Hinđ-yangh 22

1Tăng wa stinz munh nuz phunz yaz mangc săngh mengc nyăngz womz sting, đăngb zeengh cayx năngđ canyx, tăng Zâu Tênb-Huungh nyăngz tinc cloon Pax Jiz Yuungh Jenz nyăngz tinc đunh setb taih, 2yămz jămc wa dlanyh nyăngz jau lub mungh tongx. Yămz iz leepb wăngx sinh six naih săngh mengc nyăngz njăngx săngh săpc nyâyc toongv pyâu, ah lav săngh ah toongv pyâu, nzof njăngx nyăngz noomh six nongc zany manf côkz munh nyăngz gumc. 3Yâuc max naih zuc zaux nyăngz jau nzof, wâyc Zâu Tênb-Huungh cloon Pax Jiz Yuungh Jenz nyăngz tinc six yămz wa dlanyh cah njaf, nzof Nănh wax đomc pâuz six bokc dlic Nănh. 4Stiz six tuz phătc Nănh nyăngz minb, nzof Nănh nyăngz manyh yâuc yămz stiz wa pyây ploongh. 5Yâuc max naih guungh munf dlih, munh max zâuđ sămv zuc nongc toongz max six bah noib siux gwăngz, wâyc Zâu Tênb-Huungh six cănh siux nănh stiz, stiz yâuc tuz cun tauv banc stâyv, banc đaic.

6Wax zanyf, stinz munh coong ănz yaz, coong: “Nâyx đomc wac six senz nyăngz yâuc săngh zen. Zâu Tênb-Huungh six wax đomc tâuc wac munh nyăngz stimz stingx wax Tauh, paiđ Nănh nyăngz stinz munh hinđ manyf phunz Nănh nyăngz pâuz wax đomc cayx zuc setb taih nyăngz dlayc.” 7“Phanv mangc! Yaz six taih căn! Laiv lanh âyz nâyx zây stâub tâuc taih nyăngz wac ayx six senz naih oonz looc gôh.”

8Yaz six Yô-hanx, tuz phătc yâuc tuz numđ nâyx đomc jau nyăngz munh. Yaz phătc yâuc numđ wax zanyf, yaz songđ coonx puc nzac paix wax tauh stinz munh nyăngz staux sinh, six hinđ nâyx đomc jau phunz yaz wax tauh stinz munh, 9Six wax tauh stinz munh coong ănz yaz, coong: “Năngx gâyf ayx nâyx! Yaz six cloon mâyh tinyh đoih ayx pâuz, yâuc cloon mâyh wax đomc yâuf pez, cloon wax đomc tâuc wac munh, cloon âyz nâyx zây stâub nyăngz wac ayx wax đomc munh. Oix zuc canyx bongc Zâu Tênb-Huungh!”

10Nănh zef coong ănz yaz, coong: “Năngx gâyf tăpb yenx omz nâyx zây stâub tâuc taih nyăngz wac, wâyc săngx huđ tauv stătx gôh. 11Max đăngb zeengh nyăngz munh, yâuc njinh luh max đăngb zeengh. Naih wâyx nyăngz munh yâuc njinh luh naih wâyx. Peengh stimz nyăngz munh yâuc njinh luh ayx peengh stimz nyăngz jau. Laiv lanh đăngb zeengh yâuc njinh luh tuz đăngb zeengh.” 12“Phanv mangc! Yaz six taih căn, nzâyz cloon sâuđ nyâyc lêpc Yaz taih, nongc âyz muif lanh munh ayx nyăngz cumh pâuz six năngđ laix bix clao phunz stiz. 13Yaz six An-pha cloon Ô-mê-ga, six ayx tah yetx yâuc ayx nzuf byăng, ayx coonz yâuc ayx stêtb mâyv. 14Wax đomc munh đuv dlăngc stiz nyăngz guyz đao, phunz stiz hayh tuz ninyh tauv săngh mengc nyăngz njăngx yâuc tuz quaix wax đomc dlanyh jeengh nzac dlanyh cah njaf ninyh six senz naih oonz looc gôh. 15Six wax đomc clô, cloon wax đomc ayx manđ papz nyăngz munh, ayx pongz lauh nyăngz munh, tayx munh nyăngz munh, paix miuc hanyh nyăngz munh, cloon numđ nyađ ayx yâuc coong puv maoh nyăngz munh wax đomc six yămz wa cungh ngwaic nzuf.

16Yaz six Yê-su, paiđ Yaz nyăngz stinz munh nongc ayx zanyx manyf phunz mâyh tauv nâyx đomc jau cloon wax đomc jiux pangx. Yaz six ayx coonz yâuc ayx Đa-witx huungh nyăngz sây stunz, six bah đoomz nyăngz stingz tau eeng nzomz.”

17Singx-Lingh cloon Munh Sab Stav coong: “Taih gôh!” Laiv lanh numđ, lauf oix zuc coong: “Taih gôh!” Laiv lanh nyâuđ gatb, bix taih. Laiv lanh oix bix taih stipx nây cungb phunz nyăngz săngh mengc womz.

18Yaz ayx zanyx manyf phunz yetx stong mungv nâyx zây stâub tâuc taih nyăngz wac wax đomc munh, coong: “Năngđ coong laiv lanh pâu luungđ ănz nâyx đomc, Zâu Tênb-Huungh six lauf pâu tuz ja taih yămz nâyx zây stâub wax đomc staiz nanc phunz wax tauh munh. 19Nzof năngđ coong laiv lanh quanyf tăng nâyx zây stâub tâuc taih nyăngz wac laiv huungđ, Zâu Tênb-Huungh six lauf zoz setb wax tauh munh nyăngz phănc gâyh tuz ja taih yămz nâyx zây stâub cah njaf nyăngz săngh mengc njăngx cloon đăngb zeengh dlanyh.”

20Ayx zanyx manyf phunz nâyx đomc wax Tauh coong: “Senz toix! Yaz six taih căn.” A-meen! Zâu Yê-su lex, joođ taih!

21Cloo Zâu Yê-su nyăngz pôz cloon nyâuh tinyh đoih yămz. A-meen.