Hinđ-yangh 19

1Blătc wa, yaz numđ naih coong wac stingb lub cayx năngđ ah peob munh hongđ nzongf nyăngz stingb nâyx, yămz wa guungh coong:

“A-lê-lu-ya!

Njâuv pôz nyăngz jau, cloon gwăngz eeng, cloon tômx jab six yămz pănh nyăngz Zâu Tênb-Huungh,

2Nănh stămđ stoif nyăngz jau six senz nyăngz yâuc peengh stimz,

Nănh yâuc tingc ayx pyây wax tauh pongh lauh munh nzif nyăngz stoif,

wâyc wax tauh munh nzif nongc nănh pongz lauh nyăngz jau ayx huđ nib minc.

Nănh songđ clao yônz phunz Nănh wax đomc pâuz,

senz tăng wax tauh munh nzif nyăngz puf ayx setb nyăngz samđ.”

3Stiz zef coong tah nyâyc hâyđ timb coong:

“A-lê-lu-ya!

Nănh wax đomc tâuf sâuv six đayv staox tauv banc stâyv banc đaic.”

4Wa nhlic săpc stâyx lanh munh côx cloon wa pyâyz tauh săngh nyăngz tax huungđ songđ puc nzac paix Zâu Tênb-Huungh, senz stâyv wa huungh tinc wax Tauh, yâuc coong:

“A-meen. A-lê-lu-ya!”

5Naih ah zâux wac stingb tăng wa huungh tinc setb taih, coong:

“Oix zuc tanv pănh nyăngz Zâu Tênb-Huungh,

Nănh nyăngz muif lanh pâuz lex,

yetx stong cumh nzav Nănh nyăngz munh,

njinh lub cloon jenz!”

6Yaz zef numđ naih stingb coong wac cayx năngđ ah peob munh hongđ nzongf nyăngz stingb, yâuc cayx năngđ womz lub buib, yâuc cayx năngđ bah congz haoh stingb lub nâyx, coong:

“A-lê-lu-ya!

Wâyc Zâu six pănh nyăngz Zâu Tênb-Huungh, senz naih tômx jab wax Tauh, yâuc naih lanyf cun.

7Pănh oix zuc numđ nyađ, oonz looc,

yâuc stungx gwăngz eeng phunz Nănh

wâyc Pax Jiz Yuungh Jenz ayx coonx nyăngz noib taih tauv nzof,

Nănh nyăngz munh sab stav yâuc bênc săngh nzuf,

8wax tauh munh sab stav tuz sađ phunz nyăngz

six đôc buyx byăng nănh tuz zuz guyz quav eeng đăngb zeengh.”

(Nây đôc buyx byăng six wax đomc đăngb zeengh munh ayx nyăngz peengh stimz cumh pâuz.)

9Wax tauh stinz munh coong ănz yaz: “Oix zuc ja: Laiv lanh tuz êu taih nzac Pax Jiz Yuungh Jenz nyăngz ayx coonx hinh six senz naih oonz looc gôh.” Nănh zef coong ănz yaz: “Nây six Zâu Tênb-Huungh nyăngz senz wac.” 10Yaz puc nzac stinz munh nyăngz staux sinh ninyh paix nănh, six nănh coong ănz yaz: “Năngx gâyf ayx nâyx! Yaz six lauf cloon mâyh tinyh đoih ayx pâuz yâuc cloon mâyh wax đomc yâuf pez, six ayx âyz Zâu Yê-su nyăngz zanyx manyf wac wax đomc. Oix zuc paix bongc Zâu Tênb-Huungh, wâyc Zâu Yê-su nyăngz zanyx manyf wac six ayx tâuc wac nyăngz coonz.”

11Yaz phătc guungh coib goib, yâuc mangc phătc naih ah tauh maf pec, zâyh wa maf wax Tauh six hipđ ayx neetb stimz yâuc senz nyăngz, Nănh stămđ stoif cloon bopc zax six âyz peengh stimz nyăngz jau. 12Nănh nyăngz mâyc cayx năngđ tâuf byetc, Nănh nyăngz pyây đongx đuungx nomz tany, naih ja ah nomz manyh bux, blătc nzuf Nănh max naih mănv pâyz tuz. 13Nănh zuz ah byenđ guyz đao yoomf quaix samđ, Nănh nyăngz manyh bux six hipđ ayx Zâu Tênb-Huungh nyăngz wac. 14Yămz wa guungh wax đomc peengz zâyh maf pec lêpc Nănh ninyh, zuz đôc buyx byăng pec đăngb zeengh. 15Naih ah zuungz nzuc đao njayc tăng Nănh nyăngz nzetx setb taih, păngc wa Nănh bix bopc manf côkz, Nănh yâuc nongc njab pya cun nănh stiz, nzof Nănh yâuc zaiđ njenđ Naih Tômx Jab Wax Tauh Zâu Tênb-Huungh siv nhlenx lub wax nomz ngatc tungh cuđ tiu stôh. 16Nănh naih ah nomz manyh bux tuz ja ănz Nănh nyăngz guyz đao cloon wa staux bong, coong: “Manf zâu nyăngz Zâu, manf huungh nyăngz Huungh.”

17Yaz phătc ah tauh stinz munh stâuđ yămz wa bah noib cah njaf, yâuc hamv stingb lub coong ănz wax đomc đayv yămz wa đamx guungh nyăngz muif huungđ nooc, coong: “Taih gôh, taih căpx dlonf yămz Zâu Tênb-Huungh nyăngz hinh lub, 18nongc nhlinc wax đomc huungh stix nyăngz a, cloon quanz lub nyăngz a, peengz pyây nyăngz a, cloon wax đomc maf nyăngz a cloon zâyh maf nyăngz peengz, cloon munh tinyh đoih nyăngz a, njinh ayx nâuh cloon max ayx nâuh, njinh lub cloon jenz.”

19Yaz yâuc phătc jămx staov cloon guungh đi nyăngz muif tauh huungh cloon stiz wax đomc peengz căpx dlonf taih, nongc cloon zâyh wa maf wax Tauh cloon lêpc Nănh wax đomc peengz bopc zax. 20Wax tauh jămx staov cloon wax tauh za tâuc wac munh songđ zuc zoz, six yămz jămx staov nyăngz cah đangc ayx wax đomc jix caox njingc, yâuc nongc wax đomc jix caox njingc, nănh bix jaf ănz jămx staov nyăngz yenx wax đomc munh cloon paix bongc jămx staov nyăngz hanyh tongc wax đomc. Stiz iz lanh zuc njinh săngh quanyf ănz nzac tâuf coiđ ninyh zuc pu sac yâuc naih wôngh. 21Năngx yăngc nzac wax đomc six zuc tăng zâyh wa maf cah zâyc wax Tauh nyăngz nzuc đao tayx tayc, senz tăng Nănh nyăngz nzetx setb taih wax zuungz nzuc đao, nzof yetx stong nooc yâuc tuz nhlinc stiz nyăngz a pêu nzuf.