Phi-lipx-poi 1:6

1Yaz, Phao-lô cloon Ti-mô-tai, ayx Zâu Yê-su Jix-Tuz nyăngz pâuz, pungx phunz yetx stong đăngb zeengh munh yămz Zâu Yê-su Jix-Tuz, six yămz wa Phi-lipx-poi dlanyh nyăngz zen Zâu munh, cloon wax đomc jiux pangx nyăngz munh côx cloon pangx pôx munh. 2Cloo Zâu Tênb-Huungh six Pha cloon pănh nyăngz Zâu, six Zâu Yê-su Jix-Tuz, sađ pôz sađ peengh oonz phunz nyâuh.

3Laiv zanyf săngx tauv nyâuh yaz yâuc sâuf hâuđ yaz nyăngz Zâu Tênb-Huungh, 4nzof yaz muif hâyđ cloo Zâu yaz lauf numđ nyađ cloo Zâu phunz nyâuh muif lanh 5wâyc nyâuh naih songc phănc yămz nây Cuđ Jenx tăng ah yac tauv nâyx zanyf; 6yaz senz zen nâyx đomc coong, quef coonz ayx nâyx đomc gongx nyăngz cumh pâuz yămz nyâuh wax Tauh, six lauf ayx năngx tuz tauv Zâu Yê-su Jix-Tuz taih wax noib; 7nyâyh taih yaz săngx tauv nyâuh muif lanh năngđ nâyx, six toix nzongf; wâyc nyâuh yămz yaz nyăngz nyâuđ cah njaf, max cun yaz zuc njab langb stayb max six yămz yaz ayx zanyx manyf coong limb Cuđ Jenx nyăngz săngx huđ, nyâuh muif lanh lauf tuz cloon yaz songc phănc yămz Zâu nyăngz pôz. 8Wâyc Zâu Tênb-Huungh six ayx zanyx manyf phunz yaz wax Tauh, coong yaz nongc Zâu Yê-su Jix-Tuz nyăngz stăngz, stăngz nyâuh tinyh đoih. 9Nzof yaz cloo Zâu nyăngz jau six cloo phunz nyâuh naih nyâuđ stăngz munh cun ayx cun đuungx staox, yâuc cun ayx cun naih pănh sangz hayh pâyz tuz muif huungđ, 10phunz nyâuh hayh pâyz tuz laiv huungđ six năngx gongx quaix, phunz tauv Zâu Jix-Tuz taih wax noib nyâuh songđ tuz đăngb zeengh, yâuc max naih tinc nzêmh, 11naih peengh stimz nyăngz pyâu pong nzuf păngc yămz Zâu Yê-su Jix-Tuz, Phunz Zâu Tênb-Huungh tuz munh zanyb yâuc tuz gwăngz eeng.

12Yâuf pez lex, yaz oix nongc nyâuh pâyz tuz coong, yaz pongh nâyx đomc dlayc setb taih six wâyc phunz Cuđ Jenx tuz phutx staox. 13Ayx tuz, yămz wa jămđ quanz pyây tinc nyăngz yetx stong peengz cloon songx munh tinyh đoih lauf pâyz coong, yaz six wâyc Zâu Jix-Tuz bix zuc njab langb stayb, 14nzof yămz nyâuh cah njaf naih đuungx lanh munh, păngc yaz zuc njab langb stayb, bix zen tăngđ yămz Zâu, yâuc nzuf stimz lănv nzônh Zâu nyăngz gâyf max cumh nzav tiny. 15Max cun naih ah phanx munh nzônh Zâu Jix-Tuz nyăngz gâyf six wâyc stâyx munz yâuc wâyc tinyh nzeengz, six lauf naih ah phanx munh senz nongc nyâuđ nzônh, 16nâyx đomc munh six wâyc stăngz nyăngz jau, yâuc pâyz coong yaz tuz sên taih nongc limb nây Cuđ Jenx, 17six năngx naih wax đomc munh wâyc nyâuđ mauh cungb tâuh cănh tuz gongx wax đomc, stiz six max zâyf senz nongc nyâuđ nzônh Zâu Jix-Tuz, cungb nyâyh oix phunz yaz zuc zâuđ yâuc zuc njab langb stayb năngx nzongf têx. 18Six max đâuc đêh? Hănđ six ayx năngđ laix — max cun senz nongc nyâuđ nzônh max six max senz nongc nyâuđ nzônh — six Zâu Jix-Tuz lauf tuz nzônh ninyh, wâyc nây yaz lauf numđ nyađ. Nzof, yaz zef năngx numđ nyađ têx timb, 19wâyc yaz pâyz tuz coong nâyx huungđ six hayh ayx phunz yaz tuz njâuv, păngc nyâuh cloo Zâu nyăngz jau yâuc păngc tăng Zâu Yê-su Jix-Tuz nyăngz Singx-Lingh stăngc, 20âyz yaz numđ nyađ zu nyăngz njih mungc, max cun yămz laiv huungđ dlayc yaz lauf max numđ nyayz tiny, yaz pungx stimz yămz manf dlayc, hănđ six nâyx zanyf max six laiv zanyf, wâyc phunz Zâu Jix-Tuz hayh tuz zanyb saix yămz yaz nyăngz stinb, max cun săngh max six tayc. 21Wâyc âyz yaz, săngh six wâyc Zâu Jix-Tuz, nzof tayc six lauf tuz gongx. 22Nzof năngđ coong năngx jinh săngh yămz nây stinb a, yaz six lauf hayh tuz stăngc ayx cumh pâuz, wâyc nây yaz songđ max pâyz tuz yaz cayx sên laiv stinz jau. 23Yaz zuc nzapc yămz iz leepz mungh tongx, numđ oix tuz muf cloon Zâu Jix-Tuz yămz, wâyc nâyx six năngx gongx têx, 24six năngđ coong njinh luh yămz nây stinb a six năngx gongx têx phunz nyâuh. 25Wâyc zen tingc năngđ nâyx, yaz pâyz coong yaz six năngx jinh cloon nyâuh tinyh đoih yămz nây, wâyc phunz nyâuh nyăngz zen stimz hayh tuz njoongh staox yâuc numđ nyađ, 26phunz tauv yaz ninyh pongh nyâuh ah hâyđ timb, nyâuh zef hayh tuz numđ nyađ coong tauv yaz yămz Zâu Yê-su Jix-Tuz. 27Nongc sen quaix six nyâuh oix zuc yămz năngx payh cloon Zâu Jix-Tuz nyăngz Cuđ Jenx, phunz max cun yaz ninyh pongh nyâuh max six max ninyh, yaz yâuc hayh tuz numđ lănv tauv nyâuh coong nyâuh zen tăngđ, hoopđ stimz tongh âyx, songc ah stinz jau nyâyh, wâyc zen stimz nyăngz Cuđ Jenx bix songc nzeengz zax, 28yâuc max zuc wax đomc nzeengz cloon pănh nyăngz munh ayx phunz cumh nzav laiv huungđ, Nây six ayx zanyx manyf phunz stunx coong nănh stiz zuc mêtc, six yâuc săngh zanyx manyf phunz stunx coong nyâuh six tuz njâuv — nzof nâyx huungđ six tăng Zâu Tênb-Huungh taih. 29Wâyc păngc Zâu Jix-Tuz nyâuh bix tuz sađ pôz phunz, max zâyf cungb nongc zen Nănh cuungv, six yâuc nongc wâyc Nănh bix tanyđ zâuđ, 30zuc naih songc ah huungđ nzeengz zax nyăngz jau cayx năngđ nyâuh phătc yămz yaz yâuc jinh đangh numđ coong yămz yaz nâyx.