Hinđ-yangh 14

1Tăng wa yaz mangc, songđ phătc Pax Jiz Yuungh Jenz stâuđ yămz wa Si-ôn zoongz, cloon Nănh yămz wa nyăngz munh six ah pez stâyx săpc stâyx tinb lanh, naih Nănh nyăngz manyh cloon Nănh nyăngz Pha nyăngz manyh tuz ja ănz stiz nyăngz pyây ploongh. 2Yaz yâuc numđ wac stingb tăng wa guungh cayx năngđ womz lub buib juunf juunf têx, yâuc cayx năngđ bah congz haoh stingb lub nâyx, nzof yaz numđ wax cuyb stingb six cayx năngđ quetb lanyh njămh nyăngz munh quetb nănh nyăngz lanyh njămh nâyx. 3Stiz ayx ah baih săngb nzungz yămz wa huungh tinc cah đangc cloon pyâyz tauh săngh nyăngz tax huungđ cloon wax đomc munh côx nyăngz cah đangc, max naih mănv hayh hoođ tuz wax baih nzungz blătc nzuf wa ah pez stâyx săpc stâyx tinb lanh munh tuz suc tăng wa nib minc setb taih. 4Wax đomc munh six max zeengx naih wâyx cloon munh nzif, stiz six wax đomc đăngb zeengh nyăngz munh. Pax Jiz Yuungh Jenz ninyh laiv stiz lauf tuz lêpc Nănh ninyh. Nâyx đomc munh six tuz suc tăng bamh munh setb taih, nongc ayx zetx toongv pyâu phunz Zâu Tênb-Huungh cloon Pax Jiz Yuungh Jenz, 5yămz stiz nyăngz nzetx max phătc naih puv maoh nyăngz wac, stiz yâuc max naih paz tiny.

6Yaz zef phătc pitc tauh stinz munh đayv yămz wa đamx guungh, naih stâyv quâyx yămz nyăngz Cuđ Jenx tuz nzônh phunz guungh đi munh — njinh phunz muif nomz côkz, muif stingx munh, muif huungđ wac cloon muif huungđ munh — 7hamv stingb lub coong: “Oix zuc cumh nzav Zâu Tênb-Huungh bix tanv Nănh, wâyc Nănh stămđ stoif nyăngz săngx huđ tauv gôh. Oix zuc paix bongc zuyx guungh, zuyx nib, zuyx coiđ, cloon muif nomz womz sting wax Tauh.”

8Zef naih tah nyâyc tauh stinz munh, lêpc đangz taih, yâuc coong: “Lakb nzof gôh, Ba-bi-lôn lub lakb nzof gôh, nănh hox phunz manf côkz munh hopb nănh zuc tingc stoif nyăngz pongz lauh tiu.”

9Zef naih tah stamz tauh stinz munh, lêpc stiz đangz taih, yâuc hamv stingb lub coong: “Năngđ coong laiv lanh paix bongc wax tauh jămx staov cloon nănh nyăngz hanyh tongc, yâuc stipx nănh nyăngz yenx ănz wa pyây ploongh max six ănz nănh nyăngz puf, 10wax lanh munh six lauf zuc hopb Zâu Tênb-Huungh tingc stoif nyăngz zan, nây huungđ tiu six max zanb luungđ zămđ ănz Nănh siv nhlenx nyăngz zan, nzof wax lanh munh six zuc tâuf cloon wôngh wâyb yămz wax đomc đăngb zeengh nyăngz stinz munh cah đangc cloon Pax Jiz Yuungh Jenz nyăngz cah đangc. 11Tăng stiz zuc wâyb wax nomz tinc nyăngz tâuf sâuv đayv staox tuz tauv banc stâyv, banc đaic, stiz noib munf max naih laiv zanyf tuz hitb conv, nây six paix bongc jămx staov cloon nănh nyăngz hanyh tongc wax đomc munh, cloon ănz nănh nyăngz bux nyăngz yenx wax đomc. 12Năngđ nây wax đomc đăngb zeengh munh six oix zuc naih nyâuđ tanyđ zâuđ, six senz âyz Zâu Tênb-Huungh nyăngz lanyf ayx yâuc zen caođ Zâu Yê-su wax đomc munh.”

13Yaz numđ naih ah zâux wac stingb tăng wa guungh coong: “Oix zuc ja: Tăng nây staox ninyh, laiv lanh munh tayc six tayc yămz Zâu cah njaf wax đomc, senz naih oonz looc gôh.” Singx-Lingh coong: “Senz toix, phunz stiz tuz sec hitb conv gâyh stiz ayx nyăngz cumh pâuz zâuđ, nzof stiz ayx nyăngz cumh pâuz yâuc tuz lêpc stiz ninyh.”

14Yaz mangc songđ phătc, naih ah tungđ vănx phangb pec, yâuc naih ah lanh yămz wa vănx cah zâyc cayx năngđ Bamh Munh, Nănh nyăngz pyây đongx sămz tany, Nănh nyăngz puf yâuc nzauf ah zuungz bah tôz njayc. 15Zef naih pitc tauh stinz munh tăng wa bongc Zâu Tênb-Huungh nyăngz pyau setb taih, hamv stingb lub êu stâyv wa vănx cah zâyc wax Tauh coong: “Joođ quanyf Mâyh nyăngz bah tôz nzac bix quănf gôh wâyc beengc săngx huđ quănf nzof, guungh đi nyăngz jengz zunb suc nzuf nzof gôh.” 16Stâyv wa vănx cah zâyc wax tauh songđ quanyf Nănh nyăngz bah tôz nzac nib taih, nib songđ zuc quănf.

17Tăng wa zef naih pitc tauh stinz munh tăng bongc Zâu Tênb-Huungh nyăngz pyau yămz wa guungh setb taih, nâyx tauh lauf naih ah zuungz bah tôz njayc. 18Zef naih pitc tauh stinz munh timb, nâyx tauh six naih lokc jangx cun yămz tâuf, tăng bongc Zâu Tênb-Huungh nyăngz pyau setb taih, nănh hamv stingb lub êu naih zuungz bah tôz njayc wax tauh, coong: “Quanyf mâyh nyăngz bah tôz njayc nzac bix sâub yămz wa nib wax đomc muif zâyz tungh cuđ njăngx nyăngz pyâu gôh, wâyc stiz wax đomc tungh cuđ pyâu suc nzof.” 19Wax tauh stinz munh songđ quanyf nănh nyăngz bah tôz nzac nib taih, sâub yămz wa nib minc wax đomc tungh cuđ lauđ winb, songđ quanyf nzac Zâu Tênb-Huungh tingc stoif wax nomz ngatc tungh cuđ pyâu nyăngz stôh lub ninyh. 20Wax nomz ngatc tungh cuđ pyâu stôh tuz nyuih ănz wa dlanyh cungh ngwaic, yâuc naih samđ tăng wa stôh njâuc setb taih njăngb beengc maf longh, cox stamx pez gâyf đao.