Ma-tai 9

1Wax zanyf Zâu Yê-su nzac đangđ ninyh, clăngv coiđ muf tauv Nănh nyăngz dlanyh. 2Phanv mangc, munh ênz ah lanh munh quac phâyx wa sic taih phunz Nănh. Zâu Yê-su phătc stiz nyăngz zen stimz, Nănh coong ănz wax tauh munh quac: “Sây lex, pungx stimz bex. Mâyh nyăngz stoif tuz quanyf nzof gôh.” 3Six phanv mangc, naih ah đomc nzaox gâyf stênx steengb lanh coong ănz lanh coong: “Lâyc tauh munh coong pamf Zâu.” 4Six wâyc pâyz tuz stiz nyăngz nyâuđ nyâyh, Zâu Yê-su songđ coong ănz stiz: “Nyâuh nyâyh huđ ănz lâyc nyâuđ nongc ayx luungđ heh? 5Coong: ‘Mâyh nyăngz stoif tuz quanyf nzof gôh,’ max six coong: ‘Nyoongz quef bix yăngh muf’ laiv zâux six coong năngx hâyđ têx heh? 6Six, phunz nyâuh pâyz tuz coong Bamh Munh, yămz nây bamh canz naih lokc jangx quanyf tuz stoif …” Wax zanyf Nănh coong ănz wax tauh munh quac: “Nyoongz quef, glonc mâyh nyăngz sic, bix muf pyau gôh.” 7Wax tauh munh songđ nyoongz quef, muf nănh nyăngz pyau. 8Phătc nâyx đomc dlayc, songx munh numđ cumh nzav songđ tanv Zâu Tênb-Huungh, wâyc Nănh sađ phunz munh naih nâyx đomc lokc jangx. 9Tăng wa staox ninyh, Zâu Yê-su phătc ah lanh munh hipđ ayx Ma-tai stâyv wa sâub sôiv zamf, Nănh êu Ma-tai coong: “Lêpc yaz gôh.” Nănh songđ nyoongz quef, ninyh lêpc Zâu Yê-su.

10Zâu yê-su yămz Ma-tai nyăngz pyau nhlinc năngv wax zanyf, phanv mangc, naih đuungx lanh sâub sôiv munh cloon naih stoif nyăngz munh taih, cloon Zâu Yê-su căn Nănh wax đomc stayb sây, songc stâyv hinh nhlinc năngv. 11Phătc ayx nâyx, wax đomc Pha-li-si munh coong ănz Zâu Yê-su wax đomc stayb sây coong: “Săngh laix bix nyâuh nyăngz stayb pha, căn wax đomc sâub sôiv munh cloon naih stoif nyăngz munh songc nhlinc heh?” 12Six numđ stiz naic ayx nâyx, Zâu Yê-su coong: “Munh zoongx munh max sămv zuc lov mađ stangc munh, six cungb săngh gumc munh cuungv. 13Six tauv nyâuh muf, oix zuc hođ nâyx zâux wac năngx pâyz jađ coong ayx laix: ‘Yaz oix munh naih nyâuđ hâuđ lênh munh, max zâyf oix munh nzâyz stanyb lanyh taih coongx.’ Wâyc yaz taih max zâyf taih êu munh gongx munh, yaz six taih êu naih stoif nyăngz munh.”

14Wax zanyf, Yô-hanx wax đomc stayb sây taih stătx Zâu Yê-su, naic coong: “Wâyc săngh laix buz cloon Pha-li-si munh zuc njif nhlinc, Mâyh nyăngz stayb sây buz yâuc max njif nhlinc heh?” 15Zâu Yê-su coong ănz stiz: “Ha săngb langh năngx jinh cloon zef munh yămz ayx coonx hinh nyăngz săngx huđ, stiz laiv hayh stauh heh? Six tauv beengc noib săngb langh zuc ênz ninyh gâyh stiz blătc, tauv wax zanyf stiz nzăngđ njif nhlinc. 16Yâuc, max naih mănv nongc ah cuyb săngb buyx max zeengx byanb taih va ănz lôx guyz, wâyc wax nomz tungh va six nyootz byaif gâyh wax byenđ guyz, wax cuyb tinc zef byaif pâu năngx huđ têx. 17Yâuc max naih mănv taox săngb tiu ănz lôx đupx tic, six năngđ coong ayx năngđ nâyx, six đupx tic hayh byaif, tiu yâuc setb nzuf, đupx tic yâuc quaiz. Năngđ naz, săngb tiu munh six taox ănz săngb đupx tic, iz huungđ yâuc tuz gongx.”

18Zâu Yê-su jinh đangh coong nâyx đomc wac ănz nănh stiz, phanv mangc, naih ah lanh huyđ toongh nyăngz ayx côx munh taih, quâyc nzac Zâu Yê-su nyăngz cah đangc ninyh, coong: “Yaz nyăngz sab ah yac tayc, six joođ Mâyh ninyh, tăpx puf ănz nănh, nănh nzăngđ tuz săngh.” 19Zâu Yê-su songđ nyoongz quef, căn Nănh wax đomc stayb sây lêpc wax tauh munh muf. 20Phanv mangc, naih ah lanh munh nzif săngh đuv guyz max gaib nyăngz gumc tuz săpc nyâyc nyăngv, nănh quaix Zâu Yê-su cah đangz taih, lumz Zâu Yê-su nyăngz guyz saz, 21wâyc nănh cănh nyâyh coong: “Yaz năngđ phanv ninyh lumz tauv Nănh nyăngz guyz, yaz six bâyf tuz gumc gongx.” 22Six Zâu Yê-su winb đangz lauf phătc wax tauh munh nzif, Nănh songđ coong: “Sây lex, pungx stimz bex; mâyh nyăngz zen stimz, cănh zany phunz mâyh tuz gongx.” Toongx wax nomz săngx huđ wax tauh munh nzif tuz gumc gongx. 23Tăng wa Zâu Yê-su ninyh tauv, wax tauh ayx côx cun huyđ toongh munh nyăngz pyau, yâuc phătc wax đomc pyom blungh blex munh cloon munh đuungx nginyz nginyz têx, 24Nănh coong: “Tiuv lâyc gôh, wâyc nâyx tauh sab six max tayc nef, nănh six mâyc njoomh lec.” Munh songđ jetx Nănh. 25Tăng wa, wax đomc songx munh zuc luiđ tiuv blătc nzuf wax zanyf, Nănh songđ nzac muf, nzauf wax tauh sab nyăngz puf, wax tauh sab songđ cănh nyoongz quef. 26Nâyx đomc dlayc lănv nzêux pong nzuf wax nomz stâyz phangz.

27Zâu Yê-su tăng wa setb ninyh, naih iz lanh mâyc buđ munh taih lêpc Nănh đangz hamv lub coong: “Đa-witx huungh nyăngz sây stunz lex, joođ hâuđ lênh buz nef!” 28Wax zanyf, nzac pyau muf blătc, wa iz lanh mâyc buđ munh taih tauv stătx Zâu Yê-su, Nănh naic stiz coong: “Nyâuh lauf zen coong yaz hayh ayx tuz nyâuh nyăngz mâyc gongx yah?” Stiz tauz coong: “Tuz lêc, Zâu lex.” 29Tăng wa, Nănh lumz stiz nyăngz mâyc, coong: “Âyz nyâuh nyăngz zen stimz, six tuz gongx phunz nyâuh gôh.” 30Stiz nyăngz mâyc mangc tuz phătc, Zâu Yê-su bux stiz, coong: “Nyâuh năngx cayb bôngh, nyâuh năngx gâyf phunz mănv pâyz.” 31Six tauv setb ninyh, stiz lănv nâyx đomc dlayc pong nzuf wax nomz stâyz phangz.

32Wax zanyf, stiz setb taih, phanv mangc, naih munh ênz ah lanh munh zuc manđ yămz stinb yâuc mayv coong wac taih phunz Nănh. 33Nănh luiđ manđ setb wax zanyf, wax tauh munh songđ hayh coong wac, songx munh songđ numđ nyâyh ganc, yâuc coong: “Yămz nây I-sa-la-ên, senz max zeengx tuz phătc quaix nâyx đomc dlayc gôh!” 34Six wax đomc Pha-li-si munh coong: “Lâyc tauh munh luiđ manđ six nongc manđ huungh nyăngz lanyf.”

35Zâu Yê-su ninyh nzêux nzuf muif nomz dlanyh cloon muif tiuh njăngv, yămz songx munh nyăngz wax đomc huyđ toongh nzaox gâyf, yâuc nzônh Tênb-toongh côkz nyăngz Cuđ Jenx, yâuc zany gongx muif huungđ gumc, cloon jif cah munz wax đomc. 36Wax zanyf, phătc naih songx munh đuungx, Nănh songđ numđ hâuđ lênh phunz stiz, wâyc nănh stiz zuc sêu lunc laoc, cayx năngđ bah jiz yuungh max naih zâu jămđ. 37Tăng wa, Nănh coong ănz Nănh nyăngz stayb sây: “Jeengz zunb đuungx, six cumh pâuz munh stoc. 38Wâyc nây, oix zuc joođ jeengz zunb nyăngz Zâu, ayx tuz phunz Nănh paiđ cumh pâuz munh taih sâub Nănh nyăngz jeengz zunb.”