâyh bokc dlic nyăngz jau, mâyh yâuc naih stimz đao tanyđ tuz, nzof cah đangz mâyh ayx nyăngz cumh pâuz yâuc năngx nzongf têx cah đangc ayx nyăngz cumh pâuz. 20Six Yaz naih ah huungđ oix coong mâyh, nây six mâyh nyangc phunz wax tauh munh nzif Yê-sê-bên, nănh cănh nhlimc coong nănh six tâuc wac munh nzif, nănh nzaox yâuc jaf Yaz wax đomc pâuz ninyh pamf pongz lauh nyăngz stoif, yâuc nhlinc congx miuc hanyh nyăngz tax huungđ. 21Yaz phunz săngx huđ phunz nănh nongc nhlimc stoif, six nănh max oix nhlimc stoif yămz nănh ayx wax đomc pongz lauh nyăngz jau. 22Phanv mangc bex! Yaz six quanyf nănh phâyx wa zâuv munz zâuđ, nzof laiv lanh pamf pongz lauh nyăngz stoif, bix stiz năngđ max nhlimc tauv nănh wax đomc stoif têx, six lauf zuc cloon nănh quanyf nzac zâuđ nanc lub. 23Yaz six bopc nănh nyăngz sây stunz tayc nzuf, nzof wax đomc muif nomz jiux pangx six pâyz tuz coong, Yaz six zah mangc munh nyăngz stimz nyâuđ wax Tauh, nzof Yaz six âyz nyâuh muif lanh munh ayx nyăngz cumh pâuz bix sađ phunz nyâuh. 24Six, năngx yăngc nzac yămz wa Ti-ya-ti-la wax đomc munh, six max ayx âyz wax đomc gâyf nyăngz munh, yâuc max zeengx pâyz tauv Sax-tanx wax đomc đôz nyăngz jau, cayx năngđ naih ah phanx munh coong nâyx, wax đomc, Yaz coong ănz nyâuh: "Yaz max pâu laiv huungđ đamx niđ phunz nyâuh. 25Six, nyâuh oix zuc nzac jab nzauf năngx tăngđ nyâuh naih nyăngz ayx tuz tauv laiv zanyf Yaz taih."

26Laiv lanh tuz hingh yâuc nzauf Yaz nyăngz cumh pâuz tuz tauv stêtb mâyv, Yaz six sađ phunz nănh lanyh lanyf cun manf côkz.

27"Nănh six nongc ah stinz njab pya cun nănh stiz,

cayx năngđ wax đomc nib eengz zuc bopc yungc nzuf nâyx,"

28lauf cayx năngđ Yaz tuz stipx lanyf tăng Yaz nyăngz Pha nâyx, nzof Yaz six sađ phunz nănh bah đoomz njâu nyăngz stingz tau. 29Laiv lanh naih bah noomh, oix zuc mungv Singx-Lingh coong ănz wax đomc jiux pangx nyăngz wac.”’