Hinđ-yangh 15

1Yaz zef phătc naih ah huungđ njic hoouđ yâuc lub yâuc njingc yămz wa guungh: naih nhlic tauh stinz munh jinh đangc nzauf nzuf byăng wax đomc nhlic huungđ staiz nanc, wâyc Zâu Tênb-Huungh tingc stoif nyăngz jau six tuz cloopb dlonf yămz stiz nzuf.

2Yaz yâuc phătc naih ah huungđ cayx năngđ canyx coiđ zanb cloon tâuf nâyx. Wax đomc tuz hingh quaix jămx staov, cloon hingh quaix nănh nyăngz hanyh tongc, cloon hingh quaix nănh nyăngz bux nyăngz sôx wax đomc munh, jinh đangh stâuđ yămz wa canyx coiđ, yâuc nzauf Zâu Tênb-Huungh nyăngz lanyh njămh. 3Stiz ayx Zâu Tênb-Huungh nyăngz pâuz, Mô-sê nyăngz nzungz, cloon Pax Jiz Yuungh Jenz nyăngz nzungz, coong:

“Zâu six Zâu Tênb-Huungh lex, senz naih tômx jab wax Tauh,

Mâyh ayx nyăngz cumh pâuz senz lub nzongf yâuc njingc nzongf.

Stâyv quâyx yămz nyăngz Huungh lex,

Mâyh nyăngz jau six peengh stimz yâuc senz nyăngz.

4Zâu lex, naih mănv bix max cumh nzav,

yâuc max tanv Mâyh nyăngz manyh heh?

Wâyc cungb Mâyh ah tauh six đăngb zeengh cuungv.

Nzof manf côkz munh six taih

yămz Mâyh nyăngz cah đangc canyx bongc,

wâyc Mâyh wax đomc peengh stimz nyăngz jau tuz hinđ manyf setb taih.”

5Tăng wa, yaz mangc phătc, bongc Zâu Tênb-Huungh nyăngz pyau wax nomz nyunc nhlengc wac nyăngz njiuh yămz wa guungh tuz coib setb taih. 6Wa nhlic tauh stinz munh nzauf nhlic huungđ staiz nanc tăng bongc Zâu Tênb-Huungh nyăngz pyau setb taih, zuz đôc buyx byăng guyz quav đăngb zeengh, eeng nzomz, yâuc naih sămz panyđ camđ wa cah lapc. 7Nzof wa pyâyz tauh săngh nyăngz tax huungđ, naih ah tauh jaoz phunz wa nhlic tauh stinz munh nhlic nomz sămz wăn, ănz pong nzuf Zâu Tênb-Huungh tingc stoif nyăngz jau, senz stâyv quâyx săngh tauv banc stâyv banc đaic wax Tauh. 8Bongc Zâu Tênb-Huungh nyăngz pyau songđ naih tâuf sâuv pong nzuf, wâyc Zâu Tênb-Huungh nyăngz gwăngz eeng cloon nănh nyăngz tômx jab, max naih mănv hayh tuz nzac bongc Zâu Tênb-Huungh nyăngz pyau ninyh, ayx tuz tauv laiv zanyf wa nhlic tauh stinz munh nzâyz wa nhlic huungđ staiz nanc tuz ayx săngh nzuf.