Dao Ao Dai Literal Text
Phi-lipx-poi 2
Wâyc nây, năngđ coong yămz Zâu Jix-Tuz cah njaf naih laiv huungđ oonz nyâuđ nyăngz jau, năngđ coong naih laiv huungđ stăngc munh yămz stăngz nyăngz jau, năngđ coong naih laiv huungđ cloon Singx-Lingh tinyh tongb, năngđ coong naih laiv huungđ stăngz max six hâuđ lênh munh nyăngz jau, six oix zuc ayx năngx clăkx clunh nzuf phunz yaz numđ nyađ, nyâuh oix zuc naih hoopđ stimz tongh âyx, naih songc ah nomz stăngz songc ah nomz stimz nyâuđ, yâuc songc ah stinz jau nyâyh. Ayx luungđ năngx gâyf wâyc tinyh nzeengz yâuc cungb tâuh cănh tuz gongx max six wâyc manyh tauh, six oix zuc naih nyâuđ nhlimc ayx jenz, stunx munh six năngx saix têx pănh, muif lanh munh năngx gâyf cungb nyâyh tâuh cănh tuz gongx cuungv, six yâuc oix zuc nyâyh phunz cloon pitc lanh munh tuz gongx timb. Nyâuh oix zuc songc naih ah nomz stimz nyâuđ cayx năngđ Zâu Yê-su Jix-Tuz nyăngz stimz nyâuđ nâyx,
Nănh hinđ taih yămz Zâu Tênb-Huungh nyăngz hanyh jangx,
six yâuc max stunx nongc ayx cloon
Zâu Tênb-Huungh tinyh năngđ.
Nzof, Nănh yâuc cănh ayx phunz Nănh max naih luungđ tiny,
yâuc ayx cayx năngđ ah tauh pâuz nâyx,
tuz steengb taih naih hanyh jangx cayx năngđ bamh munh,
yâuc tuz mangc ayx cayx năngđ ah lanh bamh munh nâyx,
Nănh cănh nhlimc ayx jenz yâuc mungv wac ayx tuz tauv tayc,
songđ tayc yămz wa săpc đăngc zax.
Wâyc nây, Zâu Tênb-Huungh songđ zanyb Nănh staox njăngb
yâuc sađ phunz Nănh nyăngz manyh năngx lub quaix muif nomz manyh,
phunz phanv numđ tauv Zâu Yê-su nyăngz manyh,
muif nomz staux nyâyf zoongz yămz guungh yămz nib, yămz cah đi nib, six zuc quâyc nzac paix,
nzof muif stinz byetc six nhlimc coong Zâu Yê-su Jix-Tuz six Zâu,
yâuc tanv Zâu Tênb-Huungh, six Tênb-toongh Pha.
Wâyc nây, yaz stăngz nzongf nyăngz yâuf pez lex, âyz năngđ nyâuh six njinh luh mungv wac nâyx, max zâyf cungb yămz yaz naih minb nyăngz săngx huđ, njinh nâyx zanyf yaz hănđ max naih minb nyâuh lauf ayx âyz năngx nzongf têx, nyâuh oix zuc numđ cumh nzav stinb sinx bix nzac jab ayx phunz nyâuh tuz njâuv. Wâyc Zâu Tênb-Huungh six jinh đangh yămz nyâuh cah njaf ayx cumh pâuz, phunz nyâuh cun numđ oix cun ayx âyz Nănh gongx nyăngz zux ix wax tauh. Hănđ ayx laiv huungđ cumh pâuz lauf năngx gâyf yônx yâuc năngx gâyf taux nzetx, phunz nyâuh pênx Zâu Tênb-Huungh nyăngz đăngb zeengh munh yâuc max naih tinc nzêmh, max naih paz, yămz nâyx stâyv nyâuđ huđ nyâuđ jaz nyăngz munh mungh tongx, yâuc păngc nây bix phunz nyâuh tuz siux gwăngz cayx năngđ toongz nâyx yămz nây bamh canz, oix zuc cayb nzauf năngx tăngđ săngh mengc nyăngz gâyf, wâyc yaz numđ nyađ nyăngz yămz Zâu Jix-Tuz taih wax noib, six yaz max zâyf cungb tiuv ayx huđ cuungv, yâuc max zâyf cungb ayx cumh pâuz zâuđ bix max setb laiv huungđ. Nzof max cun yaz hănđ zuc samđ setb nongc njămh wa stanyb lanyh cloon nyâuh zen stimz nyăngz jax dlaih, yaz six lauf numđ nyađ, yâuc cloon nyâuh tinyh đoih numđ nyađ. Hănđ nyâuh lauf tinyh năngđ, oix zuc numđ nyađ yâuc cloon yaz songc numđ nyađ.
Yămz Zâu cah njaf, six Zâu Yê-su, yaz numđ oix paiđ Ti-mô-tai ninyh pongh nyâuh năngx căn, phunz yaz hayh tuz numđ nyađ wâyc tuz numđ lănv tauv nyâuh. Wâyc max naih mănv cloon yaz hoopđ stimz tongh âyx cayx năngđ nănh, nănh senz naih nyâuđ numđ stauh nyâyh oix nongc nyâuh tuz gongx, wâyc muif lanh munh cungb lov cănh nyăngz cumh pâuz phănc cuungv, max nyâyh tauv Zâu Yê-su Jix-Tuz nyăngz cumh pâuz. Six nyâuh yâuc pâyz tuz nănh neetb stimz nyăngz jau, wâyc nănh cloon yaz songc ayx Cuđ Jenx nyăngz cumh pâuz, cayx năngđ pha cloon toonz nâyx. Tăng yaz ah pâyz tuz yaz nyăngz dlayc six năngđ laix, yaz songđ numđ oix coonx paiđ Ti-mô-tai ninyh nyâuh wa. Six yaz senz zen tingc yămz Zâu coong yaz six lauf tuz ninyh tayđ nyâuh căn. Nzof, yaz yâuc numđ sămv zuc paiđ Ê-ba-phô-đi-tat ninyh nyâuh wa, nănh six săngh ah lanh yâuf pez yâuc ayx ah lanh cumh pâuz toic cloon yaz songc nzeengz zax, tăng nyâuh paiđ taih nyăngz munh, nănh six stăngc phunz yaz sămv nongc nyăngz tax huungđ, wâyc pâyz tuz coong nănh senz oix tuz muf cloon nyâuh tinyh đoih yămz, yâuc numđ stauh wâyc nyâuh tuz numđ coong nănh săngh gumc. Wâyc nănh senz săngh gumc cayx tayc gôh, six Zâu Tênb-Huungh yâuc hâuđ lênh nănh, max zâyf cungb hâuđ lênh nănh cuungv, yâuc năngx cloon yaz timb, phunz yaz max zuc stauh zef năngx pâu stauh. Wâyc nây, yaz numđ oix coonx paiđ nănh muf, phunz tauv tuz pongh nănh nyâuh bix hayh tuz numđ nyađ, nzof yaz yâuc tuz max zâuđ numđ stauh đuungx. Wâyc nây, oix zuc numđ nyađ stipx nănh năngx clăkx clunh yămz Zâu cah njaf, nzof yâuc oix zuc nongc nyâuđ zanyb wax đomc munh năngđ nâyx, nănh wâyc ayx Zâu Jix-Tuz nyăngz cumh pâuz bix cayx caiđ zuc tayx, nănh max zâuh cănh nyăngz mengc nongc stăngc tuz clăkx clunh nzuf yămz nyâuh stăngc max tuz tauv phunz yaz wax đomc cumh pâuz.
Dao Ao Dai Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.