Hinđ-yangh 1

1Zâu Yê-su Jix-Tuz hinđ yangh nyăngz jau, tuz tăng Zâu Tênb-Huungh sađ phunz Nănh, nongc nzâyz taih hinđ phunz Nănh nyăngz pâuz wax đomc cayx zuc setb taih nyăngz dlayc. Nănh songđ paiđ Nănh nyăngz stinz munh taih hinđ wax đomc phunz Yô-hanx, Nănh nyăngz pâuz, 2Yô-hanx six ayx zanyx manyf coong tauv Zâu Tênb-Huungh nyăngz wac cloon Zâu Yê-su Jix-Tuz nyăngz zanyx manyf, six senz nănh tuz phătc quaix nyăngz muif huungđ. 3Laiv lanh toc nâyx đomc tâuc taih nyăngz wac cloon mungv nyăngz munh, bix yâuc ayx âyz tuz ja taih nâyx đomc wac, six senz naih oonz looc gôh, wâyc săngx huđ tauv stătx nzof.

4Yô-hanx pungx phunz nhlic nomz jiux pangx yămz wa Ê-si stâyz phangz: Cloo phunz nyâuh naih Zâu nyăngz pôz yâuc tuz peengh oonz, tăng nâyx zanyf yămz, cah đangc yămz, cah đangz năngx taih wax Tauh, yâuc tăng yămz Nănh wa tinc cah đangc nyăngz nhlic nomz mengc hoonh, 5yâuc tăng Zâu Yê-su Jix-Tuz, six “Neetb stimz nyăngz zanyx manyf munh”, “Ayx zetx Tauh tăng tayc săngh taih nyăngz munh”, yâuc “Cun nây bamh canz nyăngz muif tauh huungh wax Tauh”. Nănh hâuđ lênh pănh, songđ njâuv pănh tuz gâyh đutb pănh nyăngz stoif păngc yămz Nănh nyăngz samđ, 6nzof Nănh yâuc ayx phunz pănh săngh ah nomz côkz, yâuc săngh Zâu Tênb-Huungh nyăngz stayb munh, senz Nănh nyăngz Pha — cloo phunz Nănh tuz gwăngz eeng cloon tômx jab tauv banc stâyv banc đaic. A-meen.

7“Phanv mangc, Nănh yămz wa vănx nzac taih,”

nzof “muif nomz mâyc six tuz phătc Nănh,

njinh wax đomc nzopb Nănh nyăngz munh lauf tuz phătc,”

yămz nib minc nyăngz manf stingx munh “six yônx mengc haoh wâyc Nănh.”

Senz năngđ nâyx, A-meen.

8Zâu six Zâu Tênb-Huungh coong: “Yaz six An-pha cloon Ô-mê-ga, nâyx zanyf Yămz, cah đangc yămz, cah đangz năngx taih wax Tauh, Naih Tômx Jab Wax Tauh.”

9Yaz six Yô-hanx — ah lanh yâuf pez yâuc cloon nyâuh yâuf pez tinyh đoih songc zâuđ nanc, songc côkz, songc tanyđ zâuđ yămz Zâu Yê-su — yaz yămz nây coiđ njeengh hipđ ayx Batc-moot, wâyc Zâu Tênb-Huungh nyăngz wac yâuc wâyc Zâu Yê-su nyăngz zanyx manyf wac. 10Yămz Zâu nyăngz noib, Singx-Lingh taih cun yaz, yaz songđ numđ yămz yaz nyăngz cah đangz naih coong ah zâux wac stingb lub cayx năngđ blungh blex stingb nâyx, 11coong: “Mâyh phătc laiv huungđ oix zuc ja ănz stâub glonc, yâuc pungx ninyh phunz nhlic nomz jiux pangx — phunz Ê-phê-sô, Sa-mê-na, Bê-ga-mam, Ti-ya-ti-la, Sa-đitc, Phi-la-đen-phi-a, cloon lau-đi-sê.” 12Yaz winb đangz lauf nongc mangc jađ jinh đangh coong wac ănz yaz wax huungđ stingb, tauv winb đangz lauf, yaz mangc phătc nhlic nomz sămz toongz zax, 13nzof yămz wax đomc toongz zax mungh tongx naih ah Tauh cayx năngđ Bamh Munh, zuz guyz đao tăpb tauv staox, yâuc naih sămz panyđ camđ wa cah lapc. 14Nănh nyăngz pyây cloon pyây đongz phangb pec cayx năngđ pax jiz yuungh pyâyz, yâuc pec cayx năngđ toongb, Nănh nyăngz mâyc yâuc cayx năngđ tâuf byetc, 15Nănh nyăngz staux cayx năngđ tongh nongc lâuh tâuf sinx taih nâyx eeng yâuh yâuh, Nănh nyăngz stingb buib cayx năngđ womz lub nâyx, 16Nănh nyăngz byaoh saz puf nzauf nhlic nomz stingz tau, yămz Nănh nyăngz nzetx loi ah zuungz iz minb njayc nyăngz nzuc đao setb taih, nzof Nănh nyăngz minb yâuc cayx năngđ bah noib gwăngz tingc wax zanyf nâyx eeng nzomz. 17Yaz ah phătc Nănh wax zanyf, yaz songđ glinyf nzac Nănh nyăngz staux sinh ninyh, cayx năngđ munh tayc nâyx, Nănh songđ tăpx Nănh nyăngz byaoh saz puf ănz yaz, coong: “Năngx gâyf cumh nzav. Yaz six ayx coonz yâuc ayx stêtb mâyv wax Tauh, 18yâuc ayx stâyv quâyx săngh wax Tauh; Yaz zuc tayc, six mangc jađ, Yaz stâyv quâyx săngh tauv banc stâyv banc đaic, Yaz nzauf yămz pâu cloon tayc nyăngz ja zâyh. 19Wâyc nây, mâyh oix zuc ja mâyh phătc nyăngz dlayc, senz nâyx zanyf naih nyăngz dlayc cloon cah đangz phanx cayx setb taih nyăngz dlayc. 20Nây six mâyh phătc yămz Yaz nyăngz byaoh saz puf wax đomc nhlic nomz stingz tau, cloon wa nhlic nomz sămz toongz zax pinyx vâyv nyăngz jau: Nhlic nomz stingz tau six nhlic nomz jiux pangx wax đomc stinz munh, nzof nhlic nomz toongz zax six nhlic nomz jiux pangx.