Hinđ-yangh 13

1Tăng wa, yaz phătc ah tauh jămx staov tăng wa coiđ setb taih, naih săpc nomz joongz nhlic nomz pyây, yămz nănh wax đomc joongz naih săpc nomz tany, nzof yămz nănh wax đomc pyây six naih coong pamf nyăngz ah nomz manyh bux. 2Yaz phătc wax tauh jămx staov six cayx năngđ njanh meof, nănh nyăngz staux six cayx năngđ jăpx nyăngz staux, nzof nănh nyăngz nzetx six cayx năngđ njanh zongh nyăngz nzetx, wax tauh côngz songđ jaoz nănh nyăngz jab, cloon nănh nyăngz tinc cloon lokc jangx lub nzongf, phunz wax tauh jămx staov. 3Nănh wax đomc pyây naih ah nomz cayx năngđ cay zuc tayx quaix nâyx, six nănh zuc tayx nyăngz tinc yâuc tuz zany gongx. Lomc guungh đi munh songđ tinyh đoih numđ njingc bix ninyh lêpc wax tauh jămx staov, 4munh songđ paix bongc wax tauh côngz wâyc nănh jaoz lokc jangx phunz wax tauh jămx staov, stiz lauf canyx bongc wax tauh jămx staov, yâuc coong: “Naih mănv năngđ tuz nâyx tauh jămx staov, nzof naih mănv hayh bopc tuz hingh nănh heh?” 5Wax tauh jămx staov yâuc tuz sađ phunz ah nomz nzetx nongc ayx nzetx lub yâuc coong wac pamf, nănh yâuc tuz sađ lokc jangx phunz nongc ayx cumh pâuz tuz stâyx săpc nyâyc lav cah njaf. 6Wax tauh jămx staov songđ goib nzetx coong wac zaiđ Zâu Tênb-Huungh, pib Nănh nyăngz manyh cloon Nănh nyăngz tinc — cloon yămz wa guungh wax đomc munh. 7Wax tauh jămx staov yâuc tuz lanyf cloon wax đomc đăngb zeengh munh bopc zax yâuc tuz hingh nănh stiz, nănh yâuc tuz sađ lokc jangx phunz nongc cun manf stingx, muif huungđ munh, muif huungđ wac, cloon muif nomz côkz. 8Guungh đi nyăngz muif huungđ munh songđ paix bongc nănh, six wax đomc max naih stiz nyăngz bux ja yămz Pax Jiz Yuungh Jenz nyăngz săngh mengc tanz wax đomc, senz zuc tayx tayc tăng zuyx guungh zuyx nib wax Tauh. 9Laiv lanh naih bah noomh, six oix zuc mungv.

10Năngđ coong laiv lanh mengc taix zuc yămz nzauh,

nănh six zuc yămz nzauh,

năngđ coong laiv lanh mengc taix zuc nzuc đao tayx,

nănh six zuc nzuc đao tayx.

Nây six wax đomc đăngb zeengh munh nyăngz zen stimz, zuc nyangc, zuc tanyđ nyăngz jau.

11Yaz zef phătc pitc tauh jămx staov tăng wa nib setb taih, nănh naih iz nomz joongz cayx năngđ pax jiz yuungh jenz nyăngz joongz, six coong wac cayx năngđ côngz. 12Nănh nongc nzuf tah yetx tauh jămx staov nyăngz jab yămz wax tauh jămx staov nyăngz cah đangc, nănh ayx phunz guungh đi cloon yămz wa guungh đi nyăngz munh tinyh đoih paix bongc tah yetx tauh jămx staov, senz naih baz cayx năngđ zuc tayx yâuc tuz zanyf gongx wax tauh jămz staov. 13Nănh ayx wax đomc jix caox njingc lub nzongf, ayx tuz nănh lôx năngx ayx phunz tâuf tăng guungh tuih nzac nib taih yămz bamh munh nyăngz cah đangc. 14Songđ nongc nănh yămz wax tauh jămx staov nyăngz cah đangc ayx wax đomc jix caox njingc, nongc jaf guungh đi munh, yâuc êu guungh đi munh ayx naih baz năngđ zuc nzuc đao tayx six năngx jinh săngh wax tauh jămx staov nyăngz hanyh tongc. 15Nănh yâuc naih lanyf hab siv ănz wax tauh jămx staov nyăngz hanyh tongc, phunz jămx staov nyăngz hanyh tongc yâuc hayh coong wac, yâuc ayx phunz laiv lanh max paix bongc wax tauh jămx staov nyăngz hanyh tongc six zuc tayx tayc. 16Nănh yâuc ayx phunz muif lanh munh, max cun lub max six jenz, puv quâyx max six zâuđ, ayx nâuh max six max ayx nâuh, tinyh đoih zuc ănz ah cuyb yenx ănz stiz wa byaoh saz puf max six stiz wa pyây ploongh, 17phunz tinyh phanv laiv lanh max naih wax cuyb yenx wax tauh munh songđ max hayh maif maic, six jămx staov nyăngz bux, cloon nănh bux nyăngz sôx. 18Nây six tongb manyh nyăngz jau: Laiv lanh hayh manyh pec wax lanh oix zuc stunx mangc wax tauh jămx staov nyăngz sôx. Wâyc nây six ah lanh munh nyăngz sôx, nzof wax tauh munh nyăngz sôx six guc pez guc săpc guc.