Hinđ-yangh 21:4

1Tăng wa, yaz phătc săngb guungh săngb nib, wâyc lôx guungh lôx nib quaix nzuf nzof, coiđ yâuc max naih nzof. 2Yaz yâuc phătc đăngb zeengh dlanyh six săngb Yê-lu-sa-lem, tăng Zâu Tênb-Huungh nyăngz tinc yămz wa guungh nzac taih, tuz bênc săngh cayx năngđ ah lanh munh sab stav zoongz quai nongc phunz nănh nyăngz langh nâyx. 3Yaz numđ naih ah zâux wac stingb lub tăng wa huungh tinc taih, coong: “Phanv mangc! Zâu Tênb-Huungh nyăngz njiuh tamf cloon bamh munh yămz, Nănh six cloon stiz yămz, stiz six ayx Nănh nyăngz pec stingx, nzof Zâu Tênb-Huungh six cănh cloon stiz yămz. 4Nănh six stotb nzuf stiz nyăngz mâyc womz, yâuc max naih zuc tayc, max naih stauh, max naih haoh, max naih munz. Wax đomc six max naih nzof; wâyc lôx nyăngz muif huungđ quaix ninyh nzuf.” 5Nzof stâyv wa huungh tinc wax Tauh yâuc coong: “Phanv mangc! Yaz ayx muif huungđ săngb nzuf.” Nănh yâuc coong ănz yaz: “Oix zuc ja wâyc nâyx đomc wac six senz nyăngz yâuc săngh zen.” 6Nănh yâuc coong ănz yaz: “Soongb nzof gôh! Ya six An-pha cloon Ô-mê-ga, six ayx coonz yâuc ayx stêtb mâyv. Laiv lanh nyâuđ gatb, Yaz six cungb phunz săngh mengc nyăngz womz sting phunz nănh hopb. 7Laiv lanh tuz hingh six tuz stipx nâyx đomc phănc, Yaz six ayx nănh nyăngz Zâu Tênb-Huungh, nzof nănh six ayx yaz nyăngz toonz sab. 8Six năngx naih wax đomc tam jenz nyăngz munh, max zen nyăngz munh, naih wâyc nyăngz munh, tayx munh nyăngz munh, ayx pongz lauh nyăngz munh, ayx manđ papz nyăngz munh, paix miuc hanyh nyăngz munh, cloon coong puv maoh nyăngz munh wax đomc, stiz nyăngz phănc six yămz wa tâuf coiđ cah njaf naih tâuf sac cloon wôngh, wa six zuc tayc nyăngz tah nyâyc hâyđ.”

9Tăng wa yămz wa nhlic tauh stinz munh six naih nhlic nomz wăn ănz pong nzuf byăng wa nhlic huungđ staiz nanc nyăngz stinz munh, naih ah tauh taih coong ănz yaz, coong: “Quaix nây taih, yaz six phunz mâyh mangc munh sab stav, Pax Jiz Yuungh Jenz nyăngz au.” 10Nănh songđ ênz yaz ninyh yămz Singx-Lingh cah njaf, tauv ah nomz zoongz yâuc lub yâuc njăngb, nuz phunz yaz mangc đăngb zeengh dlanyh Yê-lu-sa-lem, tăng Zâu Tênb-Huungh nyăngz tinc yămz wa guungh nzac taih, 11naih Zâu Tênb-Huungh nyăngz gwăngz eeng, wax nomz dlanyh quai cayx năngđ ah nomz njăuz pyây saix nâyx, cayx năngđ njăuz zâuz pec, đăngb zeengh cayx năngđ canyx, 12Dlanyh tongc yâuc lub yâuc njăngb, naih săpc nyâyc tungđ dlanyh jeengh cloon săpc nyâyc tauh stinz munh yămz wax đomc dlanyh jeengh, yâuc naih bux ja yămz wax đomc dlanyh jeengh cah zâyc, nzof wax đomc bux six săpc nyâyc stingx I-sa-la-ên munh nyăngz bux. 13Tongz pôngz naih pôz tungđ, păkx pôngz naih pôz tungđ, namh pôngz naih pôz tungđ, staiz pôngz naih pôz tungđ. 14Dlanyh tongc naih săpc nyâyc nomz tay, yămz wa six naih săpc nyâyc nomz bux six Pax Jiz Yuungh Jenz nyăngz săpc nyâyc lanh cumh pâuz munh. 15Coong wac ănz yaz wax tauh stinz munh naih ah stinz sămz nyăngz tungh gaob phunz nănh nongc gaob wax nomz dlanyh, wax đomc dlanyh jeengh cloon dlanyh tongc. 16Dlanyh six tuz ayx phănx tanyz, wax nomz dlanyh đao cloon quăng lauf tinyh nyâuc. Stinz munh nongc wax stinz tungh gaob gaob dlanyh, tuz iz tinb stâyx pez gâyf: Wax nomz dlanyh đao cloon quăng cloon njăngb six tinyh nyâuc nzuf. 17Nănh yâuc gaob wa dlanyh tongc, six guc săpc ngâuf meetx huv âyz bamh munh nyăngz tungh gaob (nzof lauf stinz munh nyăngz). 18Dlanyh tongc six nongc njăuz zâuz zâyv, nzof dlanyh cah njaf six nongc senz sămz zâyv, đăngb zeengh cayx năngđ canyx nâyx. 19Wax đomc dlanyh tongc nyăngz tay six tuz nongc muif huungđ njăuz pyây saix zoongz, zetx nomz tay six zâuz stib, tah nyâyc nomz six zâuz meengz côx, tah stamz nomz six zâuz buđ, tah stâyx nomz six zâuz imz jaz, 20tah ngâuf nomz six zâuz pec stib, tah guc nomz six zâuz stib wăngh, tah jetb nomz six zâuz wăngh imz, tah pêtz nomz six zâuz meengz gunx, tah zu nomz six zâuz wăngh đăngb, tah săpc wax nomz six imz đăngb, săpc byetx wax nomz six zâuz stib tâuf, săpc nyâyc wax nomz six zâuz stib lamh. 21Săpc nyâyc nomz dlanyh jeengh six săpc nyâyc nomz zâu; ah nomz dlanyh jeengh six nongc ah nomz zâuz clunh ayx săngh, dlanyh nyăngz jau lub six nongc senz sămz zâyv, đăngb zeengh cayx năngđ canyx nâyx. 22Yămz wa dlanyh yaz max phătc naih bongc Zâu Tênb-Huungh nyăngz pyau tinyh, wâyc Zâu Tênb-Huungh Naih Tômx Jab Wax Tauh cloon Pax Jiz Yuungh Jenz six ayx bongc Zâu Tênb-Huungh nyăngz pyau yămz wa dlanyh. 23Dlanyh yâuc max zâuđ nongc bah noib nongc lav siux gwăngz phunz, wâyc Zâu Tênb-Huungh nyăngz gwăngz eeng cănh siux gwăngz phunz wax nomz dlanyh, nzof Pax Jiz Yuungh Jenz six ayx dlanyh nyăngz toongz. 24Manf stingx munh six păngc wax nomz dlanyh nyăngz gwăngz setb ninyh setb lauf, guungh đi manf côkz nyăngz huungh yâuc nzâyz stiz nyăngz gwăngz eeng nzac wax nomz dlanyh. 25Dlanyh jeengh muif noib coib goib, wâyc yămz wa max naih guungh munf dlih. 26Munh six nzâyz manf côkz nyăngz gwăngz eeng cloon puv quâyx nzac wa dlanyh ninyh, 27six naih wâyx nyăngz tax huungđ cloon ayx nzayf nyăngz jau cloon jaf munh nyăngz munh six max naih laiv zanyf tuz nzac dlanyh ninyh, cungb tuz ja yămz Pax Jiz Yuungh Jenz nyăngz Săngh Mengc Tanz wax đomc tuz nzac cuungv.