Hinđ-yangh 17

1Yămz wa nhlic tauh stinz munh nzauf nhlic nomz wăn wax đomc, naih ah tauh taih coong ănz yaz coong: “Staox nây taih, yaz six phunz mâyh mangc ayx pyây wax tauh pongz lauh munh nzif zuc stămđ stoif nyăngz jau, jinh đangh stâyv yămz wa đuungx nomz womz minc wax tauh, 2guungh đi nyăngz muif tauh huungh tinyh đoih cloon nănh ayx longđ pongz lauh nyăngz stoif, nzof guungh đi nyenh mănh yâuc binz nănh nyăngz pongz lauh tiu.” 3Wax tauh stinz munh ênz yaz ninyh yămz Singx-Lingh cah njaf tauv ah nomz stâyz phangz blănf, yaz songđ phătc ah lanh munh nzif stâyv yămz ah tauh jămx staov nzaox stib nyăngz cah zâyc, naih coong pamf nyăngz manyh bux pong nzuf, naih nhlic nomz pyây săpc nomz joongz. 4Wax tauh munh nzif zuz guyz quav stib lamh cloon stib gunx, zoongz sămz, zoongz njăuz zâuz, cloon zâuz nomz, nănh nyăngz puf jinh đangh nzauf ah nomz sămz zan, naih sax huungđ cah lôh cloon wâyx nyăngz jau pong nzuf, wâyc nănh wax đomc pongz jauh nyăngz jau, 5nzof nănh nyăngz pyây ploongh naih ja ah nomz manyh bux, coong: “Ba-bi-lôn lub pinyx vâyv nyăngz jau, ayx wax đomc pongz lauh munh nyăngz nzif cloon muif huungđ cah lôh nyăngz jau yămz nây bamh canz.” 6Yaz yâuc phătc wax tauh munh nzif jinh đangh poc wa binz wax đomc đăngb zeengh munh nyăngz samđ cloon ayx zanyx manyf phunz Zâu Yê-su wax đomc munh nyăngz samđ, yaz phătc wax tauh munh nzif yaz songđ nyâyh ganc yâuc numđ njingc nzongf. 7Wax tauh stinz munh coong ănz yaz, coong: “Săngh laix mâyh bix numđ njingc? Yaz coong phunz mâyh pâyz wax tauh munh nzif pinyx vâyv nyăngz jau cloon nănh jinh đangh zâyh wax tauh jămx staov, senz naih nhlic nomz pyây cloon săpc nomz joongz wax tauh jămx staov. 8Mâyh phătc, cah đangc naih, nâyx zanyf max naih, cah đangz zef năngx tăng wa tuungh tămx cotb max naih cah tôz setb taih wax tauh jămx staov, nănh six ninyh tauv zuc mêtc nyăngz tinc, nzof guungh đi nyenh mănh, senz tăng zuyx guungh zuyx nib max naih stiz nyăngz bux ja yămz Săngh Mengc Tanz wax đomc munh, stiz phătc wax tauh jămx staov stiz songđ numđ njingc, wâyc cah đangc naih, nâyx zanyf max naih, cah đangz zef năngx phătc setb taih. 9Oix zuc naih tongb manyh nyâyh nâyx đomc jau: Nhlic nomz pyây six nhlic nomz zoongz, six wax tauh munh nzif stâyv wa cah zâyc nyăngz tinc, nzof stiz six lauf nhlic tauh huungh stix; 10pyaz tauh huungh paic nzof, naih ah tauh huungh jinh đangh yămz, năngx naih ah tauh timb max zeengx taih, six tauv nănh taih ayx huungh nănh yâuc max yămz tuz lauh. 11Cah đangc naih nâyx zanyf max naih wax tauh jămx staov, nănh six tah pêtz wax tauh huungh; nănh six lauf wa nhlic tauh huungh nyăngz ah tauh, yâuc jinh đangh ninyh tauv zuc mêtc nyăngz tinc. 12Mâyh phătc wa săpc nomz joongz six săpc tauh huungh, stiz six max zeengx tuz stipx côkz, six tauv stiz six tuz cloon jămx staov stipx lanyf ayx huungh toongx ah nomz săngx huđ. 13Nâyx đomc huungh yâuc tinyh đoih songc ah nomz stimz nyâuđ, yâuc jaoz stiz nyăngz lanyf cloon jab phunz wax tauh jămx staov. 14Stiz six cloon Pax Jiz Yuungh Jenz bopc zax, nzof Pax Jiz Yuungh Jenz six bopc hingh nănh stiz, wâyc Nănh six manf zâu nyăngz Zâu, manf huungh nyăngz Huungh — nzof lêpc Nănh wax đomc munh six tuz êu, tuz sên taih, yâuc neetb stimz nyăngz munh.” 15Wax tauh stinz munh coong ănz yaz: “Mâyh phătc wax đomc womz, bix wax tauh pongz lauh munh nzif stâyv nyăngz tinc, six wax đomc muif huungđ munh, muif peob munh, muif nomz côkz, cloon muif huungđ wac. 16Mâyh phătc wa săpc nomz joongz, cloon wax tauh jămx staov — stiz six hănđ wax tauh pongz lauh munh nzif, stiz six ayx phunz nănh zuc quanyf yâuc zuc căng căng, stiz six nhlinc wax tauh munh nzif nyăngz a, yâuc nongc tâuf pu nănh, 17wâyc Zâu Tênb-Huungh phunz stiz naih nyâuđ ayx âyz Nănh nyăngz zux ix, yâuc songc ah nomz stimz nyâuđ, nongc jaoz stiz nyăngz côkz phunz wax tauh jămx staov, ayx tuz tauv laiv zanyf Zâu Tênb-Huungh coong wax đomc wac tuz setb taih toix nzuf. 18Mâyh phătc wax tauh munh nzif six ah nomz dlanyh lub naih lanyf cun guungh đi nyăngz muif tauh huungh.”