Skip to content
BibleKenya

Dao Ao Dai Literal Text

Ma-tai 10

Nănh êu Nănh nyăngz săpc nyâyc lanh stayb sây taih, Nănh jaoz lokc jangx phunz stiz hayh luiđ manđ yootz, luiđ manđ setb yâuc hayh zany gongx muif huungđ gumc cloon muif huungđ munz. Săpc nyâyc lanh stayb sây nyăngz bux six năngđ nây: Tah yetx, Si-môn (yâuc hipđ ayx Pi-tê) cloon nănh nyăngz yâuf, An-đa-lu; Ya-coopc, cloon nănh nyăngz yâuf, Yô-hanx Sê-bê-đi nyăngz toonz; Phi-lipx cloon Ba-tô-lô-miu; Tô-matx cloon Ma-tai, sâub sôiv wax tauh; Ya-coopc six An-phê-atc nyăngz toonz, cloon Tat-đê-atc; Si-môn Sê-lôt, cloon Yu-đatc I-sa-ca-li-ôtx, maic Zâu Yê-su wax tauh.

Zâu Yê-su paiđ nâyx đomc săpc nyâyc lanh munh ninyh, zăpx bux nănh stiz coong: “Năngx gâyf ninyh quaix pitc stingx munh nyăngz stâyz phangz, yâuc năngx gâyf ninyh nzac Sa-ma-đi munh nyăngz dlanyh. Six oix zuc ninyh lov I-sa-la-ên nyăngz bah jiz yuungh ninyh gaih wax đomc. Nyâuh yăngh jau ninyh, wax zanyf, nyâuh oix zuc nzônh coong: ‘Tênb-toongh Côkz taih tauv stătx gôh.’ Oix zuc zany gongx munh nyăngz gumc, yâuc êu munh tayc săngh taih, yâuc zany maoh pongz munh nyăngz gumc, yâuc luiđ manđ setb. Nyâuh cungb tuz nyăngz, six lauf oix zuc cungb phunz. Năngx gâyf nzâyz, sămz, max six nyanh pec, max six tongh stinh, ănz nyanh tic nyax ănz nyâuh nyăngz clai, max nongc bênc luungđ nongc nzâyz ninyh, iz yămc guyz, max six stub, max six pya byac, wâyc cumh pâuz munh hoopđ zuc tuz nănh nhlinc yămz nyăngz phănc. Nyâuh ninyh nzac laiv nomz dlanyh max six nzac laiv nomz njăngv, oix zuc zah mungv jađ yămz wa naih mănv payh tuz stipx nyâuh, oix zuc yămz stiz nyăngz pyau năngx tauv laiv zanyf nyâuh setb wax nomz tinc ninyh. Nzac wa pyau ninyh, wax zanyf, oix zuc joođ peengh oonz phunz wax sênz pyau. Năngđ coong wax sênz pyau payh tuz têx, nyâuh nyăngz peengh oonz six yămz wa, six năngđ coong max payh tuz têx, nyâuh nyăngz peengh oonz six lêpc nyâuh phunb đangz. Laiv lanh max stipx nyâuh, yâuc max mungv nyâuh nyăngz wac, six tauv nyâuh setb blătc wax sênz pyau max six setb blătc wax nomz dlanyh, oix zuc phătb nyâuh nyăngz staux đi nib buungb. Yaz coong senz, bux nyâuh, Tauv tingc stoif wax noib, Sô-đôm cloon Gô-mô-la dlanyh, six zuc tingc stoif năngx sâub têx, wax nomz dlanyh.

Mangc, Yaz paiđ nyâuh setb ninyh, cayx năngđ bah jiz yuungh yămz jab clô đungc cah njaf, wâyc nây oix zuc lemđ cayx năngđ nangz, yâuc dlênc cayx năngđ nooc bah côz nâyx. Six oix zuc bôngh munh, wâyc stiz six oix zoz nyâuh jaoz phunz stămđ stoif quanz, stiz yâuc oix yămz wa stămđ stoif tinc nongc pya stătb nyâuh; wâyc Yaz nyâuh six zuc ênz ninyh tauv peengz pyây cloon huungh stix nyăngz cah đangc, nongc ayx zanyx manyf phunz nănh stiz cloon pitc nomz côkz nyăngz pec stingx. Nyâuh zuc ênz ninyh wax zanyf, năngx gâyf numđ stauh cayx coong ayx laix, max six cayx coong luungđ, six tauv wax zanyf, nyâuh sămv zuc coong nyăngz, cănh tuz sađ phunz nyâuh. Wâyc max zâyf nyâuh cănh coong, six nyâuh nyăngz Pha nyăngz Singx-Lingh yămz nyâuh coong setb taih. Max zâyf cungb nâyx, tah six zoz yâuf jaoz phunz munh tayx, pha yâuc zoz sây jaoz phunz munh tayx, sây yâuc cănh cloon nzif pha tinyh tămx tinyh nzeengz yâuc ayx phunz stiz zuc tayc. Wâyc yaz nyăngz manyh, nyâuh six zuc munh tinyh đoih hănđ nyâuh, six laiv lanh tanyđ tuz tauv tauh tauv mâyv, wax lanh nzăngđ tuz njâuv. Six nyâuh zuc munh ayx huđ yămz nâyx nomz dlanyh, six oix zuc tiuv ninyh pitc nomz dlanyh, yaz coong senz bux nyâuh, nyâuh ninyh max zeengx nzêux I-sa-la-ên nyăngz muif nomz dlanyh Bamh Munh songđ taih tauv gôh.

Stayb sây six max blătc tuz stayb pha, ayx nâuh munh yâuc max blătc tuz nănh nyăngz zâu. Stayb sây tinyh phanv hayh tuz năngđ nănh nyăngz stayb pha, nâuh phanv tuz năngđ nănh nyăngz zâu, six caux gôh. Năngđ coong munh hipđ pyau zâu ayx Bê-ên-sê-bun, six nănh nyăngz pyau munh lauf zuc đamz manyh năngx huđ têx! Wâyc nây, nyâuh năngx gâyf cumh nzav munh, wâyc max naih laiv huungđ pinyx bix max zuc zoz setb taih, yâuc max naih huungđ pinyx vâyv tuz munh max pâyz. Yaz yămz nzămc bux nyâuh laiv huungđ, oix zuc yămz gwăngz coong setb taih, nyâuh numđ coong wac sapb ănz bah noomh coonz, oix zuc yămz pyau tuungx hamv coong setb taih. Năngx gâyf cumh nzav wax đomc munh hayh tayx nyâuh nyăngz stinb, bix max hayh tayx nyâuh nyăngz meengc hoonh. Six oix zuc cumh nzav hayh njinh stinb njinh hoonh mêtc ănz wa tâuf coiđ wax Tauh. Iz saz nooc câyc maic max zâyf cungb tuz ah nomz tongh stinh haz? Six năngđ coong max zâyf nyâuh nyăngz Pha nyăngz zux ix, six max naih laiv saz zuc tuih nib. Njinh nyâuh nyăngz pyây đongz, yâuc tuz stauđ nzuf nzof gôh. Wâyc nây năngx gâyf cumh nzav; nyâuh six năngx saix têx đuungx saz nooc câyc. Wâyc nây, muif lanh, tinyh phanv laiv lanh toongx songx nhlimc yaz, yaz lauf yămz yaz nyăngz Tênb-toongh Pha nyăngz cah đangc nhlimc wax tauh. Six tinyh phanv laiv lanh max toongx songx nhlimc yaz, six yaz yămz Tênb-toongh Pha nyăngz cah đangc, yaz lauf max nhlimc wax tauh.

Năngx gâyf nyâyh coong yaz nzâyz peengh oonz taih nây bamh canz. Yaz max zâyf nzâyz peengh oonz taih, yaz six nzâyz nzuc đao taih. Wâyc yaz taih six ayx phunz toonz cloon pha max tinyh hođ, nzif cloon sab max tinyh hođ, bongf cloon bôf max tinyh hođ; mănv lauf naih cănh nyăngz wax đomc pyau munh ayx yônz zaz. Laiv lanh stăngz pha max six nzif năngx đuungx têx yaz, six max payh cloon yaz; laiv lanh stăngz sây toonz sab năngx đuungx têx yaz, six lauf max payh cloon yaz. Laiv lanh max cănh đamz nănh nyăngz săpc đăngc zax bix lêpc yaz ninyh, six max payh cloon yaz. Laiv lanh jâuz cănh nyăngz meengc six zuc stâyb meengc, laiv lanh wâyc yaz zuc quanyf cănh nyăngz meengc six tuz meengc lauf.

Laiv lanh stipx nyâuh six lauf stipx yaz, laiv lanh stipx yaz six lauf stipx paiđ yaz taih wax Tauh. Laiv lanh stipx ah lanh tâuc wac munh wâyc nănh ayx tâuc wac munh, six tuz stipx stâuđ nyâyc cayx năngđ tâuc wac munh, laiv lanh stipx ah lanh peengh stimz munh wâyc nănh six peengh stimz munh, six lauf tuz stipx stâuđ nyâyc cayx năngđ peengh stimz munh. Laiv lanh phunz ah zan womz nămx phunz nâyx đomc ah lanh jenz quaix nyăngz munh hopb, wâyc nănh ayx yaz nyăngz stayb sây, yaz coong senz bux nyâuh, hănđ ayx laix nănh yâuc max stâyb nănh nyăngz stâuđ nyâyc.”

Dao Ao Dai Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.