Ê-phê-sô 6

1Ayx sây nyăngz munh six oix zuc mungv nzif pha nyăngz wac yămz Zâu cah njaf, wâyc nây six ayx hoopđ nyăngz jau. 2“Oix zuc hâuđ lênh mâyh nyăngz nzif pha” (nây six tah yetx tiuh lanyf naih cloon nyunc nyăngz wac), 3“phunz mâyh tuz gongx nyăngz pôz yâuc săngh tuz nyăngv tauh đao yămz nây nib minc.” 4Ayx pha nyăngz munh, năngx gâyf nhlef ayx phunz cănh nyăngz sây siv nhlenx. Plănc taih, six oix zuc nongc Zâu nyăngz wac quinb nzaox yâuc yenv phunz stiz.

5Ayx pâuz nyăngz munh, oix zuc buc nyâuh nây stâyv sangc nyăngz zâu nongc nyâuđ zanyb yâuc cumh nzav stinb sinx bix ayx nyâuđ zanyx, cayx năngđ ayx phunz Zâu nâyx, 6max zâyf cungb toongx zâu mangc nyăngz săngx huđ bix ayx phunz zâu numđ nyađ cuungv, six oix zuc ayx cayx năngđ cay Zâu Jix-Tuz nyăngz pâuz nâyx, nongc nzuf nyâuđ ayx âyz Zâu Tênb-Huungh nyăngz zux ix, 7nongc nzuf nyâuđ buc, cayx năngđ ayx phunz Zâu nâyx bix max zâyf ayx phunz munh, 8wâyc pâyz tuz coong muif lanh munh, hănđ ayx nâuh max six max ayx nâuh, tinyh phanv ayx laiv huungđ gongx nyăngz cumh pâuz, nănh six tuz stipx gongx nyăngz phănc tăng Zâu.

9Nzof, ayx zâu nyăngz munh lauf oix zuc ayx gongx ănz nyâuh nyăngz pâuz năngđ nâyx, năngx gâyf huukb mađ, wâyc pâyz tuz coong nyâuh cloon stiz songc ah tauh Zâu yămz wa cah zâyc guungh, nzof Nănh six max naih pyac toix laiv lanh.

10Nzof, nyâuh yâuc oix zuc ayx năngx njoongh taih yămz Zâu cah njaf, păngc Nănh nyăngz tômx jab. 11Oix zuc zoongz Zâu Tênb-Huungh bopc zax nyăngz tungh zăngc, phunz nyâuh hayh stâuđ tuz tăngđ, nzeengz cloon manđ cuyx quaiz nyăngz zux ix. 12Wâyc pănh bopc zax nyăngz jau six max zâyf nzeengz cloon samđ cloon stinb a, six nzeengz cloon ayx zâu cun wax đomc, nzeengz cloon naih lanyf naih jab wax đomc, nzeengz cloon cun nây bamh canz nzămc nyăngz tinc wax đomc, nzeengz cloon yămz lâyc đamx guungh wax đomc manđ yootz. 13Wâyc nây, oix zuc zoongz Zâu Tênb-Huungh bopc zax nyăngz tungh zăngc năngx dloih nzuf, phunz tauv njanh okx nyăngz noib nyâuh nzăngđ hayh nzeengz tuz hingh, tauv ayx soongb nzuf muif huungđ yâuc tuz stâuđ tăngđ. 14Năngđ nây, oix zuc stâuđ năngx tăngđ, nongc senz gâyf ayx quav langb stayb nyâuh nyăngz clai, nongc peengh stimz nyăngz jau ayx njab guyz zuz, 15bênc săngh nzônh peengh oonz nyăngz Cuđ Jenx nongc ayx stub tapc ănz staux, 16yămz manf dlayc oix zuc nongc zen stimz ayx tăng payh nzauf, păngc nây nyâuh nzăngđ hayh bopc tuz hingh okx munh nyăngz stoongz đanyf naih tâuf wax đomc. 17Oix zuc nongc njâuv pôz ayx njab moouc đongx yâuc nzauf Singx-Lingh nyăngz nzuc đao, nây six Zâu Tênb-Huungh nyăngz wac, 18oix zuc muif dlih păngc Singx-Lingh cloo Zâu, yămz muif huungđ cloo Zâu nyăngz jau yâuc joođ phunz hayh tuz sting điub taih yâuc nzac jab cloo Zâu phunz wax đomc đăngb zeengh nyăngz munh tauv laiv, 19yâuc cloo Zâu phunz yaz, phunz Zâu nyăngz gâyf hayh tuz sađ phunz yaz, phunz yaz hayh goib nzetx yâuc tuz pungx stimz coong manyf nây Cuđ Jenx pinyx vâyv nyăngz jau 20(yâuc wâyc nây Cuđ Jenx yaz bix săngh tâuc jenx munh yămz nây njab langb stayb nyăngz jau), phunz yămz nâyx đomc jau, yaz yâuc hayh tuz pungx stimz nzônh gâyf âyz năngđ yaz hoopđ zuc coong nâyx.

21Six phunz nyâuh hayh pâyz tuz tauv yaz nyăngz jau, yaz jinh đangh ayx luungđ, naih Ti-ci-gatc, stăngz nyăngz yâuf pez yâuc neetb stimz yămz Zâu, six cănh bux phunz nyâuh pâyz nzuf muif huungđ, 22nănh six yaz paiđ ninyh nongc pongh nyâuh wâyc nâyx đomc jau, phunz nyâuh hayh pâyz tuz tauv buz nyăngz jau six năngđ laix, phunz nyâuh hayh tuz oonz nyâuđ.

23Cloo Zâu Tênb-Huungh, six Pha, cloon Zâu Yê-su Jix-Tuz sađ peengh oonz, cloon stăngz nyăngz jau cloon zen stimz phunz nyâuh. 24Cloo Zâu nyăngz pôz cloon nyâuh muif lanh yămz, senz stăngz pănh nyăngz Zâu Yê-su Jix-Tuz tauv tauh tauv mâyv wax đomc munh.