Hinđ-yangh 16

1Yaz numđ naih ah zâux wac stingb lub tăng bongc Zâu Tênb-Huungh nyăngz pyau coong ănz wa nhlic tauh stinz munh, coong: “Oix zuc ninyh lokc Zâu Tênb-Huungh tingc stoif nyăngz nhlic nomz wăn nzac nib ninyh gôh.”

2Tah yetx tauh stinz munh ninyh lokx nănh nyăngz wăn nzac nib ninyh, wax đomc ănz jămz staov nyăngz yenx cloon paix bongc nănh nyăngz hanyh tongc wax đomc munh songđ phutx claix lub munz zâuđ nzongf.

3Tah nyâyc tauh stinz munh lokx Nănh nyăngz wăn nzac coiđ ninyh, coiđ songđ wav pênx samđ, cayx năngđ munh tayc samđ, nzof yămz wa coiđ naih mengc săngh nyăngz muif huungđ songđ tayc nzuf.

4Tah stamz tauh stinz munh lokx nănh nyăngz wăn nzac wax đomc wăngx cloon womz sting, womz songđ wav pênx samđ. 5Yaz numđ womz nyăngz stinz munh coong:

“Nâyx zanyf yămz cah đangc yămz wax Tauh lex, Mâyh six đăngb zeengh, yâuc senz peengh stimz

wâyc Mâyh stămđ nâyx đomc jau năngđ nâyx.

6Wâyc stiz ayx phunz wax đomc đăngb zeengh munh cloon wax đomc tâuc wac munh nyăngz samđ setb,

wâyc nây Mâyh phunz nănh stiz hopb samđ;

senz hoođ nzongf.”

7Yaz yâuc numđ wa congx tinc coong wac:

“Toix gôh, Zâu lex, senz naih tômx jab nyăngz Zâu Tênb-Huungh,

Mâyh stămđ stoif nyăngz jau six senz nyăngz yâuc peengh stimz.”

8Tah stamz tauh stinz munh lokx nănh nyăngz wăn nzac bah noib ninyh, bah noib songđ nongc tâuf pu munh. 9Munh songđ zuc tâuf joomz pu plaz neetb nzongf, stiz songđ coong pamf Zâu Tênb-Huungh nyăngz manyh, senz naih lanyf yămz nâyx đomc staiz nanc wax Tauh, stiz yâuc max nhlimc stoif nongc stungx gwăngz eeng phunz Nănh.

10Tah ngâuf tauh stinz munh lokx nănh nyăngz wăn nzac wax tauh jămx staov nyăngz tinc, nănh nyăngz côkz songđ nzămc meengh, munh songđ tăpc byetc wâyc munz zâuđ. 11Stiz coong pamf wa guungh nyăngz Zâu Tênb-Huungh wâyc stiz munz zâuđ cloon wâyc stiz săngh wax đomc claix sâyh, stiz yâuc max nhlimc stoif tauv stiz ayx wax đomc cumh pâuz.

12Tah guc tauh stinz munh lokx nănh nyăngz wăn nzac Yu-phê-titc wăngx lub, wax nomz wăngx womz songđ gaib gâu, nongc coib jau phunz tăng tongz pôngz taih wax đomc huungh stix tuz naih jau. 13Yaz phătc tăng côngz nyăngz nzetx, tăng jămx staov nyăngz nzetx, yâuc tăng za tâuc wac munh nyăngz nzetx, naih pôz tauh manđ yootz cayx năngđ zeeng staob nâyx setb taih, 14wâyc stiz six wax đomc manđ ayx đuungx huungđ jix caox njingc, stiz ninyh pongh yămz nzêux nây guungh đi wax đomc huungh stix, wâyc ênz stiz taih căpx dlonf nongc bopc zax yămz Zâu Tênb-Huungh nyăngz noib lub, senz naih tômx jab wax Tauh. 15(“Phanv mangc bex! Yaz taih six cayx năngđ stac munh! Laiv lanh sting điub yâuc leđ tuz nănh nyăngz guyz đao six senz naih oonz looc gôh, nănh max zâuđ zuc căng căng bix ninyh, nzof munh yâuc phătc nănh zuc nyayz.”) 16Stiz ênz wax đomc huungh stix taih căpx dlonf yămz ah nomz tinc Hipđ-lu wac six coong A-ma-gêtc-đôn.

17Tah jetb tauh stinz munh lokx nănh nyăngz wăn nzac nzaox siv ninyh, tăng bongc Zâu Tênb-Huungh nyăngz pyau cah njaf nyăngz huungh tinc naih ah zâux wac stingb lub nhlangđ setb taih, coong: “Soongb nzuf nzof gôh!” 18Songđ naih bungh bitc tâuf nzăpc cloon sax huungđ stingb buib, cloon bah congz haoh, naih ah tâuc nib tongf lub setb taih — wax tâuc nib tongf njoongh nzongf yâuc lub nzongf ayx tuz tăng naih bamh munh yămz nây nib minc max zeengx naih quaix laiv hâyđ năngđ nâyx. 19Wax nomz dlanyh lub zuc coongf ayx pôz phănc, nzof muif nomz côkz nyăngz dlanyh yâuc zuc lakb nzuf, nzof Zâu Tênb-Huungh yâuc săngx tauv Ba-bi-lôn lub Nănh songđ phunz ah zan tingc stoif lub nyăngz tiu phunz nănh. 20Muif nomz coiđ njeengh pyăux nzuf, nzof wax đomc zoongz zâyc yâuc max phătc naih. 21Wax đomc pyoc nomz lub cox naih stâyx săpc sanz tăng guungh tuih nzac taih bopb munh, munh songđ wâyc wax đomc pyoc bix coong pamf Zâu Tênb-Huungh, wâyc wax huungđ staiz nanc senz neetb nzongf.