Hinđ-yangh 20

1Yaz phătc naih ah tauh stinz munh tăng wa guungh nzac taih, nzauf wax nomz tuungh tămx cotb max naih cah tôz nyăngz ja zâyh cloon ah stinz njab langb lub wa puf. 2Nănh toopz zoz wax tauh côngz, six lôx noib wax tauh nangz, six manđ nyăngz huungh, six Sax-tanx, taih stayb nănh ah tinb nyăngv. 3Stinz munh quanyf nănh ănz nzac wa tuungh tămx cotb max naih cah tôz ninyh, yâuc omz wa cotb nzetx tăpb yenx ănz, wâyc max phunz nănh ninyh jaf manf côkz munh, zu tauv laiv zanyf pong wa ah tinb nyăngv. Blătc wa nănh zef tuz pungx setb tix cay ah dlapc max lauh.

4Yaz yâuc phătc wax đomc huungh tinc cloon stâyv wa huungh tinc nyăngz munh, stiz tuz stipx lanyf nongc stămđ stoif, yaz phătc, wâyc ayx zanyx manyf phunz Zâu Yê-su yâuc wâyc Zâu Tênb-Huungh nyăngz gâyf bix zuc zăpb clangz tayc wax đomc munh nyăngz mengc hoonh, cloon max paix bongc wax tauh jămx staov cloon nănh nyăngz hanyh tongc, yâuc max ănz nănh nyăngz yenx ănz wa puf, max six ănz wa pyây ploongh wax đomc munh nyăngz mengc hoonh. Stiz tuz săngh taih yâuc cloon Zâu Jix-Tuz cun ah tinb nyăngv. 5(Năngx naih yăngc nzac wax đomc tayc nyăngz munh six max tuz săngh taih, ayx tuz tauv laiv zanyf pong wa ah tinb nyăngv.) Nây six zetx yămc munh tuz săngh taih. 6Laiv lanh tuz naih phănc yămz nây săngh taih nyăngz zetx yămc munh six senz naih oonz looc yâuc đăngb zeengh gôh! Tah nyâyc hâyđ tayc six max naih laiv huungđ lanyf cun tauv nănh stiz, stiz six săngh Zâu Tênb-Huungh cloon Zâu Jix-Tuz nyăngz stayb munh, yâuc tuz cloon Nănh cun ah tinb nyăngv.

7Six tauv pong wa ah tinb nyăngv, Sax-tanx zef tuz pungx setb nănh wax nomz nzauh taih, 8Nănh six ninyh jaf manf côkz munh yămz pyâyz phangz nib minc, six Gok cloon Ma-gok nyăngz pec stingx, wâyc ênz stiz taih căpx dlonf nongc bopc zax. Nănh stiz hongđ cayx năngđ coiđ sinh nyăngz njăuz staiz. 9Stiz tinyh ênz ninyh nzêux pong wa nib minc quib nzêux wax đomc đăngb zeengh munh nyăngz njiuh đungc cloon stăngz nyăngz dlanyh, tăng wa tâuf songđ tăng guungh nzac taih puf nănh stiz nzuf. 10Nzof manđ nyăngz huungh six jaf stiz wax tauh, zuc quanyf nzac wa tâuf coiđ ninyh naih cloon wôngh, yămz wa six naih wax tauh jămx staov cloon za tâuc wac munh nzof, stiz six noib munf zuc wâyb ayx tuz tauv banc stâyv banc đaic.

11Tăng wa, yaz phătc naih ah nomz huungh tinc lub phangb pec yâuc naih ah Tauh stâyv wa huungh tinc, guungh cloon nib yămz Nănh nyăngz cah đangc songđ tiuv nzuf, yâuc max phătc naih stiz yămz nyăngz tinc nzof. 12Yaz yâuc phătc wax đomc munh tayc njinh lub njinh jenz, stâuđ yămz wa huungh tinc nyăngz cah đangc, nzof wax đomc stâub songđ tuz coib goib, zef naih pitc glonc stâub tuz coib goib, six Săngh Mengc Tanz. Wax đomc munh tayc zuc stămđ stoif âyz năngđ ja taih yămz wax đomc stâub nâyx, âyz stiz ayx nyăngz cumh pâuz. 13Coiđ yâuc nôpc yămz coiđ đi wax đomc munh tayc, tayc nyăngz jab cloon yămz pâu lauf nôpc yămz stiz wax đomc munh tayc, nzof muif lanh munh yâuc zuc stămđ stoif âyz năngđ stiz ayx wax đomc cumh pâuz. 14Nzof tayc nyăngz jab cloon yămz pâu six zuc quanyf nzac tâuf coiđ ninyh, nây six zuc tayc nyăngz tah nyâyc hâyđ — six tâuf coiđ. 15Năngđ coong laiv lanh max naih bux ja yămz Săngh Mengc Tanz, wax tauh six zuc quanyf nzac tâuf coiđ ninyh.