Hinđ-yangh 12

1Yâuc phătc naih ah huungđ njih hoouđ lub nzongf yămz wa guungh: naih ah lanh munh nzif naih bah noib sêmz nzuf, nzof lav yâuc yămz nănh nyăngz staux đi, nănh nyăngz pyây yâuc đongx săpc nyâyc nomz stingz tau ayx tany, 2nănh jinh đangh naih stinb, songđ hamv nâyx munz wâyc tuz sây gumc, yâuc jinh đangh njitc wâyc cayx steengb sây. 3Yâuc phătc ah huungđ njih hoouđ timb yămz wa guungh: naih ah tauh côngz lub nzaox stiv, naih nhlic nomz pyây, săpc nomz joongz, cloon nhlic nomz tany đongx ănz nănh wax đomc pyây, 4Nănh nyăngz tây đănx yămz wa guungh nyăngz stingz tau pôz phănc nyăngz ah phănc tuih nzac nib taih. Wax tauh côngz songđ stâuđ yămz cayx steengb sây wax tauh munh nzif nyăngz cah đangc, nongc zu tauv wax tauh munh nzif steengb tuz sây, nănh six naz wax tauh munh nzif nyăngz sây. 5Wax tauh munh nzif steengb tuz ah lanh toonz, wax lanh toonz six tuz nongc njab pya cun manf côkz nyăngz munh. Nzof wax tauh munh nzif nyăngz toonz yâuc tuz zab ninyh phunz Zâu Tênb-Huungh, yâuc ninyh tuz tauv Nănh nyăngz huungh tinc, 6năngx naih wax tauh munh nzif six tiuv ninyh yămz wa stâyz phangz blănf, yămz wa nănh tuz Zâu Tênb-Huungh bênc ah cuyb tinc phunz nănh yămz, yămz wa yâuc naih munh jămđ nănh tuz ah tinb iz pez guc săpc noib cah njaf.

7Nzof yămz wa guungh yâuc naih panx zax setb taih. Mi-ca-ên cloon nănh wax đomc stinz munh ninyh cloon wax tauh côngz bopc zax; nzof wax tauh côngz songđ cloon nănh wax đomc manđ ninyh bopc zax. 8Stiz songđ max naih jab tămx tuz hingh, nzof yămz wa guungh songđ max phătc naih stiz nyăngz tinc gôh. 9Wax tauh côngz lub songđ zuc quanyf nzac — nănh six lôx noib wax tauh nangz, hipđ ayx manđ huungh yâuc hipđ ayx Sax-tanx, senz jaf lomc nây guungh đi munh wax tauh — nănh zuc quanyf nzac nib ninyh, nzof nănh wax đomc manđ lauf zuc quanyf cloon nănh nzac ninyh. 10Yaz songđ numđ naih wac stingb lub yămz wa guungh, coong:

“Nâyx zanyf, njâuv pôz, cloon tômx jab,

cloon pănh nyăngz Zâu Tênb-Huungh nyăngz côkz taih tauv gôh,

cloon Nănh njămh yâuh ănz wax Tauh nyăngz tômx jab,

wâyc zuc cooux pănh nyăngz yâuf pez wax tauh,

senz noib munf yămz pănh nyăngz Zâu Tênb-Huungh nyăngz cah đangc cooux stiz wax tauh, zuc quanyf nzac nzof gôh.

11Stiz tuz hingh nănh păngc yămz Pax Jiz Yuungh Jenz nyăngz samđ cloon stiz ayx nyăngz zanyx manyf wac,

stiz max zâuh stiz nyăngz mengc ayx tuz tauv tayc.

12Wâyc nây, muif tab guungh cloon yămz wa nyăngz munh lex,

oix zuc numđ nyađ gôh!

Six nib cloon coiđ senz zuc zâuđ gôh,

wâyc manđ huungh nzac nyâuh wa ninyh,

nănh jinh đangh siv nhlenx nzongf,

wâyc pâyz tuz nănh nyăngz săngx huđ max naih đao!”

13Wax tauh côngz phătc nănh zuc quanyf nzac nib taih, nănh songđ luiđ wax tauh munh nzif, six steengb sây toonz wax tauh munh nzif. 14Six wax tauh munh nzif yâuc tuz sađ ah toix clang lub đatz phunz, nongc đayv ninyh wa stâyz phangz blănf, tauv nănh nyăngz tinc, yămz wa nănh six tuz jămđ, ah nyăngv, iz nyăngv, cloon ah đam nyăngv — gâyh goib wax tauh nangz nyăngz minb. 15Nangz songđ puutb womz tăng nănh nyăngz nzetx setb taih cayx năngđ wăngx nâyx luiđ wax tauh munh nzif đangz, phunz nănh hayh ayx bây wax tauh munh nzif zuc womz lub cuutb ninyh. 16Six nib songđ stăngc njâuv wax tauh munh nzif, nib quaf nzetx naz wax tauh côngz tăng nănh nyăngz nzetx puutb setb taih wax nomz wăngx. 17Wax tauh côngz songđ numđ nhlenx wax tauh munh nzif bix ninyh cloon wax tauh munh nzif năngx yăngc nzac wax đomc sây stunz bopc zax, senz ayx âyz Zâu Tênb-Huungh nyăngz lanyf cloon ayx Zâu Yê-su nyăngz zanyx manyf wax đomc munh. 18Nănh songđ stâuđ yămz wa coiđ sinh nyăngz njăuz staiz minc.